1 Nambo Ŵaisilaeli nganaŵa ni chikulupichiko kwa indu iyatyochekwe kwa ligongo lya Ambuje Akunnungu. Che Akani mwana ju che Kalimi, jwali mwana ju che Sabidi mwana ju che Selahi jwa lukosyo lwa che Yuda, ŵaijigele indu impepe mwa aila iŵalajiswe kuijonanga. Kwayele ching'ang'a cha Ambuje Akunnungu chaliji pachanya pa Ŵaisilaeli.

2 Nipele che Yoshua ŵaatumile ŵandu kutyochela ku Yeliko mpaka ku musi wa Ai, wauli chiŵandi ni Beti Aveni, chakungopochelo lyuŵa kwa Beseli ni kwasalila akwele ku Ai kukuuchilichisya musi wo. Ŵandu ŵala ŵakwesile ni kuuchilichisya musi wa Ai. 3 Ŵandu ŵala ŵausile ni kwasalila che Yoshua, "Ngaŵa ŵandu wose ŵaakusachilwa kwaula kukuputana ni ŵandu ŵa ku Ai, mwajausye ŵandu elufu mbili pane elufu tatu, chakwane kuuputa. Nkaasausya ŵandu wose pakuŵa achalume mu musi wo ali ŵangatupa." 4 Nipele ŵandu mpela elufu tatu pe ŵapite kwaguluchila ŵandu ŵa ku Ai nombewo ŵatopolekwe ni ŵandu ŵa ku Ai. 5 Ŵandu ŵa ku Ai ŵauleje Ŵaisilaeli selasini na sita ni kwatopola kutyochela pa nnango wekulungwa wa musi mpaka ku Shebalimu ni kwaulaga pa chituluko. Kwa ligongo lyo Ŵaisilaeli ŵapwele mitina ni kwajogopa.

6 Pelepo che Yoshua ŵapapwile iŵalo yao ni kugwa manguku paujo pa Lisanduku lya Lilangano lya Ambuje Akunnungu, ni kusigalila papopo mpaka ligulo. Jwele ni achachekulu ŵa Ŵaisilaeli ŵalitasile luundu mmitwe jao kulosya kuti akulilasika. 7 Che Yoshua ŵatite, "Alakwe Ambuje Akunnungu, kwa chichi mwatujombwesye ku lusulo lwa Yolodani kuti ntutaje mmakono mwa Ŵaamoli ni kutujonanga? Ikaliji mmbaya tukatemi peesi ja lusulo lwa Yolodani! 8 Alakwe Ambuje Akunnungu, nyile uli akuno Ŵaisilaeli ŵautwiche ŵammagongo ŵao? 9 Ŵakanaani ni achinsyene chilambo chi pachapikane ngani ji, chatusyungule ni kutumalisya pachilambo pa. Chintende chichi kuulosya ukulu wa liina lyenu lyekulu?"

10 Ambuje Akunnungu ŵasalile che Yoshua, "Njimuche, kwa chichi nligwisisye manguku? 11 Ŵaisilaeli atesile sambi! Nganatenda lilangano lyangu linaalangene alitende. Ajigele indu impepe mwa indu yaiŵichikwe kwa ligongo lya Ambuje Akunnungu, ajiŵile ni kulambusya, awangenye kumo ni indu yao achimisyene. 12 Kwayele Ŵaisilaeli ngaakombola kwima paujo pa ŵammagongo ŵao, agalaŵiche ni kwautuka pakuŵa ikuŵajilwa ajonasiche. Une ngaama ni ŵanyamwe sooni mpaka patinjonanje kila chindu chachikusachilwa chijonasikwe pasikati jenu. 13 Ayaga, njimuche nkaatende ŵandu akundikwe kwa kuumbopelela ni kwaasalila aliŵiche chile kusimana ni une malaŵi, pakuŵa, une Ambuje Akunnungu, Akunnungu jwa Ŵaisilaeli nguti, ‘Pasikati jenu ipali indu yaityosyekwe kwaligongo lyangu, kwayele ngankombola kwapunda ŵammagongo ŵenu mpaka pachinyityosye indu yo!’ 14 Kwayele malaŵi kundaŵi chinnyiche paujo pangu lukosyo kwa lukosyo, ni chiiŵe, lukosyo luchisagule une Ambuje Akunnungu chiluiche paujo pangu, ntundu kwa ntundu, ni ntundu uchisagule une Ambuje Akunnungu chiuiche paujo pangu, ulongo kwa ulongo, ni ulongo uchisagule une Ambuje Akunnungu chiuiche paujo pangu, mundu jumo jumo. 15 Mundu jwalijose jutasimanikwe ali ni indu yetyosyekwe kwaligongo lyangu, mundu jo atiniswe ni mooto pamo ni indu yose yalinayo. Pakuŵa nganalikamulisya lilangano lya Ambuje Akunnungu ni ligongo atesile chindu cha soni pa Isilaeli."

