1 Gudugudu jaaŵili, jaagwilile ŵandu ŵa lukosyo lwa Simeoni ntundu kwa ntundu. Malo ga chilambo chiŵapegwilwe chaliji chisyungulikwe ni malo ga chilambo chiŵapegwilwe ŵandu ŵa lukosyo lwa Yuda. 2 Ŵandu ŵa lukosyo lwa Simeoni ŵapatile misi ja ku Beli Sheba pane ku Sheba ni ku Molada, 3 ni ku Hasali Shuali ni ku Bala ni ku Esemu, 4 ni ku Eletoladi ni ku Betuli ni ku Holima, 5 ni ku Sikilagi ni ku Beti Malikaboti ni ku Hasali Susa, 6 ni ku Beti Lebaoti ni ku Shaluheni. Misi jiŵapegwilwe jaliji misi kumi na tatu pamo ni misinda jakwe. 7 Sooni ŵapegwilwe misi ja ku Aini ni ku Limoni ni ku Eteli ni ku Ashani, misi jiŵapegwilwe jaliji ncheche pamo ni misinda jakwe. 8 Pamo ni misinda jose jijasyungulile misi jo mpaka ku Baalati Beeli, pane ku Lama jajili kulujenda. Achi chaliji chilambo chiŵapegwilwe kuŵa chao ŵandu ŵa lukosyo lwa Simeoni ntundu kwa ntundu. 9 Pakuŵa malo gaŵapegwilwe ŵandu ŵa lukosyo lwa Yuda gakusile nnope kupunda ni iŵatite pakusaka, malo gagasigalile, ŵaagaŵile ŵandu ŵa lukosyo lwa Simeoni.

10 Nombe gudugudu jaatatu jakupegwa malo, jaagwilile ŵandu ŵa kukosyo lwa Sabuloni, ntundu kwa ntundu. Malo gao gaiche mpaka ku Salidi. 11 Kutyochela kweleko mpika wao wajawile kumaswelelo lyuŵa mpaka ku Malala, wapitile mumbali mwa ku Dabesheti ni kwaula ku kasulo kakali kungopochelo lyuŵa kwa ku Yokineamu. 12 Kutyochela ku Salidi, mpika wo wajawile kungopochelo lyuŵa mpaka ku chilambo cha Kisiloti Taboli ni kutyochela kweleko wapite ku Dabelati mpaka ku Yafia. 13 Kutyochela ku Yafia wajendelechele cha kungopochelo lyuŵa mpaka ku Gati Hefeli ni kwika ku Eti Kasini, wajendelechele mpaka ku Limoni ni kweleko wagalawiche ni kwaula ku Nea. 14 Cha kumpoto mpika wagalawiche kwaula ku Hanatoni ni kumalila mu lichemba lya ku Ifita Heli. 15 Pamo ni misi ja ku Katati ni ku Nahalali ni ku Shimiloni ni ku Idala ni ku Betelehemu. Misi jose jo jaliji misi kumi na mbili pamo ni misinda jakwe. 16 Gelego ni malo gaŵapegwilwe ŵandu ŵa mitundu ja lukosyo lwa Sabuloni, misi jo pamo ni misinda jakwe.

17 Gudugudu jancheche ja kupegwa malo, jaagwilile ŵandu ŵa lukosyo lwa Isakali, ntundu kwa ntundu. 18 Malo ga chilambo chiŵapegwilwe chaliji, ku Yesileeli ni ku Kesuloti ni ku Shunemu, 19 ni ku Hafalaimu ni ku Shioni, ni ku Anahalati, 20 ni ku Labiti ni ku Kishioni, ni ku Ebesi, 21 ni ku Lemeti ni ku Eni Ganimu ni ku Eni Hada ni ku Beti Pasesi. 22 Mpika wao waiche ku Taboli, ni ku Shahasuma ni ku Beti Shemeshi ni kumalila mu lusulo lwa Yolodani. Misi jose jiŵapegwilwe jaliji misi kumi na sita pamo ni misinda jakwe. 23 Misi jo pamo ni misinda jakwe, ni jiŵapegwilwe ŵandu ŵa lukosyo lwa Isakali ntundu kwa ntundu.

