1 Minango jakwinjila musi wa ku Yeliko jaugalikwe chamunkati kuti Ŵaisilaeli akajinjila. Nganapagwa namose jumo juŵakopweche pane kwinjila mmusi mo. 2 Nipele Ambuje Akunnungu ŵansalile che Yoshua, "Nnole, ngumpa machili ga kuupunda musi wa Yeliko pamo ni mwenye jwakwe ni ŵangondo ŵakwe. 3 Mmwe ni ŵandu ŵenu ŵa ngondo ŵaali ni yakumenyanilana nsyungule musi wo, kamo pe pa lyuŵa kwa moŵa sita. 4 Ŵambopesi saba kila mundu ali ajigele lipenenga lyakwe lya msengo wa ngondolo jankambaku chalongolele mbujo mwa Lisanduku lya Lilangano. Palyuŵa lya saba tinsyungule musi wo mala saba, kila jwambopesi achigombaga lipenenga lyakwe. 5 Nipele pachagombe kwa machili mapenenga gao go, ni ŵandu wose pachapikane kusona kwa mapenenga go anyanyisye kwannope, nipele likumba lya musi chiligwe paasi. Pelepo ŵandu ajinjile munkati kila mundu kutyochela peuto pajimi."

6 Pelepo che Yoshua mwana ju che Nuni ŵaaŵilasile ŵambopesi ni kwasalila, "Njigale Lisanduku lya Lilangano, sooni ŵambopesi ŵane saba ajigale mapenenga saba ga misengo ja ngondolo syankambaku, alongolele mbujo mwa Lisanduku lya Lilangano lya Ambuje Akunnungu." 7 Ni ŵasalile ŵandu, "Njaule mbujo nkausyungule musi, nombe ŵandu ŵaali ni yakumenyanilana alongolele mbujo mwa Lisanduku lya Lilangano lya Ambuje Akunnungu."

8 Che Yoshua paŵaŵechete ni ŵandu, aŵala ŵambopesi saba ŵakujigala mapenenga saba ga misengo ja ngondolo syankambaku mbujo mwa Ambuje Akunnungu ŵalongolele achigombaga mapenenga gawo, ni Lisanduku lya Lilangano lya Ambuje Akunnungu lichikuyaga panyuma pao. 9 Aŵala ŵandu ŵaŵajigele yakumenyanilana ŵaalongolele aŵala ŵambopesi ŵaŵagombile mapenenga ni ŵandu ŵane ŵakuiye panyuma pa Lisanduku lya Lilangano, akuno ali nkugomba mapenenga pangaleka. 10 Nambo che Yoshua ŵaakanyisye ŵandu kuti, "Nkanyokonya namose likapikanika liloŵe atamuno nkaŵecheta chachilichose, mpaka lyuŵa litinjinsalila kuti nnyokonye, pelepo ni patinnyokonye kwa kunyanyisya." 11 Nipele, che Yoshua ŵaalajisye ŵandu ŵala ajigale Lisanduku lya Lilangano lya Ambuje Akunnungu, ni kuusyungula musi ula kamo ni kuuja kukugona pachigono.