16 Nipele che Yoshua ŵajimwiche kundaŵipe ni kwasalila Ŵaisilaeli aiche malinga ni lukosyo lwao, lukosyo lwa Yuda lwasagulikwe. 17 Nipele lwaiche lukosyo lwa Yuda, ntundu kwa ntundu, wasagulikwe ntundu u che Selahi. Ni mu ntundu u che Selahi waiche nnango kwa nnango, ni ŵasagulikwe nnango wa che Sabidi. 18 Nipele che Yoshua ŵaichisye ŵandu ŵa nnango u che Sabidi mundu jumo jumo, ni che Akani mwana ju che Kalimi, mwana ju che Sabidi, mwana ju che Selahi jwa lukosyo lwa Yuda ŵasagulikwe. 19 Pelepo che Yoshua ŵansalile che Akani, "Mwanangu, choonde mwakusye Ambuje Akunnungu, Akunnungu jwa Ŵaisilaeli, mwalape ŵelewo, ni muusalile chintesile, nkaasisa."

20 Che Akani ŵanjanjile che Yoshua, "Elo ndesile sambi kwa Ambuje Akunnungu, Akunnungu jwa Ŵaisilaeli. Yeleyi ni inatesile: 21 Panauweni mwinjilo wambone wa ku Babeli pasikati ja indu itwaisumwile ni ipande mia mbili ya madini ga feza ni chipande cha sahabu chachili ni chisilo cha nusu kilo nailajile ni kuijigala. Nnole sisile paasi mu lisakasa lyangu pamo ni madini ga feza kuusi kwakwe."

22 Nipele che Yoshua ŵaatumile ŵantenga nombewo ŵautwiche mpaka ku lisakasa li che Akani. Ŵaisimene indu isisikwe mu lisakasa pamo ni madini ga feza kuusi kwakwe. 23 Ŵaijegele indu ila kutyochela mu lisakasa lila ni kuijausya ku che Yoshua ni kwa Ŵaisilaeli wose. Ni ŵanyawo ŵaiŵisile paasi paujo pa Ambuje Akunnungu. 24 Pele che Yoshua ni Ŵaisilaeli wose ŵanjigele che Akani mwana ju che Selahi pamo ni madini ga feza ni mwinjilo wambone wa ku Babeli ni chipande cha sahabu ni ŵanache ŵakwe ŵachilume ni ŵachikongwe pamo ni ng'ombe ni mbunda ni ngondolo syakwe ni lisakasa lyakwe pamo ni indu yose yalinayo. Yose ŵaiichisye ku lichemba lya Akoli, malumbo gakwe lichemba lya malagasyo. 25 Che Yoshua ŵammusisye che Akani, "Kwachichi ngaichisye malagasyo ga kukwetu? Ambuje Akunnungu tagaichisisye malagasyo ga pachanya penu lelo jino!" Pele Ŵaisilaeli wose ŵamponyisye maganga che Akani mpaka kuwa. Nombe ŵaponyisisye maganga ni ulongo wao wose mpaka kuwa ni kwachoma mooto. 26 Ŵagaŵunjiche maganga liunjili lyekulungwa pachanya pakwe, nombe liunjili lyo lili mpaka lelo jino. Kwayele pamalo pala pakuŵilanjikwe, Lichemba lya Akoli mpaka lelo jino.

Nipele ching'ang'a cha Ambuje Akunnungu chatondweŵe.