1 Nipele Adoni Sedeki mwenye jwa ku Yelusalemu, ŵapikene kuti che Yoshua asumwile musi wa ku Ai ni kuujonanga nti muŵautendele musi wa ku Yeliko ni mwenye jwakwe. Sooni ŵapikene kuti ŵandu ŵa ku Gibeoni atesile lilangano lya chitendewele ni Ŵaisilaeli, sambano akutama pasikati jao. 2 Ngani jo jaatendekasisye ŵandu ajogope kwannope, pakuŵa musi wa ku Gibeoni waliji musi wekulungwa nti yajili misi ja chimwenye. Waliji musi wemanyiche kuupunda musi wa ku Ai, ni ŵandu ŵakwe ŵaliji ni mitima jangajogopa ngondo. 3 Kwayele che Adoni Sedeki mwenye jwa ku Yelusalemu ŵatumile utenga kwa mwenye che Hohamu jwa ku Hebuloni ni ku che Pilamu mwenye jwa ku Yalimuti ni ku che Yafia mwenye jwa ku Lakishi ni ku che Debili mwenye jwa ku Egiloni. 4 Ŵaasalile, "Ayaga kumungamusye kukwaputa ŵandu ŵa musi wa ku Gibeoni, pakuŵa atesile lilangano lya chitendewele ni che Yoshua pamo ni Ŵaisilaeli." 5 Nipele mamwenye nsano ŵa Ŵaamoli, yaani mwenye jwa ku Yelusalemu ni jwa ku Hebuloni ni jwa ku Yalimuti ni jwa ku Lakishi ni jwa ku Egiloni ŵalumbikenye pamo mipingo jao ja ŵangondo. Ŵajawile ni mipingo jao ja ngondo jose mpaka ku Gibeoni, ŵatemi kila mundu pamalo pakwe ni kuugungumuchila.

6 Nombe Ŵagibeoni ŵaatumile ŵantenga kuchigono chi che Yoshua, akula ku Giligali kula, ni ŵaasalile kuti, "Choonde nkatuleka uweji ŵakutumichila ŵenu, njise chitema kuntukamusye. Pakuŵa Ŵaamoli ŵakutama ku chilambo cha matumbi asongangenye pamo ŵangondo ŵakwe wose kukutugungumuchila uwe."

7 Nipele, che Yoshua ali ni ŵandu ŵakwe ŵangondo pamo ni ŵandu ŵaakumanyilila kuputana ngondo ŵatyosile ku Giligali. 8 Ambuje Akunnungu ŵansalile che Yoshua, "Nkaajogopa ŵandu wo, pakuŵa nampele ukombole wa kwapunda. Ngapagwa mundu jwalijose jutakombole kumputa mmwe." 9 Nipele che Yoshua ŵatyosile ku Giligali, ŵajesile chilo chose, paŵaiche ŵaagungumuchile chisisimuchile. 10 Ambuje Akunnungu ŵaalyulyugenye Ŵaamoli paujo pa Ŵaisilaeli, nombe Ŵaisilaeli ŵaauleje ŵandu achajinji akula ku Gibeoni kula. Ŵaatopwele kwa litala lyalikutuluchila ku Besi Holoni mpaka ku Aseka ni ku Makeda, ni kweleko nombe, ŵaauleje ŵandu achajinji nnope. 11 Nipele Ŵaamoli paŵaautukaga Ŵaisilaeli kwa litala lyalikutuluchila ku Besi Holoni kwaula ku Aseka, Ambuje Akunnungu ŵaatuluchisye ula ja maganga gamakulungwa kutyochela kumaunde. Ŵandu achajinji ŵaulajikwe ni maganga go kwapunda uŵaulajikwe kwa yakumenyanila ya Ŵaisilaeli.

12 Katema Ambuje Akunnungu paŵakombolesye Ŵaisilaeli kwapunda Ŵaamoli, che Yoshua ŵapopesile kwa Ambuje Akunnungu paujo pa Ŵaisilaeli wose, achitiji,

"Mmwe lyuŵa njime jii pachanya pa Gibeoni,

Mmwe mwesi njime pa lichemba lya Aiyaloni."

