1 Aga ni maloŵe ga chilanga cha Ambuje Akunnungu chiŵanlamulile che Musa kuti atende ni Ŵaisilaeli mu chilambo cha Ŵamoabu, konjechesya maloŵe ga chilanga gegala giŵapanganyisye Ambuje Akunnungu ni Ŵaisilaeli kwele ku litumbi lya Sinai. 2 Che Musa ŵaaŵilasile Ŵaisilaeli wose ni kwasalila "Mwanya nnyiweni mwachinsyene Ambuje Akunnungu iŵantesile mwenye jwa ku Misili ni ŵakamusi ŵakwe ni ŵakutumichila ŵakwe ni ŵandu wose ŵa mchilambo chakwe. 3 Mwachinsyene mwaiweni iputiko yekulungwa ni ilosyo ni yakusimonjeka yaitesile. 4 Nambo mpaka lelo jino Ambuje Akunnungu nganannechelela mmanyilile yaikwendelechela. 5 Kwa yaka alobaini uneji nannongwesye kuchipululu, yakuwala yenu nganiiwisala namose italawanda yenu nganiilala mmakongolo mwenu. 6 Nganinlyaga nkate namose nganinng'waga divai pane nkologo wauliwose, kuti mmanyilile yakuti Ŵelewo ni ŵaali Ambuje Akunnungu, Akunnungu ŵenu. 7 Pamwaichenje apano, che Sihoni mwenye jwa ku Heshiboni ni che Ogu mwenye jwa ku Bashani ŵaiche kukuputana ngondo ni uwe, nambo twaapundile. 8 Twachijigele chilambo chao ni kwapa ngosyo sya Lubeni ni Gadi ni nusu ja lukosyo lwa Manase kuti chiŵe chao. 9 Kwayele nlilolechesye kugakamulichisya maloŵe gose ga lilangano li kuti indu yenu injendechele yambone mu kila chindu chinkuchipanganya."

10 "Lelo jino ŵanyamwe wose njimi paujo pa Ambuje Akunnungu, Akunnungu ŵenu, kutandilila ilongola ŵa ngosyo ni achakulu ŵenu ni achalume ŵane wose, 11 achiŵankwenu ni ŵanache ŵenu ni achalendo ŵakutama pasikati jenu kutandilila ŵakutemanya sasu ni ŵakuntechelanga mesi, 12 Nlinji apano lelo kutenda lilangano li lyati Ambuje Akunnungu, Akunnungu ŵenu, akutenda ni ŵanyamwe ni kukunda malajisyo gakwe, 13 antende ŵanyamwe lelojino kuŵa ŵandu ŵakwe kusyene, nombewo taŵe Akunnungu ŵenu, mpela iŵatite kunlanjila ŵanyamwe ni achachekulu ŵenu che Ibulahimu ni che Isaka ni che Yakubu. 14 Lilangano li ni kulumbila ku Ambuje Akunnungu ngakutenda ni ŵanyamwe pe, 15 nambo nombe kwa ŵandu ŵane ŵanganaŵa pamo ni uwe lelojino."

16 "Ŵanyamwe mwachinsyene nkwimanyilila itwatite kutama ku Misili ni itujesile tulinkupita pasikati ja ilambo ya ŵandu ŵane ni kwika apano. 17 Kweleko mwaiweni inyago yao yakuchima, minungu ja kusepa ni itela ni maganga ni madini ga feza ni sahabu. 18 Nlilochesye ngasapagwa mundu jwalijose jwannume pane jwankongwe, pane nlongo njenu atamuno lukosyo lwalulilose lwaluli apano lelojino luchiŵaleche Ambuje Akunnungu, Akunnungu ŵenu ni kwaula kujitumichila minungu ja ilambo ine. Yelei chiŵe mpela nchiga ŵachiumele ni kuŵa chitela chachikusogola ikoko. 19 Naga pakumala kupilikana maloŵe ga ali lilangano li linnumbilile, apagwaga mundu jwakulisalila nsyene achitiji kuti ngapagwa lichilyasimane, akuno ali nkwendelechela kutenda makani, yele chiinjonanje ŵanawose, ŵandu ŵambone ni ŵangalumbana. 20 Ambuje Akunnungu ngasanlechelesya mundu jo, lutumbilo lwa Ambuje Akunnungu pamo ni wiu chiikolele kwa mundu jo. Malweso gose gagalembekwe mu chitabu chi chiichapata, nombe Ambuje Akunnungu wo chammulaje mundu jo, akapagwa pachilambo. 21 Ambuje Akunnungu tachimmika pajika kuti akaŵa jumo mwa ngosyo syose sya Ŵaisilaeli kuti lyasimane limbulunga malinga ni malweso gose gagalembekwe mu chitabu cha lilangano li."

22 "Pa moŵa gagakuika, iŵelesi yenu ni achalendo kutyochela ilambo yakutalika taiwone Ambuje Akunnungu yatite kuichisya mu chilambo chi limbulunga ni masauko. 23 Chilambo chose tichiŵe lipululu, chigumbele njete ni baluti, sooni tachijila kuti mu chilambo mo ngamukumela chindu chilichose. Chiŵe mpela Ambuje Akunnungu paŵajijonasile misi ja Sodoma ni Gomola ni Adima ni Seboimu kwa chisongolo chao chachikali. 24 Ŵandu ŵa ilambo yose tachiusya kuti, ‘Ana ligongo chichi Ambuje Akunnungu ŵachijonasile chilambo chi? Ana ligongo aŵele ni lutumbilo lwakogoya lwanti yelei?’ 25 Nipele ŵandu tasale kuti, ‘Ligongo ŵandu ŵa, ŵalilesile lilangano lya Ambuje Akunnungu, Akunnungu ŵa achachekulu ŵao liŵalitesile katema kaŵakopwesye ku chilambo cha ku Misili, 26 ŵajawile kujitumichila ni kujipopelela minungu jine, janganajipopeleleje chitandilile cho, minungu jati Ambuje Akunnungu ŵaakanyisye kujipopelela. 27 Kwayele Ambuje Akunnungu ŵaatumbilile kwannope ŵandu ŵa, ni ŵapelechele malweso gose gagalembekwe mu chitabu chi. 28 Ambuje Akunnungu ŵaatumbilile kwannope ŵandu ŵakwe wo, ni ŵaatupwile mu chilambo chao ni ŵaponyisye mu chilambo chachilendo, kwele kwaakutama mpaka lelojino.’ "

29 "Indu yaisisikwe ili ya Ambuje Akunnungu, Akunnungu ŵetu, nambo yosepe yaiunukwile yeleyo ili yetu uwe ni uŵelesi wetu moŵa gose pangali mbesi, kuti tukombole kugapanganya maloŵe gose ga malajisyo ga."