1 Malo gaŵapatile ŵandu ŵa lukosyo lwa Yuda kwa kwakutenda gudugudu malinga ni mitundu jao, gajenele kutandilila chakulujenda ni chakungopochelo lyuŵa mpaka mumpika mwa chilambo cha ku Edomu, mpaka kulujenda kwannope kwachili chipululu cha Sini. 2 Mpika wao cha kulujenda watandilile ku kulujenda kwa Bahali ja Njete, 3 wajawile chakulujenda mpaka ku chikwesya cha Akilabimu, ni ŵapite mpaka mu ukweti mwa Sini mpaka kulujenda kwa Kadeshi Balinea. Sooni wapitile ku Hesiloni mpaka ku Adali nipele wagalawiche kwaula ku Kalika. 4 Nipele wajendelechele mpaka ku Asimoni ni kulumbikana ni kasulo ka Misili ni kwinjila mu Bahali ja Meditelania. Wele ni uwaliji mpika wa lukosyo lwa Yuda cha kulujenda. 5 Cha kungopochelo lyuŵa jaliji Bahali ja Njete mpaka lusulo lwa Yolodani paukwinjila mu bahali. Cha kumpoto mpika watandilile pelepo. 6 Mpika wo wapitile ku Beti Hogila ni chakumpoto kwa Beti Alaba mpaka pa liganga li che Bohani mwana ju che Lobeni. 7 Kutyochela pelepo, wajendelechele mpaka ku Debili ku lichemba lya Akoli ni chakumpoto kwaula ku Giligali, jajikulolegana ni chikwesya cha Adumimu chachili chakulujenda kwa lichemba, nipele wajendelechele ku iliŵa ya meesi ya Eni Shemeshi ni kumalila ku Eni Logeli. 8 Nipele mpika wo wapitile ku lichemba lya Hinomu chakulujenda kwa katumbi ka Ŵayebusi yaani ku Yelusalemu, kutandilila pelepo wakwesile kwaula kulusonga lwa chitumbi chachili kumaswelelo lyuŵa kwa lichemba lya Hinomu kumbesi kwa lichemba lya Lefaimu. 9 Kutyochela pelepo wajawile ku chitumbi mpaka ku chiliŵa cha Nefitoa, mpaka ku misi ja chitumbi cha Efiloni. Pelepo mpika wagalawiche ni kwaula ku Baala, yaani ku Kiliati Yealimu. 10 Nipele mpika wasyungulile cha kumaswelelo lyuŵa kutyochela ku Baala mpaka ku chitumbi cha Seili, ni wapitile kumpoto kwa chitumbi cha Yelimu yaani Kesalini ni kutuluchila ku Beti Shemeshi kwati wapitile chiŵandi ni ku Timina. 11 Mpika wajendelechele chakumpoto kwa nduluko sya Ekiloni, ŵasyungwile kwaula ku Shikiloni pati wapitile chiŵandi ni chitumbi cha Baala mpaka ku Yabineeli, ni wamalile ku bahali ja Meditelania. 12 Chakumaswelelo lyuŵa, mpika waliji bahali ja Meditelania. Yele ni iyatite kuŵa mipika ja malo gaŵapegwilwe ŵandu ŵa lukosyo lwa Yuda malinga ni mitundu jawo.

13 Che Yoshua ŵampele che Kalebu mwana jwa Yefune musi wa ku Kiliati Alaba yaani musi wa ku Hebuloni, mpela Akunnungu iŵatite pakwalajisya che Musa. Che Alaba ŵaliji ambujegwe che Anaki. 14 Che Kalebu ŵasitopwele kutyochela mu musi wo, mitundu jitatu ji che Anaki, yaani ntundu wa che Sheshai ni ntundu wa che Ahimani ni ntundu wa che Talimai. 15 Kutyochela ku Hebuloni ko, ŵapite kukwagungumuchila ŵandu ŵaakutama ku Debili, musi wo kundanda waŵilanjikwe Kiliati Sefeli. 16 Che Kalebu ŵatite, "Mundu juchakombole kwapunda ŵandu ŵa musi wa Kiliati Sefeli, tinjinlombekasya mwali jwangu che Akisa." 17 Nipele che Otinieli mwana ju che Kenasi juŵaliji nkulugwe che Kalebu, ŵaaputile ŵandu ŵa musi wo, ni che Kalebu ŵanlombekasisye che Akisa mwali jwakwe. 18 Pa lyuŵa lya ulombela, che Otinieli ŵansalile che Akisa, ŵaŵende atati ŵao ngunda. Che Akisa ŵaliji akwesile mbunda ni paŵatulukaga paasi, che Kalebu ŵausisye, "Nkusaka nampe ntulilo chi."

19 Che Akisa ŵanjanjile, "Mumbe malo gagali ni meesi, pakuŵa kwele ku malo ja kulujenda kumumbele kuli kwejumu." Nipele che Kalebu ŵampele che Akisa mwaligwe iliŵa ya kwiŵanda ni ya kulutando chiŵandi ni ku Hebuloni.

