1 "Ŵanyamwe Ŵaislaeli mpikane! Lelo jino mmandichile komboka lusulo lwa Yolodani, ni kwaula kukuijigala ilambo yaili ni ŵandu ŵajinji ni ŵaali ni machili kumpunda ŵanyamwe. Misi jao jili jekulungwa ni jana makumba galewipe mpaka mwinani. 2 Ŵandu ŵakwe ali ŵaleu ŵaali ni machili; ŵa uŵelesi wa Ŵaanaki! Mpela inkuti kwamanyilila ni yantite kwapika ŵandu achiŵechetaga kwalumba ŵanyawo kuti, ‘Ŵani ŵachakombole kuputana nawo?’ 3 Nipele nyimanyilile lelo kuti Ambuje Akunnungu, Akunnungu ŵenu channongolele mmbujo nti mooto waukutinisya itela. Ŵelewo chiŵajonanje ŵanyao ni kwaputa paujo penu. Kwayele chimwatopole ni kwajonga kwanakamo, mpela Ambuje Akunnungu iŵatile kunlanjila."

4 "Ambuje Akunnungu, Akunnungu ŵenu pachamale kunkamuchisya kwatopola ŵandu ŵa ilambo yo, nkalisalila mmitima mwenu kuti, ‘Ambuje Akunnungu atujinjisye mu chilambo chi ligongo uweji tuli ŵandu ŵatukupanganya yaikwanonyelesya Akunnungu.’ Ngwamba, Ambuje Akunnungu chiŵatopole ŵandu wo ligongo ali ŵachigongomalo. 5 Chinkombole kuchitenda chenu chilambo cho ngaŵa kuti nli ŵandu ŵambone pane nkupanganya yaikwanonyelesya Akunnungu, nambo Ambuje Akunnungu, Akunnungu ŵenu, akwatopola ŵandu wo paujo penu ligongo ali ŵandu ŵachigongomalo ni akusaka kulitindimisya chilumbilo chiŵaalumbilile achachekulu ŵenu, che Ibulahamu, ni che Isaka ni che Yakubu. 6 Nipele, mmanyilileje kuti Ambuje Akunnungu, Akunnungu ŵenu akumpa chilambo chachili ni chajila, ngaŵa kuti nkuŵajilwa, ngwamba, pakuŵapo ŵanyamwe nli ŵandu ŵa makani."

7 "Nkumbuchile ni ngasindiŵalila imwatite kwachimikasya Ambuje Akunnungu, Akunnungu ŵenu, kulipululu kula. Pakuŵa kutandilila lyuŵa lila limwakopweche ku Misili mpaka lyuŵa limwaiche pelepa, ŵanyamwe mmele ŵandu unkwagalauka Ambuje Akunnungu. 8 Namose patwaliji ku chitumbi cha Holebu kula, mwachimisye kwannope Ambuje Akunnungu, mpaka ŵasachile kunjonanga. 9 Panakwesile ku chitumbi kwaula kupochela maganga gagasepekwe mpela ibao yelembekwe lilangano liŵatesile Ambuje Akunnungu ni ŵanyamwe, naatemi kweleko moŵa alobaini, muusi ni chilo, nganilyaga atamuno kung'wa chachilichose. 10 Nipele Ambuje Akunnungu ŵambele ibao iŵili ya maganga yelembekwe ni chala cha Akunnungu; yelembekwe makanyo gose gaŵansalilenje Ambuje Akunnungu kulitumbi kutyochela pa mooto pa lyuŵa lya nsongangano. 11 Pakumala moŵa alobaini go, muusi ni chilo Ambuje Akunnungu ŵambele ibao iŵili ya maganga ilembekwe lilangano."

12 "Nipele, Ambuje Akunnungu ŵasalile kuti, ‘Ntuluche mwitumbi muno chitemachitema, pakuŵa ŵandu ŵenu umwalongwesye kutyoka ku Misili ŵala alyungasiche. Alesile kwachitema litala linaalamwile alikuye, ni kulikolochesya chinyago cha sahabu chakusyana.’"

