1 Che Yoshua ni Ŵaisilaeli wose ŵajimwiche kundaŵipe, ŵautandite ulendo kutyoka ku Shitimu, ŵajesile mpaka ku lusulo lwa Yolodani, ŵachiŵisile chigono pelepo achilindililaga komboka. 2 Pakumala moŵa gatatu ilongola wo ŵaapitile pa chigono chila chose, 3 ŵaasalile ŵandu, "Mwawonaga ŵambopesi Ŵalawi ajigele Lisanduku lya Lilangano lya Ambuje Akunnungu, Akunnungu ŵenu, ntyochanje mmalo genu ni kulikuya. 4 Pachinlikuye chinlimanyilile litala pakuŵa nganimpiteje mwele, nambo nkaliŵandichila Lisanduku lya Lilangano lyo, nneche lipesa mpela mita elufu moja."

5 Che Yoshua ŵaasalile ŵandu ŵala, "Nliŵiche chile kwa kulitenda ŵakukundikwa pa kwapopelela Akunnungu, pakuŵa malaŵi Ambuje Akunnungu taitendekanye yakusimonjeka pasikati jenu." 6 Nipele ŵaasalile ŵambopesi anyakule Lisanduku lya Lilangano ni kulongolela nalyo paujo pa ŵandu. Nombewo ŵalijigele ni kulongolela nalyo paujo pa ŵandu.

7 Ambuje Akunnungu ŵansalile che Yoshua, "Lelo jino chindande kuntenda jwankulu paujo pa Ŵaisilaeli wose amanyilile kuti ndili pamo ni mmwe mpela inatite kuŵa pamo ni che Musa. 8 Mwasalile ŵambopesi ŵakulijigala Lisanduku lya Lilangano, pataiche ku lusulo lwa Yolodani ni kwinjila mmesi, ajime chiŵandi ni mungulugulu mwa lusulo."

9 Che Yoshua ŵaasalile Ŵaisilaeli, "Njise akuno kumpilikane maloŵe ga Ambuje Akunnungu, Akunnungu ŵenu." 10 Che Yoshua ŵajendelechele kwasalila, "Kwa chindu chi chinnyimanyilile kuti Akunnungu ŵajumi ali pamo ni ŵanyamwe ni ngasaleka kwatyosya mbujo mwenu Ŵakanaani ni Ŵahiti ni Ŵahifi ni Ŵapelisi ni Ŵagiligashi pamo ni Ŵaamoli ni Ŵayebusi. 11 Nnole Lisanduku lya Lilangano lya Ambuje Akunnungu ŵa chilambo chose liŵandichile kunnongolela kwaula ku lusulo lwa Yolodani. 12 Sambano mwasagule achalume likumi ni ŵaŵili mu ngosyo sya Isilaeli, kila lukosyo mundu jumo. 13 Katema makongolo ga ŵambopesi ŵaajigele Lisanduku lya Lilangano lya Ambuje Akunnungu ŵa chilambo chose, pachigaliŵate mmeesi ga lusulo lwa Yolodani, pelepo meesi ga Yolodani, gagakwilima chigaleche kwilima. Ni agala meesi gatigajilime kutyochela kulutando tigajime ni kuŵa nti likumba."

14 Kwayele ŵandu ŵatyosile pachigono pala kuti ajomboche lusulo lwa Yolodani, ŵambopesi ŵalongolele akuno ali ajigele Lisanduku lya Lilangano. 15 Kele katema ko kaliji katema ka magungulo ni lusulo lwa Yolodani lwaliji lusewiche pakuŵa lukuseukaga katema ko. Ŵambopesi ŵaŵajigele Lisanduku lya Lilangano paŵakuiche ku lusulo ni makongolo gawo pagaliŵete pe mmeesi, 16 meesi gagajilimaga kutyochela kulutando galesile kwilima ni kwima nti likumba ni gajenele mpaka ku musi wa ku Adamu, musi wauli chiŵandi ni musi wa ku Saletani. Ni meesi gagajilimilaga ku Alaba, yaani bahali ja Njete nombego gajumwile ni ŵandu ŵajombweche kwaula ku Yeliko. 17 Katema Ŵaisilaeli paŵajombogaka, ŵambopesi ŵaŵajigele Lisanduku lya Lilangano lya Ambuje Akunnungu ŵajimi papajumu pasikati ja lusulo lwa Yolodani, mpaka ŵandu wosepe paŵamasile komboka.