12 Kundaŵi kwakwe che Yoshua ŵajimwiche kundaŵipe, ni ŵambopesi ŵalijigele Lisanduku lya Lilangano lya Ambuje Akunnungu. 13 Ŵambopesi saba ŵala ŵajigele mapenenga saba ga misengo ja tonde sya ngondolo, ŵalongolele mmbujo mwa Lisanduku lya Ambuje Akunnungu akuno alinkugagomba mapenenga. Ŵandu ŵaŵajigele yakumenyanilana ŵalilongolele Lisanduku lya Lilangano lya Ambuje Akunnungu ni ŵakulindilila ŵalikuyaga chapanyuma, akuno ŵambopesi achigombaga mapenenga. 14 Pa lyuŵa lyaaŵili ŵasyungwile musi wo kamo ni kuuja kuchigono. Ŵatesile yele mmoŵa gose sita. 15 Lyuŵa lya saba ŵajimwiche kuninkucha ŵausyungwile musi ula mpela iŵatendaga. Nambo pa lyuŵa lyo ŵausyungwile musi ula mala saba. 16 Paŵasyungwile kaasaba, ŵambopesi paŵagombaga mapenenga, che Yoshua ŵaasalile ŵandu kuti, "Nnyokonye kwa kunyanyisya, pakuŵa Ambuje Akunnungu ampele ŵanyamwe musi wu! 17 Musi ni yose yaili mwelemo chiityochekwe kwaligongo lya Ambuje Akunnungu kwa kuijonanga. Nambo che Lahabu jwachigwagwa jula ni wose ŵaali mu nyuumba jakwe chalame. Pakuŵa ŵaasisile ŵakuuchilichisya utwatumile ŵala. 18 Nambo ŵanyamwe nliŵambasye ni indu yachityochekwe kwa ligongo lya Ambuje Akunnungu, kuti nkaliichisya uwonasi kwa kujila chachilichose mu yeleyo. Mwajigalaga chimpatende pachigono pa Ŵaisilaeli pajonasikwe ni kuliichisya malagasyo mwachinsyene. 19 Nambo mbiya syose ni sahabu pamo ni yombo ya madini ga shaba ni isyano ikusachilwa ityosyekwe kwa ligongo lya Ambuje Akunnungu ni ikusachilwa kuŵichikwa mu mbiko ja Ambuje Akunnungu."

20 Mapenenga pagagombilwe ŵandu ŵanyanyisye, kwa liloŵe lya mapenenga ni kunyanyisya kwa ŵandu, likumba lya musi lyagwile. Kwayele kila mundu ŵajendelechele mmbujo kutyochela paŵajimi ni kwinjila mmusi ni kuujigala musi. 21 Ŵaijonasile kwa lipanga indu yose iyaliji mmusi ula, achalume ni achakongwe, achachanda ni achachekulu pamo ni ng'ombe ni ngondolo ni mbunda.

22 Che Yoshua ŵaasalile ŵakuuchilichisya ŵaŵili ŵaŵauchilichisye chilambo chila, "Njaulangane ku nyuumba ja jwachigwagwa jula nkaaiche nawo pamo ni achalongo achinjakwe nti imwatite pakwalumbilila." 23 Nipele ŵakuuchilichisya ŵala ŵapite kwatyosya che Lahabu ni achinangolo ŵakwe ni ŵandu wose ŵamu nyuumba jao. Nombe ŵaatyosisye achalongo ŵakwe wose ni kwaŵika paasa chiŵandi ni pachigono cha Ŵaisilaeli. 24 Nipele ŵauchomile musi ula ni yose iyaliji mwemula, ikaŵe feza ni sahabu ni yoombo ya shaba pamo ni ya isyano ŵaiŵisile mu mbiko ja mu nyuumba ja Ambuje Akunnungu. 25 Nambo che Yoshua ŵaalesile ŵajumi, che Lahabu jwachigwagwa jula ni achalongo ŵakwe wose ni indu iŵakwete. Nombejo akutama pasikati ja Ŵaisilaeli mpaka lelo jino pakuŵa ŵaasisile ŵakuuchilichisya ŵaŵatumikwe ni che Yoshua kukuuchilichisya ku Yeliko.

26 Che Yoshua ŵalumbile nnyi, "Mundu jwalijose juchautaŵe sooni musi wa Yeliko wu, alwesekwe ni Akunnungu.

Mundu jwalijose jutaŵiche nsingi wa musi wo, mwanache jwakwe jwannume jwa kwitiwo ajasiche.

Mundu jwalijose jutaŵiche nnango wa musi wo, mwanache jwakwe jwachiwango ajasiche."

27 Kwayele Ambuje Akunnungu ŵaliji pamo ni che Yoshua, ngani si che Yoshua syajenele mu chilambo chose.