1 "Mu chilambo chitakampe Ambuje Akunnungu, Akunnungu ŵenu, kuti chikaŵe chenu, asimanikwaga mundu aulajikwe ali mwikonde ni ngakumanyika jwammuleje, 2 achakulu ŵenu ni ŵakulamula ajaule ku malo ko ni akalole utaliche wakwe, malo gali mundu jwawile jo ni musi wakuŵandikana ni malo go. 3 Achakulu ŵa wele musi wauli chiŵandi nnope ni malo gagali mundu jwawile ajigale ng'ombe jamwana jankolo, janganijipanganye masengo gagaligose. 4 Ajaule najo ng'ombe jo kwichela kwakuli kasulo kangajumulila, kumalo kunganalimeje namose kupanda mbeju jilijose. Kweleko akajitemangule lukosi ng'ombe jo. 5 Nombe ŵambopesi, ŵele ŵandu ŵa lukosyo lwa Lawi ajaule nawo ku malo go, ligongo Ambuje Akunnungu, Akunnungu ŵenu ŵaasagwile ŵanyawo kuti atumichile ni kwapa upile ŵandu mu liina lyakwe, sooni ni ŵapegwile ukombole wa kulamula magambo gose ga ukangani ni kwagunguluchila ŵane. 6 Achakulu wose ŵa nsinda wauli chiŵandika kwannope ni malo gaali mundu jwawile jo, anaŵanje makono gao pachanya pa ng'ombe jamwana jankolo jajitemangule lukosi kwilambo ko, 7 ni kusala kuti, ‘Ngaŵa uweji ŵatummuleje mundu ju, sooni nganitwamanyilila ŵammuleje. 8 Alakwe Ambuje Akunnungu mwalechelesye ŵandu ŵenu Ŵaisilaeli umwawombwele kutyochela ku Misili. Ntulechelesye uweji, ni ngasintuŵalanjila chileŵo chakummulaga mundu jwangali chileŵo, nambo mwalechelesye chileŵo cho.’ 9 Kwayele, kwakutendekanya yele yakwisaka Ambuje Akunnungu, ngammalanjikwa chileŵo cha maulago ga."

10 Mwajaulaga kungondo kukuputana ni ŵammagongo ŵenu, nombe Ambuje Akunnungu, Akunnungu ŵenu antesyaga mpunde, ni kwakamula ŵandu ŵajinji, 11 jumo jwenu ammonaga jwankongwe jwakusalala pasikati ja ŵandu ŵakamwilwe ku ngondo jwaŵannonyele ni nkusaka kulolemba, nipele alombeleje. 12 Ajaule najo jwankongwe jo kumangwakwe, kweleko akamyole umbo ni kukata ngose syakwe, 13 ni akawule nguo syawasile paŵakamwilwe ku ngondo. Atame mu nyuumba mwekwe mo mwesi wantundu ali nkulila malilo ga achinangolo ŵakwe, ali amasile kulila malilo go, akukombola kunjigala ni kuŵa ŵankwakwe. 14 Nambo aonaga kuti ngaakunsaka sooni jwankongwe jo, anneche ajaule kulikose kuchasache kwaula. Ngaikomboleka mmwe kunsumisya namose kuntendela mpela kapolo, ligongo mwagonile nawo mpela ŵankwenu.

15 Jwannume akolaga achakongwe ŵaŵili, jwine akunnonyela nnope kumpunda jwine, ni wose ŵanaŵaŵili ŵaaŵelechele ŵanache ŵachilume, mwanache jwandanda kupangwa aŵaga jwa jwankongwe jwangakunnonyela nnope, 16 mundu jo katema pakwagaŵila ŵanache ŵakwe chipanje chakwe, akasatenda lusagu pakumpa mwanache jwa jwankongwe jwakunnonyela mbua jajikusachilwa kumpa mwanache jwandanda kupagwa. 17 Akusachilwa ankunde ajula mwanache jwandanda kupagwa kwa jwankongwe jwangannonyela, kwa kungaŵila indu yakungaŵila kaŵili mu indu yakwete, nachiŵamuno ali mwanache jwakupagwa kwa jwankongwe jwangakunnonyela nnope.

18 "Mundu akolaga mwanache jwannume jwali jwamakani jwangapikana, sooni jwakalamuka, jwangaapikanila atatigwe ni achikulugwe atamuno anjamukaga, 19 atatigwe ni achikulugwe mwanache jo ankamule ni kunjausya kwa achakulu ŵa musi wo kunnango wekulungwa wa wele musi wo. 20 Achinangolo asale kwa achakulu wo kuti, ‘Mwanache jwetu ju ali jwamakani ni ngakusaka kutupilikanila, ngakusaka kutupikana. Sooni akunyela kwannope sooni ali jwakolelwa.’ 21 Pelepo ŵandu ŵa musi wo champonye maganga mwanache jo mpaka kuwa. Pakutenda yeleyo chinchilekasya ugongomalo wo pasikati jenu. Ŵaisilaeli wose chapikane ni kogopa."

22 Mundu akolaga ligambo lyalikusachilwa aulajikwe ni kuulajikwa, chiilu chakwe chikolekwe pa chitela, 23 chiilu cho chikagona pachitela po. Achisiche lyuŵa lilyolyo pakuŵa chiilu cha mundu jwaakolekwe pa chitela chikuichisya malweso pa chilambo kutyochela kwa Ambuje Akunnungu. Nkantesya Ambuje Akunnungu achikane chilambo champele kuti chiŵe chenu.