1 Che Musa jwakutumichila jwa Ambuje Akunnungu paŵajasiche, Ambuje Akunnungu ŵansalile che Yoshua mwana jwannume ju che Nuni, nkamusi jwa che Musa kuti, 2 "Jwakutumichila jwangu che Musa ajasiche. Sambano nliŵiche chile mmwe ni Ŵaisilaeli wose, njombochanje lusulo lwa Yolodani njaulangane mpaka ku chilambo chachingampe kuti chiŵe chenu. 3 Malo gagaligose gachingaliŵate chigaŵe genu mpela inatite pakwasalila che Musa. 4 Mipika jenu chijityochele ku chipululu chakulujenda, chakumpoto chijiŵe itumbi ya ku Lebanoni, ni chakungopochelo lyuŵa chijiŵe lusulo lwekulungwa lwa Efulate, ni chakumaswelelo lyuŵa chijiŵe chilambo chose cha Ŵahiti mpaka ku bahali ja Meditelania. 5 Mmwe che Yoshua, ngapagwa juchampunde mmwe mmoŵa gose ga umi wenu. Tinjiŵa ni mmwe moŵa gose mpela munaŵelele ni che Musa. Ngasinanliŵalila namose ngasinanneka ng'oo. 6 Nlimbangane ni kukola ntima wangajogopa, pakuŵa mmwe chimwalongosye ŵandu ŵa akachijigale chiŵe chao, chilambo chinaalumbilile achatati ŵao kuti chinaape. 7 Kwayele, nlimbangane ni kukola ntima wangajogopa, nlilolechesye kuti nkupilikanichisya Malajisyo gose gaŵampele jwakutumichila jwangu che Musa. Nkaleka kupilikanichisya malajisyo gagali gose mwa gelego gannajisye ni indu yose chiinjendele yambone mose mutinjaule. 8 Nkaleka kugasala aga maloŵe ga chitabu cha Malajisyo ga, nambo ngaganisye kila lyuŵa, muusi ni chilo kuti mpanganye yalumo ni yailembekwe mu chitabu chi. Mwatendaga yeleyo indu yenu chiinjendele yambone ni chimme ŵakusichila mu yose inkuitenda. 9 Nkumbuchile kuti une nanlamwile mmwejo kuti nlimbangane ni kukola ntima wangajogopa. Nkajogopa namose kupwa ntima, pakuŵa une Ambuje Akunnungu, Akunnungu ŵenu, ndili ni mmwe kose kutinjaule."

10 Nipele che Yoshua ŵaalamwile ilongola ŵa ŵandu achitiji, 11 "Njaulangane ku chigono chose nkaasalile ŵandu, ‘Nlinganye yakulya, pakuŵa pakumala moŵa gatatu tinjomboche lusulo lwa Yolodani ni kwaula kuchijigala chilambo chaakumpanga Ambuje Akunnungu, Akunnungu ŵenu kuti chiŵe chenu.’"

12 Che Yoshua ŵaasalile ŵandu ŵa ngosyo sya Lobeni ni Gadi ni nusu ja lukosyo lwa Manase kuti, 13 "Nkumbuchile iŵansalile che Musa jwakutumichila jwa Ambuje Akunnungu, ŵansalile ŵanyamwe kuti, Ambuje Akunnungu, Akunnungu ŵenu, tachimpa malo gakupumulila, nombewo tachimpa chilambo chi. 14 Achiŵankwenu ni ŵanache ŵenu pamo ni ilango yenu chasigale apano mu chilambo chati che Musa ŵampele ŵanyamwe, chakungopochelo lyuŵa kwa lusulo lwa Yolodani. Nambo ŵangondo ŵenu ali ajigele yakumenyanilana, talongolele komboka mbujo mwa Ŵaisilaeli achinjao kuti waakamusye, 15 mpaka patapatanje malo gao gakupumulila, mu chilambo cha kumaswelelo lyuŵa kwa lusulo lwa Yolodani, chilambo chati Ambuje Akunnungu, Akunnungu ŵenu akwapa ŵanyawo mpela iŵatite pakumpa ŵanyamwe. Nipele chimmuje kukutama mu chilambo chenu chati che Musa jwakutumichila jwa Ambuje Akunnungu ŵampele ŵanyamwe cha kungopochelo lyuŵa kwa Yolodani."

16 Ŵandu ŵanjanjile che Yoshua, "Chitutende yose intulamwile ni tutujaule kose kuchintulajisye. 17 Uweji chitumpikanile mmwe mpela itwampilikanilaga che Musa. Ambuje Akunnungu, Akunnungu ŵenu aŵe pamo ni mmwe nti iŵaliji pamo ni che Musa! 18 Jwalijose jutagakane malajisyo genu pane kukana kupilikanichisya maloŵe genu, pane chachilichose chichimwalamulile, aulajikwe. Nlimbangane ni kukola ntima wangajogopa."