1 Nipele che Yoshua ŵasongangenye ŵandu ŵa ngosyo syose sya Isilaeli ku Shekemu ko. Ŵaŵilasile achachekulu, ni ilongola ni ŵakulamula ni ŵakamusi ŵa ku Isilaeli, nombe ŵanyawo ŵaiche paujo pa Akunnungu. 2 Che Yoshua ŵaasalile ŵandu wose, "Ambuje Akunnungu, Akunnungu jwa Ŵaisilaeli akuti yeleyi, ‘Kalakala ko, achachekulu ŵenu ŵatemi pesi lusulo lwa Efulate, ni kujipopelela minungu jine. Jwanchekulu jumo ŵaŵilanjikwe che Tela atati ŵao che Abulahamu ni che Naholi. 3 Une Akunnungu ŵenu naakopwesye ambuje ŵenu che Abulahamu kutyochela pesi ja lusulo Efulate ko ni kwaichisya pa Kanaani pano, kunapele uŵelesi wejinji. Naapele che Isaka, 4 ni che Isaka naapele che Yakubu ni che Esau. Che Esau naapele chilambo cha matumbi cha ku Seili kuti gaŵe gawo. Nambo che Yakubu ni wanache ŵakwe ŵapitenje ku Misili. 5 Nipele naalajisye che Musa ni che Haluni, ni kwapelechela ŵandu ŵa ku chilambo cha ku Misili iputiko, ni kanyuma nankopwesye ŵanyamwe mu chilambo mo. 6 Naakopwesye achachekulu ŵenu kutyochela ku Misili ni kwaichisya mpaka ku bahali ja Shamu, Ŵamisili ŵaakuiye ali ni mutuka syakukwekwelemwa ni falasi ni ŵandu ŵangondo ŵaakwesile falasi. 7 Nambo Ŵaisilaeli paŵaandilile une Ambuje Akunnungu achisakaga ukamuchisyo, nachiŵisile chipi pasikati pao ni Ŵamisili, najitesile bahali jaaunichile Ŵamisili. Ŵanyamwe mwanchinsye nkuimanyilila inaatesile Ŵamisili.

" ‘Mwatemi moŵa gamajinji nnope mu ukweti. 8 Nipele nannongwesye mpaka ku chilambo cha Ŵaamoli ŵaŵatamaga kungopochelo lyuŵa kwa lusulo lwa Yolidani. Ŵaputene ni ŵanyamwe, nambo une nantendekasisye mwapunde ŵanyawo, naajonasile ni ŵanyamwe mwachijigele chilambo chao. 9 Nombe che Balaki mwana ju che Sipoli, mwenye jwa ku Moabu, paŵaliŵisile chile kuputana ni Ŵaisilaeli, ŵaalaliche che Balaamu mwana ju che Beoli kuti aiche kukunlwesya ŵanyamwe. 10 Nambo une nganinapikanila che Balaamu, nombejo ŵampele upile kwannope, none nankulupwisye ŵanyamwe kutyoka ku che Balaki. 11 Nipele mwajombweche lusulo jwa Yolodani, mwaiche ku Yeliko. Ŵandu ŵa ku Yeliko ŵaaputene ni ŵanyamwe, mpela iŵatesile Ŵaamoli ni Ŵapelisi ni Ŵakanaani ni Ŵahiti ni Ŵagiligashi, Ŵahivi ni Ŵayebusi. Une nantendekasisye mwapunde ŵanyawo. 12 Naapeleche paujo penu matendeu, ŵaatopwele mamwenye ŵaŵili ŵa Ŵaamoli. Nganinjigala mapanga atamuno mikunje jenu kuti mwapunde ŵandu wo. 13 Nampelenje chilambo chati migunda jakwe nganinlima, ni misi janganinjitaŵa mwankutama sambano mu ni kulya isogosi ya misabibu ni miseituni syanganimpanda.’ "

14 Che Yoshua ŵajendelechele kuŵecheta kuti, "Sano, mwachimbichisye Ambuje Akunnungu ni kwatumichila kwa ntima wambone ni wakukulupilichika. Njileche minungu jiŵajipopelelaga achachekulu ŵenu peesi ja lusulo lwa Efulate ni kuchilambo cha ku Misili. Mwatumichile Ambuje Akunnungu pe. 15 Naga ngankusaka kwatumichila Ambuje Akunnungu, nipele, nsagule lelo jino ŵaani uchimwatumichile. Naga ajila minungu jiŵajitumichilaga achachekulu ŵenu peesi ja lusulo lwa Efulate, pane minungu ja Ŵaamoli ŵankutama nchilambo chao. Nambo une ni nyuumba jangu, chitwatumichile Ambuje Akunnungu."

