1 Che Musa ŵajendelechele kwasalila Ŵaisilaeli kuti, "Kwayele mwanonyele Ambuje Akunnungu, Akunnungu ŵenu, ni kugakamulisya mashalaiti gakwe ni makanyo gakwe ni malajisyo gakwe. 2 Mmanyilileje yakuti lelojino, nganguŵecheta sambano ni ŵanache ŵenu ŵati ngakwimanyilila namose nganaiwona yatite Ambuje Akunnungu, Akunnungu ŵenu, kwajamuka, ni yatite kuŵa ŵakulu, ŵamachili ni ukombole, 3 ni ilosyo yao ni indu yakusimosya iŵaitesile ku Misili kwa mwenye jwa ku Misili ni chilambo chao chose; 4 mwaiweni iŵatite pakwaulaga ŵa ngondo ŵa ku Misili wose, pamo ni falasi syao ni mutuka syao syakukwekwelemwa, iŵatite kwaunichila ni meesi ga mu baali ja Shamu, ni iŵatite Ambuje Akunnungu kwajonanga tikitiki. 5 Sooni nkumbuchile Ambuje Akunnungu iŵampanganyichisye katema pamwaliji ku lipululu kula mpaka mwaiche apano, 6 ni iŵatite pakwapanganyichisya che Datani ni che Abilamu, ŵanache ŵa che Eliabu, mwanagwe che Lubeni. Ndaŵi jo Ŵaisilaeli alinkulilolela, litaka lyaugwiche ni kwamila ŵanyao pamo ni achalongo achinjawo, masakasa gao, inyama ni ŵakutumichila ŵao wose. 7 Kwa meeso genu mwachinsyene mwaiweni yele indu yekulungwa iŵaitesile Ambuje Akunnungu."

8 "Kwayele ngapikanichisye makanyo gose gingumpanga lelo jino, kuti nkombole kola machili ga kwinjila ni kuchijigala chilambo chinkwaula kuchijigala pakumala komboka lusulo lwa Yolodani, 9 kuti nkatame moŵa gamajinji kuchilambo chachili ni chajila, ni chachikufai kwa ilango ni kulima, chilambo chati Ambuje Akunnungu ŵaalumbilile achachekulu ŵenu kuti chiŵape ŵanyawo ni iŵelesi yao. 10 Pakuŵa chilambo chinkwaula kuchijigala kuŵa chenu ngaŵa nti ku Misili kuntyosile, kwekula mwapandile mbeju mmigunda jenu ni kwitilila meesi kwa makongolo genu mpela mundu yakuti kwitilila migunda ja liponda. 11 Nambo chilambo chinkwaula kuchijigala kuŵa chenu pakumala komboka lusulo lwa Yolodani, chili cha matumbi ni machemba, chilambo chachikunya ula jajikutyochela kwinani, 12 chilambo chaakuchigosa Ambuje Akunnungu, Akunnungu ŵenu, ni sooni Ambuje Akunnungu akuchilolechesya moŵa gose kutandilila ndandililo ja chaka mpaka kumbesi chaka."

13 "Nipele, naga tingapilikanile kwa kukulupilichika makanyo gingumpanga lelo jino, iŵaga chimwanonyele Ambuje Akunnungu, Akunnungu ŵenu, ni kwatumichila kwa ntima wenu wose ni mbumu syenu syose, 14 Ambuje Akunnungu wo, tajitende ula jinye mu chilambo chenu mundaŵi ja kusosekwa, ula ja chisimaupya ni ula ja chuuku ni ŵanyamwe chinchigungula yakulya yenu, ni divai jasambano ni mauta. 15 Chagamesye masamba ga kuliisisisya ng'ombe syenu, nombe ŵanyamwe tinlye ni kwikuta. 16 Nlilolechesye nkaika kulambuswa, kwaleka Ambuje Akunnungu kwaula kujitumichila minnungu jine ni kujipopelela. 17 Mwatendaga yeleyo Ambuje Akunnungu chantumbilile, ni kugataŵa maunde kuti jikanya ula sooni, ni pachilambo ŵandu chalepele kupata magungulo, chinjonasiche chitema mu chilambo chachili ni chajila chakumpa Ambuje Akunnungu."

