1 "Ngakamulichisye mwakukulupilichika malajisyo gose ganampele lelojino ga, kuti ntame ni konjecheka, nkombole kwinjila ni kuchijigala chilambo chati Ambuje Akunnungu, Akunnungu ŵenu, ŵalanjile kwakulumbila kwa achachekulu ŵenu kuti champe ŵanyamwe. 2 Nkumbuchile iŵatite Ambuje Akunnungu, Akunnungu ŵenu, paŵannongwesye ku ulendo kupitila kuchipululu kwa yaka alobaini, ŵantulwisye ni kunninga kwa isausyo yekulungwa mwelemo, kuti aimanyilile inkuganisya mmitima mwenu ni iŵaga ŵanyamwe tingakamulichisye makanyo gakwe pane ngaŵa. 3 Ŵantulwisye, ŵantamiche ni sala nambo sooni ŵampele mana kuti nlye, chakulya chinganinchimanyilila ŵanyamwe, atamuno achachekulu ŵenu nganachimanyilila. Ŵatesile yelei kuti anjiganye kuti mundu ngakukola umi ligongo lya yakulya pe, nambo kwa kila liloŵe lya Ambuje Akunnungu. 4 Pamwaliji mu ulendo wenu kwa yaka alobaini yakuwala yenu nganiiwisala sooni makongolo genu nganigaimba. 5 Mmanyilileje kuti Ambuje Akunnungu, Akunnungu ŵenu, akunjamuka mpele atati yakuti kunjamuka mwanagwe. 6 Nipele, ngakamulichisye malajisyo ga Ambuje Akunnungu, Akunnungu ŵenu, ntendeje mpela yatite pakunnajisya ni kunchimbichisya jwelejo pe. 7 Pakuŵa Ambuje Akunnungu, Akunnungu ŵenu chakanjinjisye ŵanyamwe ku chilambo chachili ni chajila, chilambo chachili ni sulo, ni mesi ga uliŵa, ni mesi gagakuulika kwichela ni mmatumbi. 8 Chilambo chachili ni mimela jajikuŵilanjikwa ngano, ni shayili, ni misabibu, ni nguju, ni mikomamanga, ni miseituni ni uuchi wejinji. 9 Kweleko chinkapate yaakulya yejinji na ngansingalilwa chindu. Lwala syakwe syana madini ga isyano, ni mmatumbi gakwe nkukombola kusola madini ga shaba. 10 Chinlye ni chinjikute, chimwatogolele Ambuje Akunnungu, Akunnungu ŵenu, ligongo lya kumpa chilambo chachili ni chajila."

11 "Nlolechesye kuti ngankwaliŵalila Ambuje Akunnungu, Akunnungu ŵenu, kwa kulepela kugakamulichisya malajisyo ni makanyo mashalaiti gakwe gangumpa lelojino. 12 Mwalyaga ni kwikuta ni kutaŵa nyuumba jakusalala ni kutama mwelemo, 13 ni katema ng'ombe ni ngondolo syenu, ni sahabu ni feza syenu, ni chindu chachilichose chinkwete pachiipunde kutupa, 14 nlilolechesye kuti ngasinlikwesyakwesya ni kwaliŵalila Ambuje Akunnungu, Akunnungu ŵenu, ŵaŵankopwesye ku chilambo cha ku Misili, kumwaliji mu ukapolo. 15 Ŵelewo ni ŵannongwesye kuchipululu chekulungwa chakogoya chila, chachili ni majoka gagakuluma ni makoloto; mwaliji mwangali mesi nambo Ambuje Akunnungu ŵampele meesi kutyochela mu lwala lwakulimba kuti nng'we. 16 Sooni ni uŵampele mana kuti nlye mwipululu mula, chakulya chakanalyeje achachekulu ŵenu. Ŵatesile yeleyi yose kuti antulusye ni ŵanlinjile kwa kumpa isausyo kuti kumbesi ko ampe upile. 17 Nipele nlilolesesye nkaika kulisalila kuti, ‘Tusichile kwa ukombole ni machili genu twachinsyene.’ 18 Nkumbuchile ndaŵi jose kuti Ambuje Akunnungu, Akunnungu wenu, ni ŵakumpa machili ga kusichila. Akutenda yelei kuti akwanilisye lilangano liŵalangene ni achachekulu ŵenu mpela yaili lelojino. 19 Iŵaga timwaliŵalile Ambuje Akunnungu, Akunnungu wenu, ni kujikuya minungu jine ligongo lya kujitumichila ni kujipopelela, ngunjamuka lelojino chinjonasiche. 20 Naga ngamwapikanila Ambuje Akunnungu, Akunnungu ŵenu, chinjonasiche mpela ŵandu ŵa ilambo ine iŵatite kwajonanga paujo penu."