16 Pelepo ŵandu ŵajanjile, "Ngatukombola kwaleka Ambuje Akunnungu ni kwaula kujitumichila minungu jine. 17 Pakuŵa, Ambuje Akunnungu, Akunnungu ŵetu ni ŵaŵatukopwesye uweji pamo ni achachekulu ŵetu ku chilambo cha ku Misili kutwaliji achikapolo, twalionele indu yakusimosya iŵaitesile. Ŵatugosile mu ulendo ŵetu wose, ni pasikati ja ŵandu ŵa ilambo yose mutwapitile pambindikati jao. 18 Kila patwajaulaga mmbujo, Ambuje Akunnungu ŵaatopwele ŵandu ŵa ilambo yose, pamo ni Ŵaamoli ŵaŵatemi mu chilambo mo. Kwayele, nowe chitwatumichile Ambuje Akunnungu, pakuŵa ali Akunnungu ŵetu."

19 Nambo che Yoshua ŵaasalile ŵandu, "Ŵanyamwe ngankukombola kwatumichila Ambuje Akunnungu, pakuŵa ŵelewo ali Akunnungu Ŵaswela. Ŵelewo ali Akunnungu ŵaali ni wiu, nombewo ngasannechelesya ugongomalo wenu ni sambi syenu. 20 Naga chimwaleche Ambuje Akunnungu ni kujitumichila minungu ja chilendo, tachingalauchila, ni kunjamuka ni kunnyichisya limbulunga litilinjonanje, natamuno ŵantendele indu yambone kundanda ko."

21 Nombe ŵandu ŵanjanjile che Yoshua, "Ngwamba! Uweji chitwatumichile Ambuje Akunnungu."

22 Nipele che Yoshua ŵaasalile, "Ŵanyamwe mwachinsyene nkusala chachili muntima mwenu kuti nsaagwile kwatumichila Ambuje Akunnungu."

Nombe ŵanyawo ŵajanjile, "Elo, yeleyo ni itusasile."

23 Nombejo ŵaasalile, "Nipele njityosye minungu ja chilendo jajili pasikati jenu, mwakuye Ambuje Akunnungu, Akunnungu ŵa Ŵaisilaeli kwa mitima jenu."

24 Pelepo ŵandu ŵaasalile che Yoshua, "Chitwatumichile ni kwapilikanichisya Ambuje Akunnungu, Akunnungu ŵetu."

25 Kwayele, che Yoshua ŵatesile lilangano ni Ŵaisilaeli ku Shekemu ko, ŵaapele makanyo ni malajisyo ga kugakuya. 26 Che Yoshua ŵagalembile maloŵe gose mu chitabu cha malamusi ga Akunnungu. Ŵalijigele liganga lyekulungwa ni kulijimika kuusi chitela cha mwaloni chiŵandi ni lisakasa lya Ambuje Akunnungu. 27 Che Yoshua ŵaasalile ŵandu wose, "Liganga li ni lichiliŵe jwaumboni jwetu, pakuŵa lipilikene maloŵe gose gaatusalile Ambuje Akunnungu. Kwayele, chiliŵe jwaumboni pa ŵanyamwe iŵaga timme ŵaunami kwa Akunnungu ŵenu." 28 Nipele che Yoshua ŵaalanjile ŵandu atyokangane, ni ŵanyawo ŵajawile kila mundu ku malo kwapegwilwe kuŵa pakwe.

29 Pakumala indu yo, che Yoshua jwakutumichila jwa Ambuje Akunnungu, juŵaliji mwana ju che Nuni ŵawile ali ni yaka mia moja na kumi. 30 Ni ŵandu ŵansichile ku malo gaŵagawilwe kuti gaŵe gao, ku Timinati Sela, ku chilambo cha ikwesya cha Efulaimu, kumpoto kwa litumbi lya Gaashi.

31 Ŵaisilaeli ŵaatumichile Ambuje Akunnungu, moŵa gose ga umi u che Yoshua mpaka paŵawile, ŵajendelechele kwatumichila kwa moŵa gose gaŵatemi aŵala achachekulu ŵao ŵaŵalionele ayila indu Ambuje Akunnungu iŵaatendele Ŵaisilaeli ila.

32 Nombe agala maupa ga che Yusufu gaŵagajigele Ŵaisilaeli kutyochela ku Misili, ŵagasichile kwele ku Shekemu ko pamalo paŵapasumile che Yakubu kutyochela kwa ŵanache ŵa che Hamoli, atatigwe che Shekemu, kwa ipande mia moja ya feza. Lisi li nombe lyaliji lyao uŵelesi u che Yusufu.

33 Nombe che Eleasali, mwana ju che Haluni, ŵawile ni kusikwa ku Gibea, musi uwapegwilwe che Finehasi mwanagwao, ku chilambo cha ikwesya cha ku Efulaimu.