1 Che Yoshua paŵaliji jwanchekulu nnope, Ambuje Akunnungu ŵansalile, "Sambano mmwe nchekulwipe nnope, nambo gasigalile malo gamakulungwa ga chilambo gagali bado kujigalikwa. 2 Agaga ni malo gagasigalile: Chilambo chose cha Ŵafilisiti ni chilambo chose cha Ŵageshuli, 3 kutandilila lusulo lwa Shiholi lwaluli chiŵandi ni ku Misili kwaula ku lujenda mpaka ku malo ja ku Ekiloni. Chilambo cho chaliji cha Ŵakanaani. Kweleko japali misi nsano ja Ŵafilisiti, misi jo jaliji Gasa ni Ashidodi ni Ashikeloni ni Gati ni Ekiloni pamo ni malo ga ku Avi. 4 Chakulujenda, chilambo chose cha Ŵakanaani kutandilila ku Ala ja Ŵasidoni mpaka ku Afeka jajili mumpika mwa Ŵaamoli, 5 iyoyo peyo, malo ga ku Gebali ni ku Lebanoni jose, chakungopochelo lyuŵa kwa Baali Gadi kuusi kwa chitumbi cha Helimoni mpaka ku Lebo Hamati. 6 Sooni malo gose gaakutama ŵandu pa chilambo chachili mmatumbi kutandilila Lebanoni mpaka ku Misilefoti Maimu, yaani chilambo chaakutama Ŵasidoni wose. Une nansyene chinaatopole ŵandu ŵa ilambo yo atyoche mbujo mwenu. Mmwe chimwagaŵile Ŵaisilaeli malo ga chilambo cho, mpela inatite pakunlajisya. 7 Kwayele ngaŵanye chilambo cho kwa ngosyo tisa, pamo ni nusu ja lukosyo lwa Manase ŵanganapegwa malo gao."

8 Ngosyo sya Lobeni ni Gadi, ni nusu ja lukosyo lwa Manase, ŵaliji apegwilwe chilambo chachili kungopochelo lyuŵa kwa Yolodani, mpela Ambuje Akunnungu iŵatite pakunlajisya che Musa jwakutumichila jwakwe. 9 Malo gao galiji kutandilila ku Aloeli mungulugulu mwa lichemba lya Alinoni, ni kutandilila musi wauli pasikati ja lichemba, ni chilambo chose chachili mwiŵata kutandilila ku Medeba mpaka ku Diboni, 10 ni misi jose ja che Sihoni mwenye jwa Ŵaamoli, juŵatawalaga ku Heshiboni mpaka mumpika mwa Ŵaamoni. 11 Iyoyopeyo yaliji pamo ni ilambo ya ku Gileadi liuto lya Ŵageshuli ni Ŵamaaka ni chitumbi cha Helimoni chose ni chilambo cha ku Bashani chose mpaka ku Saleka, 12 ni umwenye wose wa che Ogu jumo jwa Ŵalefai ŵaŵasigalile juŵatawalaga ku Ashitaloti ni ku Edilei ja ku Bashani. Che Musa ŵaliji ŵapundile wose wo ni kuchijigala chilambo chao. 13 Namose yeleyo, Ŵaisilaeli nganiŵatopola Ŵageshuli ni Ŵamaaka nambo akwendelechela kutama nawo mpaka lelo jino.

14 Che Musa nganiŵaagaŵila ŵandu ŵa lukosyo lwa Ŵalawi malo gagali gose, pakuŵa mbopesi syakutinisya syasikutyochekwa kwa Ambuje Akunnungu, Akunnungu jwa Ŵaisilaeli kwa mooto, syelesyo ni siŵaagaŵilwe, mpela Ambuje Akunnungu iŵatite pakunnajisya che Musa.

