1 Pagapite moŵa gamajinji, Ambuje Akunnungu ŵapele chitendewele Ŵaisilaeli kwa kwakulupusya kutyochela kwa ŵammagongo uŵasyungwile kose. Katema ko che Yoshua ŵaliji jwanchekulu jwa yaka yaijinji. 2 Che Yoshua ŵaaŵilasile Ŵaisilaeli wose pamo ni ilongola ni achachekulu ŵao, ŵakulamula ni ŵakamusi, ŵasalile, "Uneji sano ndili jwanchekulu jwa yaka yejinji. 3 Ŵanyamwe nnyiweni indu yose Ambuje Akunnungu ŵenu iŵaatendele ŵandu ŵa ilambo yi yose kwa ligongo lyenu. Ambuje Akunnungu ŵenu ni ŵaŵaputene nawo kwa ligongo lyenu. 4 Nampele malo ga ilambo yati chiŵela nganitusumule pamo ni malo ga ilambo itwaisumwile ila, kutandilila ku lusulo lwa Yolodani chakungopochelo lyuŵa mpaka ku bahali ja Meditelaniani, chakumaswelelo lyuŵa. 5 Ambuje Akunnungu, Akunnungu ŵenu asyene, ni juchiŵatyosye ŵanyawo paujo penu, tachatopola paujo penu, nombe chilambo chao chichiŵe chenu mpela Ambuje Akunnungu, Akunnungu ŵenu, yatite kulanga. 6 Nlimbangane ni kulilolechesya kugajitichisya maloŵe gose gagalembekwe mu Chitabu cha Malajisyo ga che Musa, nkachileka chachilichose mwelemo. 7 Nkakamulangana ni ŵandu ŵa ilambo yaisigalile pasikati jenu. Nkajitanga minungu jao atamuno nkalumbila kwa kugatanga meena ga minungu jao; nkajitumichila atamuno kujikotamila. 8 Nambo nkamulangane ni Ambuje Akunnungu, Akunnungu ŵenu, mpela yankupanganya mpaka lelo jino. 9 Pakuŵa Ambuje Akunnungu ŵaŵinjile ŵandu ŵa ilambo yaikulungwa ni ŵaali ni machili ni ngapagwa namose mundu jwakombwele kumpunda ŵanyamwe mpaka lelo jino. 10 Mundu jumo pasikati jenu akukombola kwatopola ŵammagongo elufu moja, pakuŵa Ambuje Akunnungu, Akunnungu ŵenu, ni ŵaakuputana nao kwa ligongo lyenu mpela iŵatite kunlanjila. 11 Nipele nlilolechesye nnope ni kwanonyela Ambuje Akunnungu, Akunnungu ŵenu. 12 Pakuŵa, naga tingaleche malajisyo ga Ambuje Akunnungu ni kukamulangana ni ŵandu ŵa ilambo yaisigalile pasikati jenu, ni ŵanyamwe kwaula kulombela ŵandu ŵao nombe ŵanyawo kulombela ŵandu ŵenu, 13 nipele mmanyilile kusyene kuti Ambuje Akunnungu, Akunnungu ŵenu ngaajendelechele kwatopola ŵandu ŵa ilambo yi paujo penu, nambo chiiŵe chikuluchisya kukwenu ni ya chitanje. Chiiŵe lubokola lwa kumputanga, ni miŵa ja kunsomanga mmeso mpaka pachinjonasiche ni kutyoka mu chilambo chambone chi, champele Ambuje Akunnungu, Akunnungu ŵenu.

14 "Uneji sano ulendo wangu uŵandichile mpela yaili kwa ŵandu wose. Nambo ŵanyamwe wose nkumanyilila mmitima ni mumbumu syenu kuti nkati indu yambone yose yaŵansalile Ambuje Akunnungu, Akunnungu ŵenu, ngapagwa namose chimo changanachitende. Aitesile yose yalanjile. 15 Nambo, nti Ambuje Akunnungu, Akunnungu ŵenu, yatite kuikwanilisya indu yambone yose yanlanjile, kwanti iyoyopeyo Ambuje Akunnungu tannyichisye indu yose yangalumbana yasasile mpaka patanjonanje ŵanyamwe wose mu achi chilambo chambone champelenje chi. 16 Iŵaga chinliteme lilangano lyakwe Ambuje Akunnungu, Akunnungu ŵenu, liŵanlamwile kuti nlijitichisye, pachinkajaule kujitumichila minungu jine ni kujipopelela, nipele, kwaligongo lyenu Ambuje Akunnungu chatumbile kwa nnope, ni ŵanyamwe chinjonasiche kwanakamo kutyochela mu achi chilambo chambone champelenje chi."