1 Pakumala kwaputa ŵandu ŵa chilambo chila, mpingo wose ŵa Ŵaisilaeli wasongangene ku Shilo ko ni kulijimika Lisakasa lya Kusimanilana kwaligongo lya Akunnungu. 2 Nambo syasigalile ngosyo saba sisyaliji sikanaŵe kupegwa malo gao pa chilambo. 3 Kwayele, che Yoshua ŵasaalile Ŵaisilaeli, "Ana chinlindilile mpaka chakachi kwaula kuchijigala chilambo ni kuchitenda chiŵe chenu, achila chilambo champele Ambuje Akunnungu, Akunnungu ŵa Achachekulu ŵenu? 4 Ayaga nsagule ŵandu ŵatatu kutyochela mu kila lukosyo. Ni une tinaalajisye akachilolesye chilambo chose yachitite kuŵa, ni kusagula malo jaakusaka kuti jiŵe jao. Nipele taiche kuusalila. 5 Ni ŵanyamwe chinchigaŵanye chilambo cho malo saba. Lukosyo lwa Yuda chilusigale ku malo gakwe cha kulujenda ni lukosyo lwa Yusufu cha kumpoto. 6 Pakumala kulemba nkati gele malo saba ga chilambo cho, muunyichisye kukwangu. Pelepo tiindende gudugudu paujo pa Ambuje Akunnungu, Akunnungu ŵetu, nkati malo gatapate kila lukosyo lwenu. 7 Nambo Ŵalawi ngaapata malo galigose pasikati jenu, pakuŵa chakole indu yose kwa kwatumichila Ambuje Akunnungu kwa kutenda masengo ga umbopesi. Ngosyo sya Gadi ni Lobeni ni nusu ja lukosyo lwa Manase apatile malo gao cha kungopochelo lyuŵa kwa lusulo lwa Yolodani, kwati che Musa, jwakutumichila jwa Ambuje Akunnungu ŵapele."

8 Nipele ŵandu ŵala ŵautandite ulendo kwaula kuchilola chilambo yachitite kuŵa. Che Yoshua ŵapele malajisyo, achitiji, "Njaulangane nkachiuchilichisye chilambo chose ni nkalembe yachitite kuŵa, nipele mmujangane kukwangu. Ni une tindende gudugudu paujo pa Ambuje Akunnungu pa Shilo pa kuti mmanyilile malo gatimpegwe." 9 Nipele achalume wo ŵapitile mu chilambo chose ni kulemba yachitite kuŵa chilambo cho ni malo gose saba ni misi jakwe. Paŵamasile ŵausile ku che Yoshua kuchigono ku Shilo ko. 10 Pelepo che Yoshua ŵatesile gudugudu paujo pa Ambuje Akunnungu ligongo lya ŵanyawo, ŵachigaŵenye chilambo cho kwa Ŵaisilaeli, malinga ni kila lukosyo ni malo gakwe.

11 Gudugudu jaandanda jaagwilile ŵandu ŵa lukosyo lwa Benjamini malinga ni mitundu jao. Chilambo chao chaliji pasikati ja ŵandu ŵa lukosyo lwa Yuda ni lwa Yusufu. 12 Cha kumpoto mpika watandilile ku lusulo lwa Yolodani ni wapite cha kumpoto kwa nduluko sya ku Yeliko, ni wajawile cha kumaswelelo lyuŵa ku chilambo cha matumbi, wakopochele mu ukweti wa ku Beti Aveni. 13 Kutyochela kwele, mpika wakwe wapitile ku nduluko syasili chakulujenda kwa Lusu, yaani ku Beseli, wajawile ku Ataloti Adali, ku chikwesya chachili kulujenda kwa Besi Holoni ja kwiŵanda. 14 Kutyochela pa chikwesya chachikulolegana ni Besi Holoni cha kulujenda, mpika wagalauchile kwaula chakulujenda ni waiche ku Kiliati Baali, yaani Kiliati Yealimu, musi wa lukosyo lwa Yuda. Wele ni uwaliji mpika cha kumaswelelo lyuŵa. 15 Cha kulujenda mpika wakwe watandilile mumbali mwa malo ga Kiliati Yealimu chakumaswelelo lyuŵa, wajawile mpaka ku iliŵa ya meesi ya ku Nefutoa. 16 Nipele ŵajendelechele kwiŵanda ku ndandililo ja chitumbi chachikulolegana ni lichemba lya mwana jwa Hinomu, chakumpoto nnope kwa lichemba lya Ŵalefai. Wajandelechele chapaasi ku lichemba lya ku Hinomu, ni kupitila ku ndulukosya sya chakulujenda kwa musi wa Ŵayebusi, mpaka ku Eni Logeli. 17 Kweleko, mpika ula wagalawiche kwaula chakumpoto mpaka ku Eni Shemeshi, wapitile ku Geliloti waukulolegana ni litala lya ku Adumimu ni kutuluchila mpaka ku liganga lya che Bohani mwana ju che Lobeni. 18 Mpika wajendelechele mbujo kwaula ku nduluko sya chakumpoto kwa Beti Alaba, nipele watulwiche mpaka ku lichemba lya Yolodani. 19 Sooni, wajendelechele chakumpoto kwa chitumbi cha Beti Hogila ni kumalila pa ndago ja lusulo lwa Yolodani cha kulujenda. Wele ni uwaliji mpika cha kulujenda. 20 Lusulo lwa Yolodani ni uwaliji mpika wakwe cha kungopochelo lyuŵa. Yeleyi ni iyatite kuŵichikwa mipika ja ilambo iŵapegwilwe ŵandu ŵa mitundu ja lukosyo lwa Benjamini.

21 Misi ja ŵandu ŵa lukosyo lwa Benjamini malinga ni ntundu kwa ntundu ni jeleji, ku Yeliko, ni ku Beti Hogila, ni ku Emeki Kesisi, 22 ni ku Beti Alaba, ni ku Semalaimu, ni ku Beseli, 23 ni ku Avimu, ni ku Pala, ni ku Ofula, 24 ni ku Kefali Amoni, ni ku Ofini ni ku Geba. Misi jose jaŵapegwilwe jaliji kumi na mbili pamo ni misinda jakwe. 25 Misi jine jili ku Gibeoni, ni ku Lama, ni ku Beeloti, 26 ni ku Misipa, ni ku Kefila, ni ku Mosa, 27 ni ku Lekemu, ni ku Ilipeeli, ni ku Talala, 28 ni ku Sela, ni ku Haelefu, ni ku Yebusi, yaani ku Yelusalemu, ni ku Gibea ni ku Kiliati Yealimu. Misi jose jiŵapegwilwe jaliji kumi na nne pamo ni misinda jakwe. Misi jo ni jiŵapegwilwe ŵandu ŵa lukosyo lwa Benjamini malinga ni mitundu jao.