1 Che Musa ŵajendelechele kuŵecheta kuti, "Ngumpanga nsagule, pasikati ja upile ni malweso. Indu yele yose pachiityochele kukwenu, kwakulikose kuchimme ku chilambo kutampwilinganye Ambuje Akunnungu, Akunnungu ŵenu, nipele nkumbuchileje chindu chakusagula. 2 Iŵaga mmwe ni iŵelesi yenu chimwaujilile Ambuje Akunnungu, Akunnungu ŵenu, kwa mitima jenu jose ni kupilikanichisya malajisyo gakwe ganampele lelojino, 3 pele Ambuje Akunnungu, Akunnungu ŵenu, tachinkolela chanasa ni tachimmusya kutyochela mu ilambo ine, kwele kuŵampwilingenye ko, ni kuntesya indu yenu injendechele yambone sooni. 4 Nachiŵamuno ampwilingenye malo gakutalichila nnope mu chilambo, Ambuje Akunnungu, Akunnungu ŵenu tansonganganye kutyochela kweleko ni kummusya. 5 Tachimmusya ku chilambo chichaliji cha achatati ŵenu ni mmwe chinchitende chenu. Tachintenda indu yenu injendechele yambone kwannope ni kuntenda mme achajinji kwapunda achatati ŵenu. 6 Ambuje Akunnungu, Akunnungu ŵenu, tachintenda ŵanyamwe ni iŵelesi yenu nkole mitima ja kumpilikanichisya kuti munnonyele kwa mitima jenu jose ni kwa mbumu jenu jose, nkole umi. 7 Ambuje Akunnungu, Akunnungu ŵenu tagatesye malwesyo gose ga gaasimane ŵammagongo ŵenu ŵaŵannagasisye. 8 Chimmuje ni kwapilikaniichisya Ambuje Akunnungu ni kugakamula malajisyo gakwe gose gingunlajisya lelojino. 9 Ambuje Akunnungu, Akunnungu ŵenu tantende injendelechele yambone mu kila chindu chinkuchipanganya; tinkole ŵanache achajinji ni ng'ombe syasijinji, ni migunda jenu chijityosye magungulo gamajinji. Pakuŵa tiyaanonyele sooni kuntenda nkole mboka mpela iŵatite kunonyelwa kwapa mboka achatati ŵenu, 10 chinkole mboka iŵaga chimwapilikanichisye Ambuje Akunnungu, Akunnungu ŵenu, ni kugakamulisya makanyo ni malajisyo gakwe gagalembekwe mu chitabu chi, ni kwagalauchila Ambuje Akunnungu, Akunnungu ŵenu kwa mtima ŵenu wose ni kwa mumbu jenu jose."

11 "Malajisyo gangumpa lelo jino ganigaŵa gakulimba kukwenu ni nganigaŵa kwakutalika ni ŵanyamwe. 12 Nganigaŵa kwinani kwati njile, ‘Ŵaani ŵatakwele kwaula kwinani kutujigalila, aiche kutusalila kuti tujitichisye?’ 13 Namose nganigaŵa peesi ja bahali kwati njile, ‘Ŵani tajomboche bahali kwaula kutujigalila aiche kutusalila, kuti tujitichisye?’ 14 Ngwamba, liloŵe lili chiŵandi ni ŵanyamwe, lili mukang'wa syenu ni mmitima jenu kuti nkombole kwitichisya."

15 "Mpilikane, lelojino ngumpa nsagulanje, indu yambone pane yangalumbana ni chiwa pane umi. 16 Iŵaga chingajitichisye makanyo ga Ambuje Akunnungu, Akunnungu ŵenu gingumpa lelojino, mwaanonyelaga Ambuje Akunnungu, Akunnungu ŵenu ni kulikuya litala lyakwe ni kugakamula malajisyo gakwe ni makanyo ni mashalaiti gakwe, chinkole umi ni kuŵa achajinji ni Ambuje Akunnungu, Akunnungu ŵenu tachimpa upile mu chilambo chichinjinjile ni kuchitenda chenu. 17 Nambo iŵaga chinlyungasikwe ni kukana kumpilikanichisya, ni kuntesya kujipopelela minungu jine ni kujitumichila, 18 ngunsalila lelo jino, kusyene chinjonasikwe. Ngantamilisya yaka yejinji ku chilambo chinkwaula kuchitenda chenu, kwele peesi kwa lusulo lwa Yolodani. 19 Lelojino ngusiŵilanga kwinani ni chilambo iŵe ŵaumboni pasikati jetu, kuti nampele kusagula pasikati ja umi pane chiwa, ni upile pane malweso. Nipele nsagule umi kuti nkole umi, mmwe ni uŵelesi wenu. 20 Munnonyele Ambuje Akunnungu, Akunnungu ŵenu ni kulipilikanichisya liloŵe lyakwe ni kukamulangana nawo. Pakuŵa Ambuje Akunnungu, ali umi wenu, ni tachimpa yaka yejinji kuti ntame mu chilambo chiŵalanjile kwapa achachekulu ŵenu, che Ibulahimu ni che Isaka ni che Yakubu."