1 Ambuje Akunnungu ŵansalile che Yoshua, "Nkajogopa namose kupwa ntima, mwajigale ŵangondo wose njaule ku musi wa Ai nkaapute ŵandu ŵa musi wo, pakuŵa nantesile mmwe mwapunde mwenye jwa kweleko pamo ni ŵandu ŵakwe ni musi wao ni chilambo chao. 2 Chimwatendele ŵandu ŵa musi wa ku Ai ni mwenye jwao nti imwaatesile ŵandu ŵa musi wa ku Yeliko ni mwenye jwao. Nambo indu ya kweleko pamo ni inyama yakulangwa chinnjigalanje ni kuitenda yenu. Njaulanje nkaugunguluchile musi wo kutyochela chakuunyuma."

3 Nipele che Yoshua ŵajimwiche pamo ni ŵangondo ŵakwe wose kuti ajaule ku Ai. Ŵaasagŵile ŵangondo selasini elufu ŵakuimanyilila kuputana ngondo, ni kwasalila alongolele katema ka chilo. 4 Ŵaalajisye achitiji, "Mpikanile uchenene, ŵanamwe chimwajuŵilile ŵandu ŵa musi wo chakuunyuma, nkajaula kwatalichila nnope ni musi. Nambo nliŵiche chile kwa ngondo katema kose. 5 Une ni ŵandu ŵaali pamo ni une chituuŵandichile musi. Ŵandu patachikopoka paasa musi kukumenyana ni uwe patuli, mpela iŵatesile kuundanda, uweji chitwautuche. 6 Ŵanyawo chapunde kutukuya mpaka chaŵe kwakutalichila ni musi wao, taaganichisye kuti tukwautuka nti itwatesile katema kakapite. Katema pachitwautuche, 7 pelepo ŵanyamwe chinjimuche panlijuŵile po ni kuuputa musi wo, pakuŵa Ambuje Akunnungu, Akunnungu ŵenu, champe ukombole wa kuujigala musi wo uŵe wenu. 8 Nipele chiiŵe pachinsumule musi wo, muujonanje ni mooto. Ntende nti yatite pakulajisya Ambuje Akunnungu. Nnole, gelego ni malajisyo gachingakuye." 9 Che Yoshua ŵaatumile ŵandu ŵala, nombewo ŵajawile ni kutama chakumaswelelo lyuŵa kwa musi wa Ai pasikati ja musi wa ku Ai ni ku Beseli achijuŵililaga. Nambo che Yoshua ŵagonile pachigono chilo cho pamo ni ŵandu.

10 Che Yoshua ŵajimwiche kundaŵipe ni kwasonganganya ŵandu. Nipele che Yoshua ni ilongola ŵa Ŵaisilaeli ŵakwesile kwaula ku Ai achalongolelaga ŵandu wo. 11 Ŵandu wose ŵaŵaliji pamo ni che Yoshua ŵapite ni kuuŵandichila musi ula cha mbujo. Ŵaŵisile chigono kumpoto kwa musi wa ku Ai papali ni lichemba pasikati jao ni musi wa ku Ai. 12 Nipele che Yoshua ŵaliji ŵaaŵisile ŵangondo elufu tano ajuŵilile pasikati ja ku Beseli ni ku Ai, chakumaswelelo lyuŵa kwa musi wa Ai. 13 Ŵaaŵisile ŵangondo wose mmauto gao, ŵaŵaliji ku chigono ŵaliji kumpoto kwa musi ni aŵala ŵaŵalijuŵile ŵaliji chakumaswelelo lyuŵa. Chilo chila che Yoshua ŵajawile kugona pa lichemba lila.

14 Mwenye jwa ku Ai paŵaweni ŵangondo ŵa Ŵaisilaeli, nsyene pamo ni achalume ŵa pamusi wose ŵatyosile chitema kundaŵi pe, kuti akaputane ni Ŵaisilaeli peuto papakulolegana ni ku Alaba. Nambo nganaimanyilila kuti kwana ŵandu ŵaŵichikwe kuujuŵilila musi wao chakunyuma. 15 Che Yoshua pamo ni ŵandu ŵakwe ŵatesile mpela ila alepele, ŵatandite kutila kwaula ku ukweti. 16 Achalume wose ŵa ku Ai, ŵali ni ukombole wakuputa ngondo ŵaŵilanjikwe asongangane pamo kuti ŵaautusye Ŵaisilaeli, nombewo ŵammutwisye che Yoshua mpaka kwatalichila ni musi wao. 17 Nganapangwa namose jwannume jwali ni ukombole wa kuputana ngondo juŵasigele mu musi wa ku Ai ni ku Beseli, wose ŵapite kwakuichisya Ŵaisilaeli ni musi woa ŵaulesile pangali mundu jwakuulindilila.

