1 "Ambuje Akunnungu, Akunnungu ŵenu, pachanyichisye ku chilambo chinkwaula kuchijigala, chiŵatopole ŵandu ŵa ilambo ine kuti atyoche muchilambo mo. Pachinkajinjile mu chilambo mo, chiŵatopole paujo penu ŵandu ŵa ilambo saba yaikulungwa yaili ni machili kumpunda ŵanyamwe: Ŵahiti ni Ŵagiligashi ni Ŵaamoli ni Ŵakanaani, ni Ŵapelizi ni Ŵahivi ni Ŵayebusi. 2 Nombe, Ambuje Akunnungu, Akunnungu ŵenu, patankombolesye kwapunda ŵandu wo, nkusachilwa kwaulaga ŵanawose, nkatenda lilangano ni ŵanyao namose kwakolela chanasa. 3 Nkalombana nawo, atamuno nkaalombekasya achiŵali ŵenu atamuno achachanda ŵenu akalombela achiŵali ŵao. 4 Mwatendaga yeleyo chiŵalyungasye ŵanache ŵenu anaapopelele Ambuje Akunnungu, chiŵatendekasye ajipopelele minungu jine, yeleyo chiyachimikasye Ambuje Akunnungu, nombewo chanjonanje kwakwanguya. 5 Nambo mwapanganyichisye nnyi: Ngumulanje ilisa yao ya maganga, ni nsikate njanamila sya nnungu Ashela ni kuichoma mooto inyago yao. 6 Nkatende yeleyo pakuŵa ŵanyamwe nli ŵandu ŵa Ambuje Akunnungu, Akunnungu ŵenu, ansagwile ŵanyamwe kutyochela pasikati ja ŵandu wose ŵa pachilambo kuti mme ŵandu ŵakwe."

7 "Ambuje Akunnungu, nganannonyela ni nganansagula ŵanyamwe pakuŵa ntupile kwapunda ŵandu ŵane; ŵanyamwe mwaliji ŵandu kanondi kusipunda ngosyo syose sya pachilambo. 8 Nambo Ambuje Akunnungu ŵannonyele ŵanyamwe ni kuchitindimisya chilumbilo chiŵachiŵisile kwa achachekulu ŵenu, lyelelyo ni ligongo ŵankulupwisye ŵanyamwe kwa ukombole wao wekulu, ni kunkoposya mu ukapolo kwa mwenye jwa ku Misili. 9 Nipele, nkumbuchileje kuti Ambuje Akunnungu, Akunnungu ŵenu, ni jwali Akunnungu jikape; sooni ali Akunnungu ŵakukulupilichika, jwakugosa lilangano lyakwe sooni akulosya chanasa kwa iŵelesi yejinji ya ŵandu ŵakunnonyela ni kukamulichisya makanyo gakwe. 10 Nambo ŵandu ŵakwachima chiŵaalipe yaikusachilwa, ni ngaaleka kwajamuka kwakwajonanga ŵakwachima. 11 Kwayele ndilolechesye kugakamulisya makanyo, mashaliti ni malajisyo ganampele lelo jino."

12 "Iŵaga tingakamulichisye malajisyo ga, Ambuje Akunnungu, Akunnungu ŵenu, talitindimisye lilangano lyakwe ni kwendelechela kunnonyela ŵanyamwe mpela muŵaalumbiliile achachekulu ŵenu. 13 Tachinnonyela ni kumpa upile, ni ŵanyamwe chimmeleche ŵanache achajinji; chachipeleka upile mmigunda jenu kuti mpate magungulo, divai ni mauta; sooni tachimpa upile kwa kumpa ng'ombe ni ngondolo yejinji. Chachimpa indu yoseyo pachinkajinjile kuchilambo chiŵalumbilile achachekulu ŵenu kuti champe ŵanyamwe. 14 Chimpate upile kwapunda ŵandu ŵane wose pachilambo. Pasikati jenu ngaapagwa jwannume namose jwankongwe jwangaŵeleka, namose ngachipagwa chilango chachilichose changachiŵelaka. 15 Ambuje Akunnungu chaityosye ilwele yaili yose yakogoya pasikati jenu mpela iyampatile kwele ku Misili ko, nambo Ambuje Akunnungu tachiipeleka ilwele yo kwa ŵammagongo ŵenu. 16 Nkaaulaje ŵandu ŵa chilambo chachilichose chichantesye Ambuje Akunnungu, Akunnungu ŵenu mwapunde; nkaaonela chanasa. Ngasinjipopelela minnungu jao, pakuŵa yeleyo chichiŵe chitanji kukwenu."

17 "Ngasindiusyausya mmitima jenu, ‘Ŵanduŵa atupile kutupunda uwe, chitukombole chinauli kwatopola pachilambo?’ 18 Ngasimwajogopa. Nkumbuchile aila Ambuje Akunnungu, Akunnungu ŵenu, yaitesile kwa mwenye jwa ku Misili pamo ni ŵandu ŵakwe wosepe. 19 Nkumbuchile iputiko ya kogoya imwalionele, ilosyo ni yakusimosya, ni machili gamakulungwa ni ukombole wekulu, iŵaitesile Ambuje Akunnungu, Akunnungu ŵenu kuti antyosye ku Misili. Yeleyi ni itajile pakwapanganyichisya ŵandu ŵankwajogopa. 20 Kupunda yele, Ambuje Akunnungu, Akunnungu ŵenu, taichenawo matendeu pasikati jao mpaka ŵandu ŵachantoloche kuti alijuŵe ajonasikwe. 21 Nipele, ngasimwajogopa ŵandu ŵa, pakuŵa Ambuje Akunnungu, Akunnungu ŵenu, ali pasikati jenu, ŵelewo ali Akunnungu ŵakulu ni ŵakogoya. 22 Ambuje Akunnungu, Akunnungu ŵenu, chiŵatopole ŵandu ŵa ilambo ine kanondikanondi pankwaula mmbujo. Ngankombola kwajonanga wose kwanakamo, ligongo mwatendaga yeleyo inyama ya mwitinji chiitupe ni kunjogopasya. 23 Nambo Ambuje Akunnungu, Akunnungu ŵenu, chankombolesye kwapunda ŵammagongo ŵenu, chiŵaatende achenjeuche, kumbesi ko chajonasiche. 24 Chimwapunde mamwenye ŵao. Chimwaulaje, nombe chaaliŵalikwe. Ngapagwa mundu jwalijose juchakombole kunkanya, mpaka pachimwajonanje ŵanawose. 25 Nkaitinisye inyago ya minungu jao ni mooto. Ngasimmilila mata madini ga feza atamuno sahabu syao, ngasinjigala ni kusitenda kuŵa syenu, mwatendaga yeleyo chiŵe chitanje kukwenu, ni ŵanyamwe chimwachimikasye Ambuje Akunnungu, Akunnungu ŵenu. 26 Nkajigala indu yaikunchimikasya Ambuje Akunnungu mmajumba mwenu, nkaika kulweseka mpela indu yo. Nkusachilwa kuichima ni kuinyelusya indu yo pakuŵa Ambuje Akunnungu ailwesisye."