20 Aga ni malo gaŵapegwilwe ŵandu ŵa lukosyo lwa Yuda malinga ni mitundu jao. 21 Misi jajili chakulujenda kwannope kwa chilambo cha ku Yuda kwaula ku mpika wa ku Edomu jaliji, Kabiseeli ni ku Edeli ni ku Yaguli, 22 ni ku Kina ni ku Dimona ni ku Adada, 23 ni ku Kedeshi ni ku Hasoli ni ku Itinani, 24 iyoyo ni ku Sifu ni ku Telemu ni ku Bealoti. 25 Ni ku Hasoli Hadata ni ku Kilioti Hesiloni yaani ku Hasoli, 26 ni ku Amamu ni ku Shema ni ku Molada, 27 ni ku Hasali Gada ni ku Heshmoni ni ku Beti Peleti. 28 Ni ku Hasali Shuali ni ku Beelisheba ni ku Bisiotia, 29 ni ku Baala ni ku Liyimu ni ku Esemu, 30 ni ku Elitoladi ni ku Kesili ni ku Holima. 31 Pamo ni ku Sikilagi ni ku Madimana ni ku Sanisana, 32 ni ku Lebaoti ni ku Shilihimu ni ku Aini ni ku Limoni. Misi jose jaliji ishilini na tisa pamo ni misinda jakwe.

33 Misi jijaliji kwiŵanda jaliji; ku Eshitaoli ni ku Sola ni ku Ashina, 34 ni ku Sanoa ni ku Enganimu ni ku Tapua ni ku Enamu, 35 ni ku Yalimuti ni ku Adulamu ni ku Soko ni ku Aseka. 36 Ni ku Shaalaimu ni ku Aditaimu pamo ni ku Gedela pane Gedelotaimu. Misi jose jaliji likumi na ncheche pamo ni misinda jakwe.

37 Sooni ŵapegwilwe misi ja ku Senani ni ku Hadasha ni ku Migidali Gadi, 38 ni ku Dileani ni ku Misipa ni ku Yokiteeli, 39 ni ku Lakishi ni ku Bosikati ni ku Egiloni, 40 ni ku Kaboni ni ku Lahimasi ni ku Kitilishi, 41 ni ku Gedeloti ni ku Beti Dagoni ni ku Naama ni ku Makeda. Misi jose jiŵapegwilwe jaliji kumi na sita pamo ni misinda jakwe. 42 Sooni ŵapegwilwe misi ja ku Libina ni ku Eseli ni ku Ashani, 43 ni ku Yifita ni ku Ashina ni ku Nesibu, 44 ni ku Keila ni ku Akisibu ni ku Malesha. Misi jose jiŵapegwilwe jaliji misi tisa pamo ni misinda jakwe. 45 Iyoyopeyo ŵapegwile musi wa ku Ekiloni ni misi jajinandinandi pamo ni misinda jakwe, 46 ni misi jose ni misi jajinandi jajili chiŵandi ni musi wa ku Ashidodi, kutyochela ku Ekiloni mpaka bahali ja Meditelania, 47 ku Ashidodi ni ku Gasa pamo ni misi jakwe ni misinda jakwe, mpaka ku kasulo ka Misili mpaka mbwani ja bahali ja Meditelaniani.

48 Misi jijaliji ku malo ja matumbi jaliji, ku Shamili ni ku Yatili ni ku Soko, 49 ni ku Dana ni ku Kiliati Sana yaani ku Debili, 50 ni ku Anabu ni ku Eshitemoa ni ku Animu, 51 ni ku Gosheni ni ku Holoni ni ku Gilo. Misi jaliji kumi na moja pamo ni misinda jakwe. 52 Sooni ŵapegwile misi ja ku Alabu ni ku Duma pamo ni ku Eshani, 53 ni ku Yanimu ni ku Beti Tapua ni ku Afeka, 54 ni ku Humta ni ku Kiliati Alaba yaani ku Hebuloni ni ku Sioli. Misi jaliji tisa pamo ni misinda jwakwe. 55 Lukosyo lwa Yuda ŵapegwilwe sooni misi ja ku Maoni ni ku Kalimeli ni ku Sifu ni ku Yuta, 56 ni ku Yesileeli ni ku Yokideamu ni ku Sanoa, 57 ni ku Kaini, ni ku Gibea, ni ku Timina. Misi jiŵapegwilwe jaliji kumi pamo ni misinda jakwe. 58 Sooni ŵapegwilwe misi ja ku Halihuli ni ku Beti Suli ni ku Gedoli, 59 ni ku Maalati ni ku Beti Anoti ni ku Elitekoni. Misi jose jiŵapegwilwe jaliji sita pamo ni misinda jakwe. 60 Nombe ŵapegwilwe musi wa ku Kiliati Baali yaani ku Kiliati Yealimi ni musi wa ku Laba, misi jose jiŵapegwilwe jaliji jiŵili pamo ni misinda jakwe.

61 Misi ja mu ukweti jaliji, ku Beti Alaba ni ku Midini ni ku Sekaka, 62 ni ku Nibishani ni Musi wa Njete ni ku Engedi. Misi jose jiŵapegwilwe jaliji misi sita pamo ni misinda jakwe.

63 Nambo ŵandu ŵa lukosyo lwa Yuda nganakombola kwatopola Ŵayebusi uŵaliji nkutama ku Yelusalemu, ni mpaka lelo Ŵayebusi akutamanga kwele pamo ni ŵandu ŵa lukosyo lwa Yuda.