24 Gudugudu jansano jakupegwa malo, jaagwililwe ŵandu ŵa lukosyo lwa Asheli, ntundu kwa ntundu. 25 Malo ga chilambo chao galiji misi ja ku Helikati ni ku Hali ni ku Beteni ni ku Akishafi, 26 ni ku Alameleki ni ku Amadi ni ku Mishali. Cha kumaswelelo lyuŵa mpika wao waiche ku chitumbi cha Kalimeli ni lusulo lwa Shiholi Libinati. 27 Nipele wagalawiche cha kungopochelo lyuŵa kwaula ku Beti Dagoni ni waiche mpaka ku Sabuloni ni lichemba lya ku Ifita Eli, wapite chakumpoto mpaka ku Beti Emeki ni ku Neiyeli mpaka kunchiji kwa Kabuli. 28 Mpika wo wajendelechele mpaka ku Abudoni ni ku Lehobu ni ku Hamoni ni ku Kana ni waiche ku Sidoni jekulu. 29 Pelepo mpika wo wagalawiche kwaula ku Lama ni waiche ku musi wa ku Tilo uwaliji ni likome. Pelepo wagalawiche kwaula ku Hosa ni kuinjila mu bahali ja Meditelania. Misi jine jijajili mwelemo jili musi wa ku Mahalabu ni ku Akisibu, 30 ni ku Uma ni ku Afeka ni ku Lehobu. Misi jose jiŵapegwilwe jaliji misi ishilini na mbili pamo ni misinda jakwe. 31 Jelejo ni misi jiŵapegwilwe ŵandu ŵa lukosyo lwa Asheli, ntundu kwa ntundu.

32 Gudugudu ja sita jakupegwa malo, jaagwilile ŵandu ŵa lukosyo lwa Nafutali, ntundu kwa ntundu. 33 Mpika wao watyochele musi wa ku Helefu ni ku chitela cha mwaloni chachili ku Saananimu, ni wapite ku Adami Nekebu ni ku Yabineeli mpaka ku Lakumu ni kumalila mu lusulo lwa Yolodani. 34 Kutyochela pelepo mpika wapite cha kumaswelelo lyuŵa kwaula ku Asinoti Taboli, ni kutyochela kweleko wapite ku Hukoki. Cha kulujenda waiche ku malo ga ŵandu ŵa lukosyo lwa Sabuloni, ni chakumaswelelo lyuŵa waiche mpaka ku malo ga ŵandu ŵa lukosyo lwa Asheli, ni ŵaiche ku malo ga ŵandu ŵa lukosyo lwa Yuda. Cha kungopochelo lyuŵa mpika wajinjile mu lusulo lwa Yolodani. 35 Misi jao jajili ni makome jaliji, ku Sidimu ni ku Seli ni ku Hamati ni ku Lakati ni ku Kineleti, 36 ni ku Adama ni ku Lama ni ku Hasoli, 37 ni ku Kedeshi ni ku Edilei ni ku Eni Hasoli, 38 ni ku Yiloni ni ku Migidali Eli ni ku Holemu ni ku Beti Anati ni ku Beti Shemeshi. Misi jose jiŵapegwilwe jaliji misi kumi na tisa pamo ni misinda jakwe. 39 Jele misi jo pamo ni misinda jakwe jaliji mu chilambo chiŵapegwilwe kuŵa jao, ŵandu ŵa lukosyo lwa Nafutali ntundu kwa ntundu.

40 Gudugudu ja saba ja kupegwa malo jaagwilile ŵandu ŵa lukosyo lwa Dani, ntundu kwa ntundu. 41 Malo ga chilambo chao chaliji ni misi ja ku Sola ni ku Eshitaoli ni ku Ili Shemeshi, 42 ni ku Shaalabini ni ku Aiyaloni ni ku Yitila, 43 ni ku Eloni ni ku Timina ni ku Ekiloni, 44 ni ku Eliteke ni ku Gibetoni ni ku Baalati, 45 ni ku Yehudi ni ku Bene Belaki ni ku Gati Limoni, 46 ni ku Me Yalikoni ni ku Lakoni ni chilambo chachikulolegana ni musi wa ku Yafa. 47 Ŵandu wa lukosyo lwa Dani paŵapotesye chilambo chao, ŵapite kukuugunguluchila musi wa ku Leshemu. Ŵaapundile ni kuusumula musi ula, ni paŵamasile kwaulaga ŵaakutama mmusi wose, ŵautesile musi wo kuŵa wao. Ŵatemi ku Leshemu ni kupaŵilanga lina lya Dani, liina lilyaliji lya ambuje ŵao. 48 Misi ji ni misinda jakwe ŵapegwilwe ŵandu ŵa lukosyo lwa Dani ntundu kwa ntundu.

49 Nipele paŵamasile kugaŵana malo gose ga chilambo, Ŵaisilaeli ŵaapele che Yoshua mwana ju che Nuni malo gagali pasikati jao kuti gaŵe gao. 50 Malinga ni malajisyo ga Ambuje Akunnungu, ŵaapele musi uŵasachile nsyene, yaani musi wa ku Timinati Sela wauli mu chilambo cha matumbi ga ku Efulaimu. Nombe che Yoshua ŵautaŵile sooni musi wo ni kutama mwelemo.

51 Nipele, che Eliasali jwambopesi ni che Yoshua mwana ju che Nuni, pamo ni ilongola wa ngosyo sya Ŵaisilaeli, ŵagaŵenye malo go kwa kutenda gudugudu paujo pa Ambuje Akunnungu, pannango wa Lisakasa lya Kusimanilana kwaligongo lya Akunnungu kwele ku Shilo ko. Nipele ŵamasile kuchigaŵanya chilambo cho.