1 "Pachinjaule ku ngondo kukuputana ni ŵammagongo ŵenu, iŵaga nkulola falalsi ni mutuka syasikukwekwelemwa ni falasi ni ŵangondo ŵajinji kwapunda ŵenu, nkaika kogopa. Ligongo Ambuje Akunnungu, Akunnungu ŵenu, juŵankopwesye ku Misili chaŵe pamo ni ŵanyamwe. 2 Nkanitande kuputana ngondo jwambopesi aiche paujo penu ni ŵaasalile ŵangondo kuti, 3 ‘Mwanya ŵangondo ŵa Chiisilaeli mumbilikanile! Lelo nkwaula ku ngondo kukuputana ni ŵammagongo ŵenu. Nkapwa ntima namose nkajogopa, nkatetemela ni nkakamulwa ndengu. 4 Pakuŵa Ambuje Akunnungu, Akunnungu ŵenu chajaule pamo ni ŵanyamwe ni kuputana ngondo ni ŵammagongo ŵenu kwaligongo lyenu ni chakampe kupunda.’ "

5 "Achakulungwa ŵa ŵangondo chiŵaasalile ŵangondo kuti, ‘Uli apali mundu jwataŵile nyuumba sambano ni nganajilimbule? Iŵaga apali apano auje kumangwakwe, ngakaŵa kuulajikwa ku ngondo, ni mundu jwine kujilimbula jele nyuumba jasambano jo. 6 Uli apali mundu jwakwete ngunda wa misabibu ni nganatande kaŵa isogosi yakwe? Iŵaga apali apano auje kumangwakwe, ngakaŵa kuulajikwa ku ngondo ni mundu jwine tasangalalile isogosi yakwe. 7 Uli apali mundu jwatomele jwankongwe ni ali chiŵandi kulombela? Iŵaga apali apano auje kumangwakwe, ngakaŵa kuulajikwa ku ngondo ni mundu jwine kulombela jwele jwankongwe jo.’ "

8 "Sooni achakulungwa ŵa ngondo chajonjechesye kusala nyi, ‘Uli apali mundu jwakogopa pane kupwa ntima? Iŵaga apali apano auje kumangwakwe, ngakaŵa kwatesya woga achinjakwe.’ 9 Achakulungwa ŵa ngondo pachamalisye kukunguluka ni ŵandu, chasagule ilongola ŵa mpingo uli wose ŵa ŵangondo kuti ŵaalongosye."

10 "Pachinjaule chiŵandi ni musi kukuputa ngondo, mwausye iŵaga akuchisaka chitendewele. 11 Akundaga ni kumbugulila milango jakwinjilila mmisi jao, ŵandu ŵaali mwelemo wose chachiŵa achikapolo ŵenu, ni chachimpanganyichisya masengo gakukanganichiswa. 12 Nambo iŵaga ŵandu ŵa musi wo akukana chitendewele, ni akusagula yakumenyana ngondo, nipele chimuusyungule wele musi wo ni kuuputa. 13 Iŵaga Ambuje Akunnungu, Akunnungu ŵenu akunkamuchisya kwapunda ŵandu ŵa musi wo, nkaaulaje achalume wose ŵaali mwelemo. 14 Nambo achakongwe ni ŵanache ni ilango ni kila chindu chachili mwelemo nkajigale kuti iŵe yenu. Nkaisagalalile indu yosepe ya ŵammagongo ŵenu yele yampele Ambuje Akunnungu, Akunnungu ŵenu. 15 Yeleyo ni ichinchitenda kwa misi jinajose jajili kwakutalichila ni chilambo chichinchitenda chenu."

16 "Nambo pachinjigale misi ja chilambo chakumpa Ambuje Akunnungu, Akunnungu ŵenu kuti chiŵe chenu, nkaulaje kila chindu. 17 Nkamale kwaulaga Ŵahiti, ni Ŵaamoli ni Ŵakanaani ni Ŵapelisi ni Ŵahivi ni Ŵayebusi mpela Ambuje Akunnungu, Akunnungu ŵenu iŵatite pakunnajisya. 18 Mwaaulaje ŵanawose akaika kunjiganya indu yao yauchimwa yakuipanganya paakujipopelela minungu jao jachilendo ni kuntesya mme ŵandu ŵangakulupilichika kwa Ambuje Akunnungu, Akunnungu ŵenu."

19 "Pachimmusyungule musi pa kujiputa ngondo, choonde nkaigwisya itela yakusogola isogosi. Ligongo itela yo nganiiŵa ŵammagongo ŵenu ni sooni ŵanyamwe komboleka kulya isogosi yakwe, kwapele nkaikata itela yo. 20 Nkukombola kukata itela yangaŵa ya isogosi ni kupanganyichisya makwelelo ga palikumba, ni indu ine yakutendela masengo pakuputa ngondo mu musi unkulimbana nao mpaka msumwile."