1 "Pasikati jenu apagwaga jwaakulondola kwalitala lya sagamisi, ni kunsalila ilosyo ni yakusimosya, 2 kanyuma, ilosyo ni yakusimosya yo yakopochelaga, ni jwakulondola jo ajilaga kuti: ‘Tujikuye minungu jine ni kujitumichila, minungu jinganinjipopelele’, 3 ngasimpikanila maloŵe ga jwele jwakulondola jwakusagamukula sagamisi jo. Pakuŵa Ambuje Akunnungu, Akunnungu ŵenu akunlinga ŵanyamwe kuti aimanye kuti iŵaga nkwanonyela kwa mtima wenu wose ni kwa mbumu jenu jose. 4 Njende nlikwakuya ni kwachimbichisya kwa nnope Ambuje Akunnungu, Akunnungu ŵenu, ni kugakamulisya makanyo gao ni kwajitichisya maloŵe gao; mwatumichile ni kukamulana nao moŵa gose. 5 Nambo Jwakulondola jwakusagamukula kwa litala lya sagamisi jo chaulajikwe, pakuŵa chiiŵe ŵajiganyisye ŵandu ŵakanile Ambuje Akunnungu, Akunnungu ŵenu, ŵaŵankopwesye ku chilambo cha Misili ni kummombola kutyochela mu ukapolo. Jwakulondola jo akusaka nlileche litala lyati Ambuje Akunnungu, Akunnungu ŵenu akusaka nlikuye. Yeleyo ni ichinjile pakuuityosya yachigongomalo pasikati jenu."

6 "Naga mpwenu jwa Lutumbo lumo, pane mwanagwenu jwa chilume pane jwa chikongwe, pane ŵankwenu ŵankwasaka nnope, pane achikudi ŵenu, chanchisye kwa chisyepela alinkuti, ‘Tujaule tukajipopelele minungu jine’, minungu jati mmwe atamuno achachekulu ŵenu ngankujimanyilila, 7 minungu ja ŵandu ŵakunsyngula, pane minungu jine ja ŵandu ŵakutalika kutyochela kuundanda kwa chilambo mpaka kuumbesi kwa chilambo, 8 ngasimwajitichisya, namose kwapikanila pane kwakolela chanasa pane kwalechelela namose kwasisa. 9 Nambo chimwaulaje. Mmwejo chimme ŵaandanda pa kwaulaga, nipele chaakuye ŵandu ŵane. 10 Mwapute ni matupi mpaka awe! Ligongo ŵannyenjile kuti mwaleche Ambuje Akunnungu, Akunnungu ŵenu, uŵankopwese mu ukapolo ku chilambo cha ku Misili. 11 Nipele, Ŵaisilaeli wose chapikane sooni chajogope, ngaatenda yachigongomalo yanti yeleyo."

12 "Pachinkatame mmisi jakumpanga Ambuje Akunnungu, Akunnungu ŵenu, ni mwapikanaga kuti, 13 apali ŵandu ŵakunlyungasya pasikati jenu, akwanyenga ŵandu ŵa mmisi jo achisalaga kuti, ‘Tujaule tukajipopelele minungu jine,’ minungu jingankujimanyilila, 14 nipele nkauchilichisye ni kuimanyilichisya yambone; ni iŵaga ili yaisyene kuti chipali chindu chakuchimikasya chipanganyikwe pasikati jenu, 15 ikusachilwa ŵandu ŵa musi wo aulajikwe kwa upanga chimuujonanje musi wo ni kila chindu chachili mwelemo ni ilango yao yose. 16 Indu yose imwasumwile chimuikumbikanye pamo ni kuiŵika paluŵala lwa musi wo ni chinchichoma mooto nti sadaka sya kutinisya kwa Ambuje Akunnungu, Akunnungu ŵenu; kwa moŵa gangali mbesi, musi wo chiusigalile masame, ni ngautaŵikwa ng'oo. 17 Ngasinjigala chachilichose chachipelechekwe kuchitinisya, kuti Ambuje Akunnungu aleche chisongolo chakwe, ni ammonele chanasa ni kunchuluya nnope mpela iŵatite kwalanjila achachekulu ŵenu. 18 Yeleyo chiikopochele, iŵaga chimwajitichisye Ambuje Akunnungu, Akunnungu ŵenu, ni kugakamulisyaga makanyo gao gose gingumpa lelo jino ga, ni kutenda yaikukundikwa paujo pa Ambuje Akunnungu, Akunnungu ŵenu."