1 Ŵeleŵa ni mamwenye ŵa ilambo ŵati Ŵaisilaeli ŵaaputile ni kwasumula misi jao jajili kungopochelo lyuŵa kwa lusulo lwa Yolodani, kutandilila ku lichemba lya Amoni mpaka ku chitumbi cha Helimoni ni lichemba lya lusulo lwa Yolodani chakungopochelo lyuŵa. 2 Che Sihoni mwenye jwa Ŵaamoli, ŵatawalaga kwele ku Heshiboni ko. Ŵatawele kutyochela ku Aloeli, musi wauli mungulugulu lichemba lya Alinoni, ni pasikati ja lichemba lya Gileadi mpaka ku lusulo lwa Yaboki, uwaliji mpika wa chilambo cha Ŵaamoni, yaani nusu ja chilambo cha ku Gileadi. 3 Nombe ŵatawele chakungopochelo lyuŵa kwa lichemba lya lusulo lwa Yolodani, kutandilila litanda lya Galilaya, mpaka bahali ja njete, mpaka ku Beti Shemosi ni kwaula kulujenda kuusi kwa chitumbi cha Pisiga.

4 Jwine ŵaliji mwenye che Ogu juŵasigalile mu mpingo wa Ŵalefai, juŵatawalaga ku Bashani, jweleju ŵatamaga ku Ashitaloti pane pakuŵilanjikwa ku Edilei. 5 Jweleju jwataŵalaga ku chitumbi cha Helimoni ni ku Saleka ni ku Bashani kose mpaka ku mipika ja Ŵageshuli ni Ŵamaaka, nusu ja ku Gileadi mpaka mumpika wa chilambo cha mwenye che Sihoni jwa ku Heshiboni. 6 Ŵele mamwenye ŵaŵili wo ni ŵaŵaputikwe ni che Musa pamo ni Ŵaisilaeli. Nombe che Musa jwakutumichila jwa Ambuje Akunnungu, ŵaityosisye ilambo yao ni kwapa ŵandu ŵa ngosyo sya Lobeni ni Gadi ni nusu ja lukosyo lwa Manase kuti iŵe yao.

7 Ŵelewo ni mamwenye ŵa ilambo ŵaŵapundikwe ni che Yoshua pamo ni Ŵaisilaeli chakumaswelelo lyuŵa lusulo lwa Yolodani, kutandilila ku Baali Gadi pa lichemba lya Lebanoni mpaka ku chitumbi cha Halaki chakulujenda, chiŵandika ni ku Seili. Ni che Yoshua ŵaagaŵanyichisye ngosyo sya Ŵaisilaeli chilambo cho kuti chiŵe yao. 8 Chilambo cho chaliji pamo ni malo ga matumbi, ni mwiŵata, ni malo ja lichemba lya lusulo lwa Yolodani, ni nduluko sya itumbi ni mu ukweti, ni malo ja kulujenda. Ŵandu uŵatamaga mu ilambo yo ŵaliji, Ŵahiti ni Ŵaamoli ni Ŵakaanani ni Ŵapelisi ni Ŵahivi ni Ŵayebusi. 9 Mamwenye uŵaapundile ŵaliji, mwenye jwa ku Yeliko ni mwenye jwa ku Ai, musi wauli chiŵandika ni ku Beseli, 10 mwenye jwa ku Yelusalemu ni mwenye jwa ku Hebuloni, 11 ni mwenye jwa ku Yalimuti ni mwenye jwa ku Lakishi, 12 mwenye jwa ku Egiloni, ni mwenye jwa ku Geseli, 13 ni mwenye jwa ku Debili ni mwenye jwa ku Gedeli, 14 ni mwenye jwa ku Holima ni mwenye jwa ku Aladi, 15 ni mwenye jwa ku Libina ni mwenye jwa ku Adulamu, 16 ni mwenye jwa ku Makeda ni mwenye jwa ku Beseli, 17 mwenye jwa ku Tapua ni mwenye jwa ku Hefeli, 18 mwenye jwa ku Afeka ni mwenye jwa ku Lashaloni, 19 mwenye jwa ku Madoni ni mwenye jwa ku Hasoli, 20 mwenye jwa ku Shimuloni Meloni ni mwenye jwa ku Akishafi, 21 ni mwenye jwa ku Taanaki ni mwenye jwa ku Megido, 22 mwenye jwa ku Kadeshi ni mwenye jwa ku Yokineamu musi wauli kuŵandichila ni chitumbi cha Kalimeli, 23 mwenye jwa ku Doli jajili ku Nafati Doli ni mwenye jwa ku Goimu jajili ku Giligali, 24 ni mwenye jwa ku Tilisa. Mamwenye wose ŵaŵalepele ŵaliji mamwenye selasini na moja.