1 Nipele Ambuje Akunnungu ŵansalile che Yoshua, 2 ŵaasalile Ŵaisilaeli kuti, "Nsagule misi jati mundu takombole kuutuchila, jinaalajisye che Musa kuti ansalile. 3 Mundu jwalijose ambulagaga mundu pangaŵa kwamele, kuti akombole kuutuchila mu mmusi umo mwa jelejo kuntila ajula mundu jwakusachilwa kuuchisya maulago jula. 4 Jwakuulaga tautuchile ku musi umo mwa jelejo, ni kwima pannango wa musi ni kwasalila achakulu ŵa musi wo magambo gakwe. Achakulu tachimpochela mu musi mo ni kumpa malo ga kutama pasikati jawo. 5 Iŵaga jwakuuchisya maulago jo akunkuya jwelejo kukoko, ŵandu ŵa mmusi mo ngakusachilwa kunjausya jwelejo kwa jwakuuchisya jo, pakuŵa ŵammuleje njakwe pangaŵa kwamele, ni sooni ngananchimaga chitandile kuundanda. 6 Jwakuulaga jo chatame mu musi wo mpaka pelepo pachatame paujo pa nkungulu wa Ŵaisilaeli ni kwapikanila ni kugapima maleŵa, ni sooni mpaka Jwambopesi jwankulu jutaŵe pamasengo mu gele moŵa go patawe. Pakumala pelepo mundu jwakuulaga jo takombole kuuja kumangwakwe pa aula musi wautisile ula."

7 Nipele ŵasagwile misi ja ku Kadeshi ku chilambo cha ku Galilaya ku matumbi ga ku Nafutali, ni ku Shekemu mu chilambo cha matumbi ga ku Efulaimu ni ku Kiliati Alaba yaani ku Hebuloni mu chilambo cha matumbi cha ku Yuda. 8 Kungopochelo lyuŵa kwa Yolodani, kuukweti chachili kungopochelo lyuŵa kwa ku Yeliko, ŵasagwile musi wa Beseli wauli ku lutando ni musi wo uli mu malo ga lukosyo lwa Lobeni. Sooni ŵasagwile musi wa ku Lamoti wauli ku Gileadi wauli mu malo ga ŵandu ŵa lukosyo lwa Gadi ni ku Golani kwele ku Bashani mu malo ga ŵandu ŵa lukosyo lwa Manase. 9 Jeleji jili misi jijasagulikwe kwaligongo lya ŵandu wose ŵa ku Isilaeli ni achalendo ŵakutama pasikati jao, kuti mundu jwalijose jwauleje njakwe pangaŵa kwamele, takombole kuutuchila kweleko kuti akaulajikwa ni mundu jwakuuchisya maulago, mpaka pachamanyilile yakuntenda mundu jo.