1 "Mundu alombelaga jwankongwe ni kunleka pakuŵa achiweni chindu changakuchisaka kwa jwankongwe jo, anlembelega talaka ni kwapa ni kwaŵinga atyoche mu nyuumba jakwe, 2 pakumala kutyoka alombwaga ni jwannume jwine, 3 nombe jwannume jwaaŵili jo anchimaga jwankongwe jo ni kunlembela talaka ni kwapa ni kwaŵinga atyoche mu nyuumba jakwe, pane jwannume jo ajasikaga, 4 pelepo ajula jwannume jwaandanda jula ngakusachilwa kulombela jwankongwe jo kaaŵili ligongo ngakukundikwa paujo pa Ambuje Akunnungu. Kutenda yeleyo nkwachima Ambuje Akunnungu. Nkaikanasyo sambi pa chilambo chakumpa Ambuje Akunnungu, Akunnungu ŵenu kuti chiŵe chenu."

5 "Mundu alombelaga mwasambano akajaula ku ngondo atamuno ngasimwapa masengo gane galigose. Mwaleche atame pamusi kwa chaka chimo ni kwanonyelesya ŵankwankwe."

6 "Mundu jwalijose akajigala lisyago pane ngasi kuŵa chikole, kutenda yeleyo chimme njigele indu yakukolochesya chakulya kuti alame."

7 "Mundu akamulwaga ali nkunjigala Mwisilaeli njakwe ni kuntenda nti kapolo, pane kunsumisya ku ukapolo mundu jo aulajikwe. Kwakutenda yeleyo chinchilekasya ugongomalo wo pasikati jenu."

8 "Mundu alwalaga matana, mpanganye mpela igakuti kusala malajisyo ga ŵambopesi ŵaali Ŵalawi. Ngakuye kwakulilolechesya malajisyo ginaapele ŵanyawo. 9 Nkumbuchilanje achila Ambuje Akunnungu, Akunnungu ŵenu chiŵampanganyichisye che Miliamu pimwaliji mwitala kutyochela ku Misili."

10 "Pankunkongosya njenu chilichose, nkajinjila mu nyuumba jakwe kuti nkajigale chikole. 11 Nlindilileje paasa, mundu jumunkongwesye jo aiche nacho kukumpa nsyene chikole cho. 12 Iŵaga mundu jo ali jwakulaga, nkatama najo nguo jakuliunichila chilo nti chikole. 13 Nchiusye kwa asyene lyuŵa likanaŵe kutula kuti aliunichile ni kunsachila upile. Pelepo Ambuje Akunnungu, Akunnungu ŵenu tachiŵa ŵakusengwa ni mmwejo."

14 "Nkannyenga jwamasengo jwenu jwakulaga ni jwakusaka ukamuchisyo, aŵeje Mwisilaeli njenu pane jwannendo jwakutama mmusi umo mwa misi jenu. 15 Munlipe malipilo gakwe lyuŵa lilyolyo lyuŵa likanaŵe kutula, ligongo jwelejo ali jwakulaga ni malipilo gagogo akugakulupilila muntima mwakwe. Iŵaga ngankunlipa tachinlilila Ambuje Akunnungu, nomwe tinchikola chileŵo cha sambi."

16 "Achinangolo akaulajikwa kwaligongo lya ileŵo ya ŵanache ŵao, iyoyo peyo ŵanache akaulajikwa kwaligongo lya ileŵo ya achinangolo ŵao. Mundu jwalijose aulajikwe kwaligongo lya ileŵo yakwe nsyene."

17 "Nkatendekasya achalendo pane ŵamalekwa, kulepela kupata yakusachilwa kupata atamuno nkajigala chakuwala cha jwankongwe jwawililwe ni ŵankwakwe kuŵa chikole. 18 Nkumbuchileje yakuti mwanya mwaliji achikapolo ku chilambo cha Misili, sooni kuti Ambuje Akunnungu, Akunnungu ŵenu ŵammombwele ntyoche kweleko. Lyelelyo ni ligongo nampele mwanya lilajisyo li."

19 "Pankugungula magungulo mmigunda mwenu, mwaliŵalilaga magungulo gane, nkauja kukujigala. Mwalechelanje achalendo, ni ŵamalekwa ni achakongwe ŵawililwe ni achiŵankwawo kuti Ambuje Akunnungu, Aunnungu ŵenu ampe upile mmasengo genu gose. 20 Pankukaŵa isogosi ya seituni mu migunda jenu, nkaujila sooni kaaŵili kukaŵa. Nneche syasisigele syo kwaligongo lya achalendo ni ŵamalekwa ni achakongwe ŵawilile ni achiŵankwawo. 21 Pankukaŵa sabibu mu ngunda mwenu nkauja sooni kaaŵili kukukaŵa. Nneche syasisigele syo kwaligongo lya achalendo ni ŵamalekwa ni achakongwe ŵawililwe ni achiŵankwawo. 22 Nkumbuchile yakuti mwanya mwaliji achikapolo ku chilambo cha ku Misili. Lyelelyo ni ligongo nampele mwanya lilajisyo li."