1 Nipele che Musa ŵajendelechele kwasalila Ŵaisilaeli, 2 achitiji, "Sambano une ngwete yaka mia moja na ishilini, ngangombola sooni kunlongosya, ni Ambuje Akunnungu asalile nganyomboka lusulo lwa Yolodani. 3 Ambuje Akunnungu, Akunnungu ŵenu, talongolele mbujo mwenu, taajonanje ŵandu ŵa ilambo ine ŵakutama kweleko kuti mjigale chilambo chao chiŵe chenu. Che Yoshua taŵe chilongola ŵenu mpela yatite Ambuje Akunnungu. 4 Nombe Ambuje Akunnungu tiŵatendele ŵandu wo nti iŵatendele che Sihoni ni che Ogu, mamwenye ŵa Ŵaamoli pamo ni chilambo chao. 5 Ambuje Akunnungu chantendekasye mwapunde, ni ŵanyamwe chimwatendele mpela indite kunlajisya. 6 Nlimbangane ni kukola ntima wangajogopa, nkakola lipamba namose kwajogopa, pakuŵa Ambuje Akunnungu, Akunnungu ŵenu tachiŵa pamo ni ŵanyamwe ngaaleka kunkamusyanga ni nganjasanga."

7 Nipele che Musa ŵammilasile che Yoshua ni kunsalila mbujo mwa Ŵaisilaeli wose, "Nlimbangane ni kukola ntima wangajogopa, pakuŵa mmwe ni uchimwalongosye ŵandu ŵa kwaula kukuchijigala chilambo chati Ambuje Akunnungu ŵaalanjile achachekulu ŵao, ni mmwe chimwagaŵile chilambo cho kuti chiwe chao. 8 Ambuje Akunnungu ni utachinnongosya nombe taŵe pamo ni ŵanyamwe, ngaaleka kunkamuchisyanga namose kunjasa, nkajogopa namose kupwa ntima."

9 Nipele che Musa ŵalembile lilajisyo lyo ni kwapa ŵambopesi ŵa lukosyo lwa Lawi, uŵajigalaga Lisanduku lya Lilangano lya Ambuje Akunnungu pamo ni achakulu wose ŵa Chiislaeli. 10 Che Musa ŵalajisye achitiji, "Kumbesi kwa kila chaka cha saba chichiŵe chaka chakulechelesya magambo, pa lyuŵa lyekulungwa lya Chindimba cha Masakasa, 11 Katema Ŵaisilaeli wose paakwika paujo pa Ambuje Akunnungu, Akunnungu ŵenu, peuto patapasagule, mwasyomele Ŵaisilaeli wose malajisyo ga. 12 Mwasonganganye pamo achalume wose ni achakongwe ni ŵanache wose pamo ni achalendo ŵakutama mmisi jenu, kuti apikanile ni kulijiganya kwachimbichisya Ambuje Akunnungu, Akunnungu ŵenu, ni kupilikanichisya mkuipanganya yose yaili mu chitabu cha malajisyo chi. 13 Kwanti yele iŵelesi yenu yangaikumanyilila malajisyo ga apilikane ni kulijiganya kwachimbichisya Ambuje Akunnungu, Akunnungu ŵenu, mmoŵa gose gachinchitama mu chilambo chinkwaula kuchijigala ni kuŵa chenu kwele pesi kwa lusulo lwa Yolodani."

14 Nipele Ambuje Akunnungu ŵansalile che Musa, "Mpilikane, lyuwa lya chiwa chenu liŵandichile. Mumilanje che Yoshua nkaiche nao mu Hema takatifu liuto lichinape malajisyo ga masengo." Nipele, che Musa ni che Yoshua ŵajawile ku Hema Takatifu. 15 Nipele Ambuje Akunnungu ŵaichilile mwelemo kutyochela mu luchanamila lwa liunde lulwajimi pa nnango wa kwinjilila mu Hema.

16 Ambuje Akunnungu ŵansalile che Musa, "Nnole mmandichile kuwa ni pachimmwe ŵandu chaaneche une ni kujijaulila minungu jine ja mwele mu chilambo mwakwaula kutama. Chaaneche une ni kulitema lilangano lyangu linaŵisile pamo ni ŵanyawo. 17 Pachatende yeleyo, chinaatumbilile ni kwaleka nombewo tajonasiche. Tilyaichilile limbulunga ni masausyo gamajinji, kwika mwakumanyilila kuti indu yi ikwasimana pakuŵa une Akunnungu ŵao nganima pamo ni ŵanyawo. 18 Chingane kwakamusya ŵanyawo sooni pakuŵa andendele ugongomalo ni kujipopelela minungu jine."

19 "Sambano nlembe lujimbo lu, mwajiganye Ŵaisilaeli ni kwalajisya alujimbe lujimbo lu kuti luŵe umboni kukwangu nkati Ŵaisilaeli. 20 Pachimale kwajinjisya mu chilambo chachajila chachikufai kwa kulima ni kulanga nti inalanjile achachekulu ŵao, ŵanyawo patachilya ni kwikuta ni indu yao kwajendelela yambone, tajigalauchile minungu ja chilendo ni kijipopelela, chaneche une ni kulitema lilangano lyangu. 21 Patilyasimane limbulunga ni masausyo, pele lujimbo lu ngaluliŵalikwa mu iŵelesi yao, chiluŵe nti umboni kukwao. Ngunaŵe kwajinjisya mu chilambo chinaalanjile, ngusimanyilila nganisyo syawo."

22 Nipele che Musa ŵalembile lujimbo lula lyuŵa lilalila ni kwajiganya Ŵaisilaeli.

23 Nipele Ambuje Akunnungu ŵaalajisye che Yoshua mwana ju che Nuni, ni ŵansalile "Mme jwakulimbangana ni jwangajogopa, pakuŵa chimwalongosye Ŵaisilaeli ku chilambo chinalanjile kwa kulumbila kwapa, none chinjiŵa pamo nomwe."

24 Che Musa paŵamasile kulemba mu chitabu maloŵe ga malajisyo go kutandilila kundanda mpaka kumbesi, 25 ŵasalile ŵambopesi ŵaŵaliji Ŵalawi ŵaŵajigalaga Lisanduku lya Lilangano lya Ambuje Akunnungu, 26 "Nchijigale achi chitabu cha Lilajisyo chi nkachiŵiche mumbali mwa Lisanduku lya Lilangano lya Ambuje Akunnungu, Akunnungu ŵenu. Chitameje pelepo nti umboni kukwenu. 27 Pakuŵa ngummanyilila intite kuŵa ŵakugalaukagalauka ni ŵamakani. Iŵaga nganimunjitichisya Ambuje Akunnungu katema kanaliji jwanjumi pamo ni mmwe, chiiŵe uli pachinjiwa une? 28 Mwasonganganye paujo pangu achakulu wose ŵa ngosyo syenu ni ŵakamusi ŵenu wose, kuti mechete maloŵe ga agapikane, ni kwinani ni chilambo iŵe ŵaumboni. 29 Pakuŵa nguimanyilila kuti pakumala chiwa changu usyene chimme ŵachigongomalo ni kulileka litala linanlajisye kulikuya. Mmoŵa gagakwika chilinsimane limbulunga pakuŵa chintende chigongomalo paujo pa Ambuje Akunnungu ni kuntumbilisya kwa ipanganyo yenu."

30 Che Musa ŵagasasile maloŵe ga lujimbo lula paujo pa nsongangano wa Ŵaisilaeli wose.