13 Lyuŵa lyajimi jii ni mwesi watulele, mpaka Ŵaisilaeli paŵapundile ŵammagongo ŵao. Mpela yaitite kulembekwa mu chitabu cha Yashali, lyuŵa lyajimi jii pasikati ja kwinani ni lyakaŵile kwaula kukutiŵila lyuŵa tetete. 14 Nganilikopochele lyuŵa nti lyele namose ngaliika kukopochela, lyati Ambuje Akunnungu ŵampilikanile mundu. Ambuje Akunnungu nsyene ŵaliji nkwamenyanila Ŵaisilaeli.

15 Pajamasile ngondo jila, che Yoshua ŵausile pamo ni Ŵaisilaeli wose mpaka kuchigono akula ku Giligali kula.

16 Mamwenye nsano ŵala ŵautwiche ni kulisisa mu mbugu ku musi wa ku Makeda. 17 Che Yoshua ŵapikene kuti mamwenye nsano ŵala asimanikwe ali alisisile mu mbugu ku Makeda ko. 18 Nipele che Yoshua ŵatite, "Ayaga ngagalambulile maganga gamakulungwa pannango wa mbugu jo ni kwaŵika ŵandu ŵakulindilila pelepo, 19 nambo ŵanyamwe nkatama pelepo, mwakuye ŵammagongo ŵenu nkaapute chakunyuma. Nkaalechelela kwinjila mu misi jao pakuŵa Ambuje Akunnungu, Akunnungu ŵenu, ampele ukombole wakwapunda ŵanyawo." 20 Che Yoshua pamo ni Ŵaisilaeli ŵauleje ŵandu achajinji, ŵampepe ŵakulupwiche, ŵautuchile mu misi jao jajili ni makome. 21 Nipele Ŵaisilaeli wose ŵausile salama kwa che Yoshua kuchigono akula ku Makeda kula. Ngapagwa sooni namose mundu jumo juŵaŵechete liloŵe lyakwakanila Ŵaisilaeli.

22 Nipele che Yoshua ŵatite, "Mmunukule nnango wa mbugu nkaaichenao mamwenye nsano wo." 23 Nombewo ŵaatyosisye mu mbugu mamwenye nsano ŵala, yaani mwenye jwa ku Yelusalemu ni mwenye jwa ku Yalimuti ni mwenye jwa ku Lakishi ni mwenye jwa ku Egiloni. 24 Paŵaichisye mamwenye ŵala, che Yoshua ŵaaŵilasile Ŵaisilaeli wose ni kwasalila achakulu ŵangondo uŵajawile nawo ku ngondo kuti aŵandichile ni kwaliŵatila mamwenye pa ngosi syao. Nombe ŵanyaŵala ŵatesile ilaila. 25 Che Yoshua ŵaasalile, "Nkajogopa, namose nkapwa mitima, nlimbangane ni kukola mitima jangajogopa. Pakuŵa Ambuje Akunnungu chiŵatendele yele ŵammagongo ŵenu wose uchinchiputana nawo." 26 Kanyuma, che Yoshua ŵaauleje mamwenye ŵala ni kwakoleka pa itela nsano, ni kwaleka ali ŵaakoleche pelepo mpaka ligulo. 27 Kali kaŵandichile katema ka kutiŵila lyuŵa, che Yoshua ŵalajisye kuti ŵaatulusye pa itela ni kwajasila mu mbugu jiŵalisisile jila. Ŵagaŵisile maganga gamakulungwa pa nnango wa mbungu jila gagali mpaka lelo jino.

28 Lyele lyuŵa lyo che Yoshua paŵausumwile musi ŵa ku Makeda, ŵammuleje ni lipanga mwenye ni ŵandu wose uŵaliji mu musi wo. Ngapagwa mundu juŵannesile jwanjumi. Ŵantendele mwenye jwa ku Makeda nti iŵantensile mwenye jwa ku Yeliko.

