1 Ŵaisilaeli wose paŵamasile komboka lusulo lwa Yolodani, Ambuje Akunnungu ŵansalile che Yoshua, 2 "Mwasagule ŵandu likumi ni ŵaŵili pasikati ja Ŵaisilaeli, kila lukosyo asagulikwe mundu jumo, 3 nkaalajisye ajigale maganga likumi ni gaŵili kutyochela pasikati ja lusulo lwa Yolodani, apala paajimi ŵambopesi, agajigale ni kugaŵika pamalo pachingone lelo jino."

4 Che Yoshua ŵaaŵilasile ŵandu likumi na ŵaŵili ŵaŵasagwile ŵala kutyochela mu mpingo wa Ŵaisilaeli kila lukosyo mundu jumo, 5 nombejo ŵaasalile, "Nlongolele mbujo mwa Lisanduku lya Lilangano lya Ambuje Akunnungu, Akunnungu ŵenu mpaka pambindikati ja lusulo lwa Yolodani. Kila jumo jwenu ajigale liganga pekoyo pakwe, liganga limo kwa lukosyo lumo lwa Ŵaisilaeli. 6 Maganga go chigaakumbuchisye ŵandu indu iŵantendele Ambuje Akunnungu. Mmoŵa gagakwika ŵanache ŵenu patachimmusya kuti aga maganga ga malumbo gakwe chichi? 7 Pelepo timwajanje kuti, ‘Katema Lisanduku lya Lilangano lya Ambuje Akunnungu paŵalijombosyaga pa lusulo lwa Yolodani, meesi gajimi ni nganigajilima!’ Kwayele maganga ga chigaŵe chikumbuchisyo kwa Ŵaisilaeli moŵa gose pangali mbesi."

8 Kwayele Ŵaisilaeli ŵatesile mpela iŵalajiswe ni che Yoshua. Ŵagajigele maganga likumi ni gaŵili pambindikati ja lusulo lwa Yolodani, kila liganga limo kwa lukosyo lumo lwa Ŵaisilaeli, mpela Ambuje Akunnungu iŵatite pakwalajisya che Yoshua, ŵagajigele ni kugajausya pamalo paŵagonile lyuŵa lyo ni kugatula pelepo. 9 Nipele che Yoshua ŵagapanjile maganga gane likumi ni gaŵili pambindikati ja lusulo lwa Yolodani, apala peuto pati ŵajimi ŵambopesi ŵaŵalijigele Lisanduku lya Lilangano lila. Maganga go gali papopo mpaka lelo jino.

10 Ŵambopesi ŵaŵalijigele Lisanduku lya Lilangano ŵajimi palapala pambindikati ja lusulo lwa Yolodani mpaka ŵandu paŵamasile kuitendekanya yose, yati Ambuje Akunnungu ŵalamwile che Yoshua kuti ŵaasalile ŵandu aitende, malinga ni malajisyo ga che Musa gaŵapele che Yoshua. Nipele ŵandu ŵajombweche lusulo kwakwanguya. 11 Papopo ŵandu wose paŵajombweche, pelepo ŵambopesi ŵajombweche ni Lisanduku lya Lilangano lila, ŵandu ali nkwalolechesya kwakutalichila. 12 Nombe achalume ŵa lukosyo lwa Lobeni ni lwa Gadi pamo ni nusu ja lukosyo lwa Manase ŵajombweche mbujo mwa Ŵaisilaeli ali ajigele yakumenyanilana mpela iŵatite kusala che Musa. 13 Ŵangondo nti elufu alobaini ŵaŵajigele yakumenyanila ya pa ngondo, ŵajombweche mbujo mwa Ambuje Akunnungu chiŵandi ni iŵata ya musi wa ku Yeliko chile kwa ngondo. 14 Lyele lyuŵa lyo Ambuje Akunnungu, ŵantesile che Yoshua aŵe jwankulu paujo pa Ŵaisilaeli wose, ni che Yoshua ŵachimbichikwe ni ŵanyawo mu umi wakwe wose mpela iŵanchimbichisyaga che Musa.

15 Ambuje Akunnungu ŵansalile che Yoshua kuti, 16 "Mwasalile ŵambopesi ŵakulijigala Lisanduku lya Lilangano atyoche mu lusulo lwa Yolodani." 17 Nipele, che Yoshua ŵaalamwile ŵambopesi ŵala, "Ayaga ntyokangane mu lusulo lwa Yolodani mo." 18 Ŵambopesi ŵaŵalijigele Lisanduku lya Lilangano lya Ambuje Akunnungu lila paŵamasile komboka lusulo ni kupaliŵata papajumu mungulugulu lusulo, meesi ga mu lusulo lwa Yolodani gatandite kwilima sooni ni gasewiche mpela iyaliji kundanda. 19 Pa lyuŵa lya likumi lya mwesi waandanda, Ŵaisilaeli ŵajombweche lusulo lwa Yolodani ni kuchiŵika chigono ku Giligali, chakungopochelo lyuŵa kwa Yeliko. 20 Pelepo che Yoshua ŵagajimiche maganga likumi na gaŵili gaŵagajigele ku lusulo lwa Yolodani gala ku Giligali ko. 21 Nipele che Yoshua ŵaasalile Ŵaisilaeli, "Mmoŵa gagakwika iŵelesi yenu patachausya achatati ŵao achitiji, ‘Maganga ga malumbo gakwe ichichi?’ 22 Nipele chinchaasalila kuti ‘Ŵaisilaeli ŵajombweche alu lusulo lwa Yolodani lu pamalo papajumu. 23 Pakuŵa, Ambuje Akunnungu, Akunnungu ŵenu, ŵagajumwisye meesi ga lusulo lwa Yolodani kwa ligongo lyenu mpaka pamwamasile komboka mpela iŵatutendele uweji pakugajumusya meesi, mu bahali ja Shamu. 24 Ŵatesile yele kuti ŵandu wose ŵa pachilambo aimanyilile kuti Ambuje Akunnungu ali ŵa machili ni kuti ŵanyamwe mwachimbichisye Ambuje Akunnungu, Akunnungu ŵenu moŵa gose pangali mbesi.’"