1 Gelega gali malo gaŵapochele Ŵaisilaeli kuti gaŵe gawo mu chilambo cha Kanaani, gati jwambopesi che Eleasali ni che Yoshua mwana ju che Nuni ni ilongola ŵa ngosyo sya Ŵaisilaeli ŵaagaŵile Ŵaisilaeli. 2 Ŵagagaŵenye malo go kwa kutenda gudugudu mpela Ambuje Akunnungu iŵatite pakwalajisya che Musa, ŵaapele chakungopochelo lyuŵa kwa lusulo lwa Yolodani asila ngosyo tisa ni nusu sila. 3 Che Musa ŵaapele ngosyo siŵili ni nusu malo gagali kungopochelo lyuŵa kwa lusulo lwa Yolodani, nambo nganiŵapa Ŵalawi malo galigose kuti gaŵe gao pasikati ja ŵanyawo. 4 Ŵanache ŵa che Yusufu ŵaliji agaŵanyiche pa ngosyo siŵili, yaani lukosyo lwa Ŵamanase ni lukosyo lwa Ŵaefulaimu. Lukosyo lwa Ŵalawi nganapata lisi nambo ŵapatile misi pe kwa ligongo lya kutama, ni malo gakulichisya ngondolo ni mbusi pamo ni ng'ombe syao. 5 Kwayele Ŵaisilaeli ŵagaŵene chilambo cho mpela Ambuje Akunnungu iŵanlajisye che Musa.

6 Lyuŵa limo ŵandu ŵa lukosyo lwa Yuda ŵanjaulile che Yoshua ku Giligali, nombe che Kalebu mwana ju che Yefune juŵaliji jwa ntundu wa Ŵakenisi ŵaasalile che Yoshua, "Nkuchimanyilila Ambuje Akunnungu chiŵasalile che Musa, mundu jwa Akunnungu nkati mmwe ni une patwaliji ku Kadeshi Balinea? 7 Panaliji ni yaka alobaini katema che Musa jwakutumichila jwa Ambuje Akunnungu, paŵandumile kutyochela ku Kadeshi Balinea kwaula kukuuchilichisya chilambo cho. None naapelechele ngani ja kwele mpela inatite kukulupilila muntima mwangu, 8 nambo ŵandu unalongene nao ŵaajogoyisye ŵandu. Nambo une nankulupilile Ambuje Akunnungu kwa ntima wose. 9 Pa lyuŵa lyo che Musa ŵanumbilile, ‘Kusyene achila chilambo chinchiliŵete chila chichiŵe chenu ni ŵanache ŵenu moŵa gose pangali mbesi. Pakuŵa mwakuiye mwakukulupilichika Ambuje Akunnungu, Akunnungu ŵenu.’ 10 Nambo, sambano mumbilikanichisye, Ambuje Akunnungu anesile jwanjumi kwa yaka alobaini ni nsano kutandilila Ambuje Akunnungu paŵaŵechete ni che Musa, katema Ŵaisilaeli paŵapitaga mwipululu, sambano ngwete yaka semanini na tano. 11 Chiŵela ngwete machili mpela munaŵelele akala katema kaŵandumile che Musa. Namose sambano ngwete machili ga kuputana ngondo ni kupanganya masengo gane galigose. 12 Nipele sambano muumbe achi chilambo cha ikwesya, chati Ambuje Akunnungu ŵananjile palyuŵa lila. Mmwe mwapilikene katema kala, kuti Ŵaanaki ŵaliji kweleko ni misi jao jaliji jekulungwa jajili ni makome, nambo kwa ukamuchisyo wa Ambuje Akunnungu, chinaatopole atyoche kweleko mpela muŵaŵechete."

13 Kwayele che Yoshua ŵampele upile che Kalebu mwana ju che Yefune, ni ŵapele musi wa ku Hebuloni kuti uŵe ŵakwe. 14 Kwayele kutandilila katema ko musi wa ku Hebuloni uli wa ŵanache ŵa che Kalebu mwana ju che Yefune jwa ntundu wa Ŵakenisi mpaka lelo, pakuŵa ŵaliji jwakukulupilichika kwa ntima wao wose kwa Ambuje Akunnungu, Akunnungu ŵa Ŵaisilaeli. 15 Kundanda ko musi wo waŵilanjikwe Kiliati Alaba. Che Alaba ŵaliji mundu jwakumanyika kwa machili kwapunda wose pasikati ja Ŵaanaki.

Nipele chilambo chose chatulele pangali ngondo.