1 Nipele, che Musa ŵatyosile ku chiŵata cha ku Moabu, mpaka ku chitumbi cha Nebo, ni ŵakwesile mpaka ku lusonga lwa litumbi lya Pisiga lwaluŵandichile ku Yeliko. Pelepo Akunnungu ni paŵaalosisye chilambo chosepe: Kutandilila ku Gileadi mpaka kumpoto kusyene kwa musi wa Dani; 2 Chilambo chosepe cha Nafutali, ni ilambo yosepe ya Efulaimu ni chilambo chose cha Manase, ni chilambo cha Yuda mpaka ku Bahali ja Meditelania; 3 sooni ŵannosisye ukweti wa ku Negebu ni malo ga lichemba lya ku Yeliko, musi waugumbele itela yaikuŵilanjikwa mitende, mpaka ku Soali. 4 Nipele Ambuje Akunnungu ŵansalile che Musa, "Chilambo chi ni chinaalanjile che Ibulahimu, ni che Isaka ni che Yakubu kuti chinaape uŵelesi wao. Nannosisye, nambo mmwe ngankuika kweleko."

5 Nipele, che Musa jwakwatumichila jwa Ambuje Akunnungu ŵawilile pelepo kuchilambo cha ku Moabu, mpela Ambuje Akunnungu iŵatite kuŵecheta. 6 Ambuje Akunnungu ŵansichile kulichemba lya ku Moabu, lyaliŵandichile ku musi wa Besi Peoli; nambo mpaka lelo jino ngali ŵapamanyi peuto pasyene paasiichikwe. 7 Yaka yose iŵatemi che Musa yaliji mia moja ni ishilini, nipele ŵawile; ŵaliji chiŵela ni machili, ni meso gao galiji chiŵela alinkulola. 8 Ŵaisilaeli ŵalisile malilo gakwe moŵa selasini kuchiŵata cha ku Moabu. Nipele ŵamyalele kulila ni ŵajanukwile mataanga.

9 Che Yoshua mwanache ju che Nuni ŵagumbele ntima wa luunda kwannope, pakuŵa che Musa ŵansagwile jwelejo. Ŵaisilaeli ŵampikanile che Yoshua ni kugakuya malajisyo ga Ambuje Akunnungu gaŵampele che Musa.

10 Kutandilila pelepo, paliji pangali jwakulondola mu Isilaeli mpela che Musa, juŵaŵechetaga ni Ambuje Akunnungu meso ni meso. 11 Pangali jwakulondola jwine juŵatesile ilosyo ni yakusimosya mpela yele Ambuje Akunnungu iŵasalile che Musa kuti aitende pameso pa mwenye jwa ku Misili, pamo ni ŵakamusi ŵakwe ni ŵandu ŵa mu chilambo mwakwe. 12 Pangali jwakulondola jwine juŵatesile indu yaikulungwa ni yakogoya mpela iŵaitesile che Musa paujo pa Ŵaisilaeli wosepe.