15 Che Musa ŵaagaŵile malo lukosyo lwa Lobeni malinga ni mitundu jao. 16 Mpika wao waliji kutandilila ku Aloeli mungulugulu mwa lichemba lya Alinoni, ni aula musi wauli pasikati ja lichemba lyo pamo ni chilambo chose cha chiŵata cha Medeba. 17 Nombe yaliji pamo ni ku Heshiboni ni misi jakwe jose jajili mwiŵata: Yaani ku Diboni ni ku Bamoti Baali ni ku Beti Baali Meoni, 18 pamo ni ku Yahasa ni ku Kedemoti ni ku Mefaati, 19 ni ku Kiliataimu ni ku Sibina ni ku Seleti Shahali ni katumbi kakali ku lichemba, 20 ni ku Beti Peoli ni itulusya ya chitumbi cha Pisiga, ni ku Beti Yeshimoti, 21 ni misi jose jajili mu chiŵata, mu umwenye wose u che Sihoni mwenye jwa Ŵaamoli, juŵatawalaga ku Heshiboni. Che Musa ŵaapundile aŵa che Sihoni ŵa, pamo ni ilongola ŵa Ŵamidiani: Yaani che Efi ni che Lekemu ni che Suli ni che Huli ni che Leba mwali jwa mwenye, ŵaŵatawele pamalo pa mwenye che Sihoni. 22 Pasikati ja ŵaŵaulajikwe pa ngondo ni Ŵaisilaeli, jwapali che Balaamu mundu jwa chisango, mwana ju che Beoli. 23 Mpika wa malo gaŵapegwilwe ŵandu ŵa lukosyo lwa Lobeni chakumaswelelo lyuŵa, waliji lusulo lwa Yolodani. Misi ni malo ga ni gaŵapegwilwe ŵandu ŵa lukosyo lwa Lobeni ntundu kwa ntundu.

24 Gelega gali malo gati che Musa ŵapele ŵandu ŵa lukosyo lwa Gadi malinga ni mitundu jao: 25 Chilambo cha ku Yaseli ni misi jose ja ku Gileadi ni nusu ja chilambo cha Ŵaamoni mpaka ku Aloeli jajili kungopochelo lyuŵa kwa musi wa ku Laba, 26 ni kutyochela ku Heshiboni mpaka ku Lamati Misipa ni ku Betonimu ni kutyochela ku Mahanaimu mpaka ku chilambo cha Debili, 27 ku lichemba lya Yolodani pamo ni misi ja ku Beti Halamu ni ku Beti Nimla ni ku Sukoti ni ku Safoni ni chilambo chose chiŵatawalaga mwenye che Sihoni jwa ku Heshiboni. Malo go gali chakumaswelelo lyuŵa kwa Yolodani ni mpika wakwe waliji chakulujenda kwa litanda lya Galilaya. 28 Jele misi jo ni misinda jakwe ni jiŵapatile ŵandu ŵa lukosyo lwa Gadi malinga ni mitundu jao.

29 Sooni, che Musa ŵaapele malo nusu ja lukosyo lwa Manase malinga ni mitindu jao. 30 Chilambo chachijenele kutandilila ku Mahanaimu pamo ni ku Bashani jose, ni malo jose jiŵatawele che Ogu mwenye jwa ku Bashani ni misi sitini ja che Yaili jajili ku Bashani, 31 ni nusu ja ku Gileadi ni ku Ashitaloti ni ku Edilei, misi jajili mu utawala u che Ogu jwa ku Bashani. Malo go, nusu jakwe ŵapegwilwe uŵelesi u che Makili mwana ju che Manase, malinga ni mitundu jawo.

32 Che Musa ŵaliji ŵaagaŵile malo ga chilambo cha kungopochelo lyuŵa kwa Yeliko ni kwa lusulo lwa Yolodani, katema paŵaliji ku iŵata ya ku Moabu. 33 Nambo lukosyo lwa Ŵalawi, che Musa nganiŵapa malo gagali gose kuti gaŵe gao, pakuŵa ŵaasalile kuti liunjili lyao chiliŵe kwatumichila Ambuje Akunnungu, Akunnungu jwa Ŵaisilaeli.