13 "Sooni Ambuje Akunnungu ŵasalile, ‘Naweni ŵandu ŵa, ali ŵandu ŵamakani nnope. 14 Nneche najonanje, ni kwatyosya wose akamanyika pachilambo chose. None chinantende mmwe kuŵa atati jwa ŵandu achajinji ŵaali ni machili ni chinanchuluye kwapunda ŵanyawo.’"

15 "Nipele, nagalawiche, natulwiche kutyochela kuchitumbi, ndili nyigele ibao iŵili ya maganga yelembekwe lilangano, nombe chitumbi chaliji nkukolela mooto. 16 Panalolite, naiweni kuti ntesile sambi kwa Ambuje Akunnungu, Akunnungu ŵenu; mwamasile kulikolochesya chinyago chakusyana cha ng'ombe ja mwana ja sahabu; kwachitema mwalesile kutenda iŵatite kulajisya Ambuje Akunnungu. 17 Nipele, paujo penu naiponyisye paasi ibao iŵili ila, naitemangwile nli nkulola. 18 Nipele nagonile manguku paujo pa Ambuje Akunnungu, mpela inatesile kundanda, natesile yeleyo kwa moŵa alobaini muusi ni chilo; nganilya chakulya atamuno ni kung'wa meesi, ligongo lya ugongomalo umwautesile paujo pao Ambuje Akunnungu ni kwachimikasya. 19 Najogwepe lutumbilo lwekulungwa lwa Ambuje Akunnungu kukwenu, ligongo ŵantumbilile kwika mwakunjonanga; nambo kaaŵili Ambuje Akunnungu ŵambikanile sooni. 20 Nombe, ni ŵaatumbilile nnope che Aluni kwanti kwajonanga; nambo nampopelele che Haluni kwa Ambuje Akunnungu ŵakululuchile katema kakoko. 21 Achila chindu cha sambi, yaani ajila ng'ombe ja mwana ja sahabu jimwajisyanile, nachijichigele nachitinisye pa mooto, najipondilepondile ni kujisyagasyaga, jaliji mpela luundu lwakwepepala; ni nalusajile nnusulo lwalukwilimisya mesi cha kwichela pa litumbi lyo."

22 "Iyoyopeyo mwaatumbilikesye Ambuje Akunnungu, Akunnungu ŵenu ku Tabela, ni ku Masa ni ku Kibuloti Hataava kula. 23 Ni katema Ambuje Akunnungu kaŵantumile kuti ntyoche ku Kadeshi Balinea ŵatite, ‘Njaulangane nkachijigale chilambo chingumpa kuti chiŵe chenu,’ nganimwapilikanila; nganimwakulupilila ni sooni mwakanile kugapanganya gaŵansalile. 24 Ŵanyamwe nli ŵandu unkwagalauka Ambuje Akunnungu chitandilile lyuŵa linammanyilile."

25 "Kwayele une naligwisisye manguku paujo pa Ambuje Akunnungu moŵa alobaini, muusi ni chilo, pakuŵa Ambuje Akunnungu ŵatite chanjonanje. 26 Une naapopesile Ambuje Akunnungu njitiji, ‘Alakwe Ambuje Akunnungu, ngasimwajonanga ŵandu ŵenu umwasagwile ŵa, ŵandu umwawombwele ni kwakoposya ku chilambo cha ku Misili kwa ukombole ni machili genu gamakulungwa. 27 Mwakumbuchile achikatumetume ŵenu, che Ibulahimu, ni che Isaka, ni che Yakubu, choonde nkagalola makani ni igongomalo ni sambi sya ŵandu ŵa. 28 Ŵandu ŵa akula ku Misili kumwatutyosisye tachiŵecheta kuti, Ambuje Akunnungu alepele kwajinjisya Ŵaisilaeli ku chilambo chiŵaalanjile, sooni tajile kuti ŵaakopwesye ŵandu ŵao kuti ŵaulaje mu lipululu, pakuŵa ŵachimile. 29 Pakuŵapo aŵa ali ŵandu ŵenu mwasyene, ŵandu umwakopwesye ku Misili kwa ukombole wenu wekulungwa.’"