18 "Ngaŵiche maloŵe ga mmitima mwenu ni ngaganichisye. Ngataŵe mmakono mwenu nti chimanyisyo ni kugataŵa pausyo penu gankumbuchisye. 19 Mwajiganye ŵanache ŵenu maloŵe ga. Chimwatanjile pachintame pamusi pane mu ulendo pane pankupumulila atamuno pankupanganya masengo. 20 Ngalembe mu felemu sya minango jenu ni mu milango jekulungwa jakwinjilila mu misi jenu. 21 Mwatendaga yeleyo, ŵanyamwe ni ŵanache ŵenu chintame moŵa gamajinji ku chilambo chiŵalumbilile Ambuje Akunnugu, Akunnungu ŵenu, kwapa achachekulu ŵenu, mpela kwiunde kwakukuti kutamilichisya moŵa gamajinji penani pa chilambo."

22 "Nkamulisye yambone malajisyo gose gingumpanga: Kunnonyela Ambuje Akunnungu, Akunnungu ŵenu, ni kuitendekanya yose yakuisaka ni kukamulangana nawo mmatala gawo gose. 23 Pelepo Ambuje Akunnungu chiŵatopole ŵandu ŵa ilambo ine atyoche paujo penu, nombe ŵanyamwe chinjigale kuti iŵe yenu, ilambo ya ŵandu ŵajinji ni ŵaali ni machili kumpunda ŵanyamwe. 24 Malo jilijose jichindiŵate kwa sajo syenu chijiŵe jenu; chilambo chose chichijenele kutandilila kwipululu, chakulujenda, mpaka kumatumbi ga ku Lebanoni chakumpoto, kutyochela kulusulo lwa Efulate chakungopochelo lyuŵa, mpaka ku bahali ja Meditelania jajili kulikuswela lyuŵa. 25 Ngapagwa mundu jwalijose juchakombole kunsiŵilila. Malo jilijose jichinjaule nkati chilambo cho, Ambuje Akunnungu, Akunnungu ŵenu, chiŵatendekasye ŵandu kuti anjogope ŵanyamwe mpela iŵatite kulanga."

26 "Nlole, lelo jino ngumpanga nsagule pasikati ja upile ni malweso: 27 Iŵaga tingapilikanichisye makanyo ga Ambuje Akunnungu, Akunnungu ŵenu gingumpanga lelojino chimpate upile; 28 ni iŵaga ngankugapilikanichisya makanyo ga Ambuje Akunnungu, Akunnungu ŵenu, sooni iŵaga nkulileka litala lingunlamulila, ni kujipopelela minungu jine janganinjimanyilila chitandilile kalakala chinnesweche. 29 Ambuje Akunnungu pachanyichisye ku chilambo chinkwaula kuchijigala kuŵa chenu, chinkatangasye upile kutyochela pa litumbi lya Gelisimu, ni malweso kutyochela pa litumbi lya Ebali. 30 Matumbi gaŵili ga gali kumaswelelo lyuŵa kwa lusulo lwa Yolodani, ku chilambo cha Ŵakanaani ŵakutama ku lichemba lya lusulo lwa Yolodani, chiŵandi ni musi wa ku Giligali, ngaŵa kwakutalika ni itela ya mwaloni. 31 Chinjomboche lusulo lwa Yolodani ni kwinjila kuchijigala chilambo ni kuchitenda chiŵe chenu chakumpa Ambuje Akunnungu, Akunnungu ŵenu. Nipele, pachinkatame mu chilambo mo ni kuchitenda chenu, 32 choonde nlolechesye kuti nkugapikanila mashalaiti gose ni malajisyo gingumpa lelo."