29 Nipele pakumala kutyoka ku Makeda, che Yoshua ni Ŵaisilaeli wose ŵajawile ku Libina ni kuugungumuchila musi wo. 30 Ambuje Akunnungu ŵaakombolesye Ŵaisilaeli kuusumula musi wa Libina pamo ni mwenye jwakwe ni kuutenda uŵe wao. Che Yoshua ŵaauleje kwa lipanga ŵandu wose ŵa musi ula, nganansigasya jwanjumi namose mundu jumo. Ŵantendele mwenye jwa ku Libina ilaila mpela iŵantesile mwenye jwa ku Yeliko.

31 Nipele che Yoshua ŵatyosile ku Libina pamo ni Ŵaisilaeli wose kwaula ku Lakishi, ŵausyungwile ni kuugungumuchila. 32 Ambuje Akunnungu ŵaakombolesye Ŵaisilaeli kuujigala musi wa ku Lakishi, che Yoshua ŵausumwile musi ula palyuŵa lyaaŵili. Ŵaauleje achinsyene musi wo wose, mpela iŵatesile ku Libina kula. 33 Katema kakoko che Holamu mwenye jwa ku Geseli ŵaiche kukwakamuchisya ŵandu ŵa ku Lakishi. Nambo che Yoshua ŵamputile mwenye che Holamu ni ŵandu ŵakwe, nganansigasya jwanjumi namose mundu jumo.

34 Nipele kutyochela ku Lakishi, che Yoshua ni Ŵaisilaeli wose ŵajawile mpaka ku Egiloni, ŵausyungwile musi wo ni kuugungumuchila. 35 Pa lyuŵa lilyolyo ŵausumwile musi ula ni kuutenda wao, ŵaauleje achinsyene musi ula wose mpela iŵatesile ku Lakishi kula.

36 Nipele che Yoshua ni Ŵaisilaeli wose ŵatyosile ku Egiloni ni kwaula mpaka ku Hebuloni ni kuugungumuchila musi wo, 37 ŵausumwile ni kuutenda wao. Ŵaauleje ŵandu wose uŵaliji mu musi ula pamo ni mwenye jwakwe, ni misinda jakwe ni kila mundu juŵaliji mwelemo. Nganansigasya jwanjumi namose mundu jumo nti iŵatesile ku Egiloni kula.

38 Nipele che Yoshua ni Ŵaisilaeli wose ŵausile mpaka ku Debili ni kuugunguluchila musi wo. 39 Ŵausumwile musi ula pamo ni mwenye jwakwe pamo ni misinda jine jose jijasyungwile musi wo, ŵaauleje wose ŵaali mwelemo pangansigasya jwanjumi namose mundu jumo. Ŵautendele musi wo mpela muŵautendele musi wa ku Hebuloni ni musi wa ku Libina ni mamwenye ŵakwe.

40 Yele ni iyatite che Yoshua kusumula chilambo chose ni kwapunda mamwenye wose ŵa ku itumbi ni ku lujenda ni ŵa mu iŵata ni ŵa kwichela. Nganachileka chindu chilichose chejumi, nambo ŵajonasile kila chindu mpela Ambuje Akunnungu, Akunnungu jwa Ŵaisilaeli iŵatite pakunlajisya. 41 Che Yoshua ŵaapundile ŵandu wose kutyochela ku Kadeshi Balinea mpaka ku Gasa ni kutyochela ku chilambo chose cha ku Gosheni mpaka ku Gibeoni. 42 Che Yoshua ŵaapundile mamwenye wose pamo ni ilambo yao kwanakamo pakuŵa Ambuje Akunnungu, Akunnungu jwa Ŵaisilaeli ŵaamenyanile Ŵaisilaeli. 43 Nipele che Yoshua pamo ni Ŵaisilaeli wose ŵausile mpaka ku chigono chao ku Giligali ko.