18 Pele Ambuje Akunnungu ŵanlajisye che Yoshua, "Ayaga nnyakule mpamba wauli mmakono mwenu ni kuulolechesya upande wa ku Ai pakuŵa chinampe ukombole wa kuusumula." Che Yoshua ŵaujigele mpamba wakwe ni kuulolechesya ku musi wa Ai. 19 Che Yoshua paŵaulolechesye mpamba wakwe ku musi wa ku Ai, papopo aula mpingo uŵaliji nkujuŵilila chakwine ŵajimwiche ni kwinjila mmusi mula, ni kwa chitemape ŵaujigele musi ni kuuchoma mooto. 20 Ŵandu ŵa ku Ai paŵalolite panyuma ŵaliweni lyosi lilinkututuma mu musi wao kwaula mwinani ni ŵanyawo nganakola lipesa lyakuti autuchile upande wauliwose, pakuŵa Ŵaisilali ŵaliji nkwakuilisya aŵala ŵaŵakuyaga 21 Nipele che Yoshua ni Ŵaisilaeli paŵaiweni kuti ŵaŵajuŵililaga ŵala aukamwile musi ula, ni lyosi lilinkututuma mwinani ŵaagalawuchile ŵandu ŵa ku Ai ni kutanda kwaulaga. 22 Ŵandu uŵajuŵililaga nombe ŵatyosile paasa musi ni kwagungumuchila chakunyuma, kwayele ŵandu ŵa ku Ai ŵasigalile pasikati, Ŵaisilaeli ali nkwaputa akuno ni akuno. Ŵaisilaeli ŵaauleje ŵanawose, panganneka mundu namose jumo. 23 Nambo ŵankamwile mwenye jwa ku Ai ali jwanjumi ni kunjausya ku che Yoshua.

24 Ŵaisilaeli ŵauleje kwa lipanga achalume wose ŵa ku Ai ŵaŵaliji mmigunda ni mu ukweti kuŵatopolele. Nipele, Ŵaisilaeli wose ŵausile ku Ai ni kwaulaga ŵanawose ŵaŵasigalile pamusi. 25 Ŵandu wose ŵaŵaulajikwe ku musi wa Ai pa lyuŵa lyo, achalume ni achakongwe ŵaliji elufu kumi na mbili. 26 Che Yoshua nganautulusya nkono wakwe uwakamulile mpamba kulosya ku Ai mpaka paŵamasile kwaulaga wose ŵaŵatamaga pamusi wo. 27 Ŵaisilaeli ŵaijigele ilango ni indu ya musi ula nti iŵatite Ambuje Akunnungu kwalajisya che Yoshua. 28 Nipele, che Yoshua ŵauchomile mooto musi ula ni kuutenda kuŵa liunjili lya masame, ni paliji jii moŵa gose pangali mbesi ni isigalile iyoyo mpaka lelo jino. 29 Nipele, ŵankoleche mwenye jwa ku Ai palikongwa ni kunneka mpaka ligulo. Che Yoshua ŵaalajisye agatulusye malilo ni kugajasa pa nnango wekulungwa wakwinjilila pamusi. Ŵagaunjiche maganga gamakulungwa gamajinji pachanya pakwe gagali mpaka lelo.

30 Nipele che Yoshua ŵataŵile chilisa ku chitumbi cha Ebali, kwaligongo lya Ambuje Akunnungu, Akunnungu jwa Ŵaisilaeli, 31 ŵakolosisye mpela che Musa jwakutumichila jwa Ambuje Akunnungu, iŵatite pakwalajichisya Ŵaisilaeli ni mpela yaitite pakulembekwa mu chitabu cha malajisyo ga che Musa, "Chilisa chekolosye kwa maganga ganganigasepekwe ni chindu chachilichose cha chisyano." Nombewo ŵatyosisye mbopesi syakutinisya kwa Ambuje Akunnungu pachanya pakwe, ni kusityosya mbopesi sya chitendewele. 32 Nipele, paujo pa Ŵaisilaeli wose, che Yoshua ŵalembile sooni malajisyo ga che Musa pachanya maganga, mpela ilaila iyatite kulembekwa kuundanda. 33 Ŵaisilaeli wose, ni achalendo ni ilongola ŵao ni ŵakamusi ŵa ilongola ni ŵakulamula, ŵajimi kila upande kulilolechesya Lisanduku lya Lilangano lya Ambuje Akunnungu paujo pa Ŵmbopesi ŵa Chilawi ŵaŵalijigele Lisanduku lyo. Ŵane ŵajimi mbujo mwa chitumbi cha Gelisimu ni ŵane mbujo mwa chitumbi cha Ebali, mpela iŵatite pakulajisya che Musa jwakutumichila jwa Ambuje Akunnungu nkati itajile kwapa upile Ŵaisilaeli. 34 Kumbesi, che Yoshua ŵasyomile maloŵe gose ga malajisyo ni maloŵe gagakupeleka upile ni maloŵe gagakulwesya, chisau iyatite kulembekwa mu chitabu cha Malajisyo. 35 Nganilipagwa liloŵe namose limo mwa agala gaŵalajisye che Musa lyati che Yoshua nganalisyoma paujo pa nsongangano wose wa Ŵaisilaeli achiŵaga ni achakongwe pamo ni ŵanache ni achalendo ŵakutama pasikati jao.