1 Che Musa ŵaŵilasile pamo Waislaeli, ŵaasalile, "Ŵanyamwe Ŵaisilaeli, mpilikane makanyo ni malajisyo gangugasala paujo penu lelojino. Nlijiganye gelego ni kwiwona kuti nkugajitichisya. 2 Ambuje Akunnungu, Akunnungu ŵetu, ŵatesile lilangano ni uwe ku litumbi lya Holebu. 3 Nganatenda lilangano lyo ni achachekulu pe, nambo ŵatesile ni uwe wose ŵatuli ni umi lelojino. 4 Ambuje Akunnungu ŵaŵechete ni ŵanyamwe nli nkulolegana kutyochela pa mooto pa ku litumbi. 5 Katema ko najimi pasikati ja ŵanyamwe ni Ambuje Akunnungu, nansalilenje iŵaisasile, pakuŵa ŵanyamwe mwaujogwepe moto ula ni nganinkwela kulitumbi."

"Ambuje Akunnungu ŵatite, 6 ‘Une ndili Ambuje Akunnungu, Akunnungu ŵenu, junankopwesye kuchilambo cha ku Misili, kumwaliji achikapolo.’"

7 " ‘Ngasinjipopelela minungu jine ikaŵe une pe.’"

8 " ‘Ngasindikolochesya inyago ya minungu, atamuno malinga ni chindu chachilichose chachili kwinani, atamuno chachili pasi pachilambo, atamuno chachili mmesi paasi chilambo.’" 9 Ngasinyikotamila atamuno kuipopelela; pakuŵa une Ambuje Akunnungu, Akunnungu ŵenu, ndili Akunnungu jundi ni wiu. Ngwajamuka wananche kwaligongo lya sambi sya achatati ŵao, mpaka uŵelesi waatatu ni wancheche wa ŵaakunjima. 10 Nambo ngulosya unonyelo wangu kwa maelufu ga iŵelesi yaikunonyela ni kugakamulichisya malajisyo gangu.

11 " ‘Nkalikolanga liina lya Ambuje Akunnungu ŵenu iyiyipeyi, pakuŵa une ndili Ambuje Akunnungu ngaaneka kunjamuka jwalijose jwakulitumia liina lyangu kwa nningwa wangalumbana.’"

12 " ‘Nlikamulisye Lyuŵa lya Kupumulila ni kulitenda lyuŵa lyo liŵe kwaligongo lya Ambuje Akunnungu mpela une Ambuje Akunnungu, Akunnungu ŵenu inguti kunnajisya. 13 Moŵa sita mpanganye masengo genu gose. 14 Nambo pa lyuŵa lya saba lili Lyuŵa lya Kupumulila kwaligongo lya Ambuje Akunnungu ŵenu. Pa lyuŵa lyo nkapanganya masengo gagaligose, namose mwanagwenu, atamuno mwali jwenu, namose kapolo jwenu jwannume pane jwankongwe, atamuno ng'ombe jwenu, namose mbunda jwenu, atamuno chinyama chenu chachilichose, namose jwannendo jwakutama pamalo penu, kuti kapolo jwenu jwannume ni jwankongwe nombe apumulile mpela yankuti kupumulila mmwe.’" 15 Nkaliŵalila kuti mmwejo mwaliji kapolo ku chilambo cha ku Misili, none Ambuje Akunnungu, Akunnungu ŵenu, nankopwesye kwa machili ni ukombole wangu wekulu. Nipele une Ambuje Akunnungu, Akunnungu ŵenu nannamulile kuti nlikamulisye Lyuŵa lya Kupumulila.

16 " ‘Mwachimbisye atati ŵenu ni achikulu ŵenu, mpela uneji Ambuje Akunnungu, Akunnungu ŵenu indite pakunnamulila. Ntende yeleyo kuti ntame moŵa gamajinji ni indu yenu injendelechele yambone pachilambo chingumpanga.’"

17 " ‘Nkaulaga.’"

18 " ‘Nkatenda chikululu.’"

19 " ‘Nkajiŵa.’"

20 " ‘Nkapeleka umboni wa unami nkati njenu.’"

21 " ‘Nkammilila mata jwankongwe jwa njenu. Kasinnajila nyuumba ja mundu jwaali chiŵandi ni mmwe pane ngunda wakwe, namose kapolo jwakwe jwannume pane jwankongwe, namose ng'ombe jakwe pane mbunda jakwe, atamuno chindu chilichose chakwete.’"

22 "Aga ni maloŵe gati Ambuje Akunnungu ŵaasalile nsongangano wenu wose kwa liloŵe lyakunyanyisya kopochela pa mooto ni liunde ŵii ni chipi totolo, ni nganajonjechesya malajisyo gane. Nipele ŵagalembile mu ibao iŵili ya maganga iyasepekwe ni kuumba une."

23 "Pamwapilikene liloŵe lyo lili nkutyochela mu chipi, litumbi lilinkukolela mooto, ilongola wose ŵa ngosyo syenu ni achachekulu ŵanyichilile une. 24 Ŵatite, ‘Mpilikane! Ambuje Akunnungu, Akunnungu ŵetu, atulosisye kung'alima kwakwe ni ukulu wakwe; tupilikene liloŵe lyao lili nkutyochela pasikati ja mooto ula. Lelo twaweni Akunnungu alinkuŵecheta ni mundu, nombe mundu nganawa ŵajendelechele kuŵa jwanjumi. 25 Nambo kwachichi tuliŵiche mu chakogoya chachikuichisya chiwa, aula mooto wekulungwa chituulaje. Twalipikanaga sooni liloŵe lya Ambuje Akunnungu, Akunnungu ŵetu, kusyene chituwe. 26 Uli, mundu chi juŵampilikene Akunnungu ŵajumi achiŵechetaga kutyochela pasikati mooto mpela yatutite kwapikana uwe, nombejo wasigalile ŵajumi? 27 Mbaya mmweji che Musa njaule nkaŵandichile, nkaipikanile yose ichakaiŵechete Ambuje Akunnungu, Akunnungu ŵetu, nipele njise kutusalila indu yose ichansalile. Uweji chituipilikanichisye ni kuijitichisya.’"

28 "Ambuje Akunnungu ŵagapilikene maloŵe genu. Ŵasalile ‘Mbilikene maloŵe gaansalile ŵandu ŵa; gose gaasasile gali gambone. 29 Ikaŵe ŵana nganisyo mpela asino akanjimbichisyenje ni kugakamulichisya malajisyo gangu gose katema kose! Indu yao yosepe ikajendelechele chenene ŵanyao achimisyene ni uŵelesi wao moŵa gose pangali mbesi. 30 Njaule nkaasalile aujangane mmasakao mwao. 31 Nambo mmwe che Musa nsigale apano ni une; kuti nampe makanyo gose, mashalaiti ni malajisyo gatimwajiganye kuti agakuye, ku chilambo chingwapa chiŵe chao.’"

32 "Ŵanyamwe ŵandu ŵa ku Isilaeli ndilolesyesye nkaipanganye mpela Ambuje Akunnungu ŵenu yatite kunnajisya; mpanganye kila chindu kwa uchenene. 33 Mgakuye aila yose yalajisye Ambuje Akunnungu, Akunnungu ŵenu, kuti indu yenu injendelechele yambone ni nkombole kutama ndaŵi syejinji pa chilambo chachinjigale chiŵe chenu."