1 Nipele, mamwenye wose ŵaŵaliji peesi ja lusulo lwa Yolodani ni ku itumbi ni mmachemba ni mbwani jose ja Bahali ja Meditelania jajikulolegana ni Lebanoni, yaani: Mwenye jwa Ŵahiti ni mwenye jwa Ŵaamoli ni mwenye jwa Ŵakanaani ni mwenye jwa Ŵapelisi pamo ni mwenye jwa Ŵahivi ni mwenye jwa Ŵayebusi, paŵapikene ngani sya Ŵaisilaeli, 2 ŵasongangene pamo kwa nningwa umo kuti aputane ni che Yoshua ni Ŵaisilaeli.

3 Nambo ŵandu ŵa ku Gibeoni paŵapikene ngani ja aila yose yati che Yoshua ŵaatendele ŵandu ŵa ku Yeliko ni ŵandu ŵa ku Ai, 4 ŵalambwisye. Ŵajawile achilitendaga nti ŵantenga, ŵajigele mbunda syasijigele magunia gakuwisala ni misaku ja mapende jewisale ni kupapuka ni kutotekwa, 5 ŵawete italawanda yepoweche ni kutotekwa ni iŵalo yewisale ni mikate jao jose jaliji jejumule na kuchesuka. 6 Nombewo ŵanjaulile che Yoshua ku chigono ku Giligali kula ni kwasalila che Yoshua ni Ŵaisilaeli, "Uwe tutyosile ku chilambo chakutalika, kwayele tuŵichilane lilangano."

7 Nipele Ŵaisilaeli ŵaasalile Ŵahivi, "Panepa nkutama chiŵandi ni uwe, chiikomboleche chinauli kuŵichilana lilangano ni ŵanyamwe?"

8 Nombe ŵanyawo ŵanjanjile che Yoshua, "Uwe tuli ŵakutumichila ŵenu."

Che Yoshua ŵausisye, "Ŵanyamwe nlinji achiŵani? Nkutyochela kwapi?"

9 Nombe ŵanyawo ŵanjanjile, "Alakwe uwe ŵakutumichila ŵenu, tutyochela ku chilambo chatalika nnope, kwaligongo lya liina lya Ambuje Akunnungu, Akunnungu ŵenu. Tupilikene nkati kulapikwa kwa Akunnungu wenu ni yose iŵaitesile akula ku Misili kula. 10 Nombe tupilikene iŵaatesile mamwenye ŵaŵili ŵa Ŵaamoli ŵaŵatamaga kungopochelo lyuŵa kwa Yolodani, yaani, mwenye che Sihoni jwa ku Heshiboni ni mwenye che Ogu jwa ku Bashani juŵatawalaga ku Ashitaloti. 11 Nipele achachekulu ŵetu ni aŵala wose ŵaakutama mu chilambo chetu ŵatusalile, tujigalanje masulufu, tuiche kukusimana ni ŵanyamwe ni kunsalila, uweji tuli ŵakutumichila ŵenu, mmiche lilangano niuwe. 12 Nnole, awu nkate wu waliji ni mooto patwaujigele mmajuumba getu patwatandaga ulendo wa kwika kukwenu, nambo sambano ujumwile ni kuchesuka. 13 Misaku ja mapende jitutasile divai ji jaliji jasambano, nambo nnole ijitite kupapuka. Iwaalo yetu ni italawanda yetu iwisele ligongo lya ulendo watalika."

14 Nipele Ŵaisilaeli ŵapochele yakulya ila pangausya kaje ushauli kwa Ambuje Akunnungu. 15 Pelepo che Yoshua ŵatesile lilangano lya chitendewele ni ŵanyawo, lyakwaleka ali ŵajumi. Ilongola ŵa nsongangano wa Ŵaisilaeli ŵaalumbilile kuitendekanya nti yalangene.

16 Lyuŵa lya tatu kutyochela paŵaŵichilene lilangano, Ŵaisilaeli ŵapilikene kuti ŵandu ŵala ali ŵakuŵandikana nawo. 17 Nipele, Ŵaisilaeli ŵautandite ulendo ni palyuŵa lyaatatu ŵaiche ku misi ja ŵandu ŵala, yaani ku Gibeoni ni ku Kefila ni ku Beeloti ni ku Kiliati Yealimu. 18 Nambo Ŵaisilaeli nganiŵaputa, pakuŵa ilongola ŵa Ŵaisilaeli ŵaliji ŵaalumbililile kwa lina lya Ambuje Akunnungu, Akunnungu jwa Ŵaisilaeli. Pele nsongangano wose ŵadadawile nkati ilongola wo. 19 Nambo ilongola ŵala ŵaujanjile nsongangano ula, ŵatite, "Uwe tuŵisile lilangano kwakwalumbilila kwa Ambuje Akunnungu, Akunnungu jwa Ŵaisilaeli, nipele sambano ngatukukombola kwakwaya ŵanyawo. 20 Yeleyi ni ichitwatendele ŵanyawo, chitwaleche ŵajumi kuti tukajamuchikwa ligongo lya chilumbilo chitwalumbilile. 21 Mwaleche ŵajumi nambo chateme sasu ni kuteka meesi kwaligongo lya Ŵaisilaeli wose." Yeleyo ni iŵatite kusalilwa ni ilongola ŵetu.

22 Nipele che Yoshua ŵaŵilasile Ŵagibeoni ni kwausya, "Kwachichi ntulambwisye nchitiji nkutyochela ku chilambo chakutalika akuno ŵanyamwe nkutama pachiŵandi ni uwe? 23 Sambano ŵanyamwe nlweesekwe, ŵandu ŵenu chaŵe achikapolo, chateme sasu ni kuteka meesi kwaligongo lya nyuumba ja Akunnungu ŵangu."

24 Ŵanyawo ŵanjanjile che Yoshua, "Twatesile yeleyo uwe ŵakutumichila ŵenu pakuŵa twapikene pangasisika yakuti Ambuje Akunnungu, Akunnungu ŵenu ŵanlamulile che Musa ŵaaulaje ŵandu wose ŵa nchilambo chi ni kwapa ŵanyamwe. Lyele ni ligongo twatesile yele pakuŵa twajogwepe kuti ŵanyamwe nkatuuleje. 25 Sambano nnole tuli mmakono mwenu, nipele ntutendele inkuti kwiwona kuti ili yambone kututendela." 26 Nipele che Yoshua ŵaukulupwisye umi wa ŵandu ŵala, nganiŵalechela Ŵaisilaeli ŵaulaje. 27 Kutandilila lyele lyuŵa lyo, che Yoshua ŵaatesile aŵeje ŵakutema sasu ni ŵakuteka meesi kwaligongo lya nsongangano wose wa Ŵaisilaeli ni kwaligongo lya chilisa cha Ambuje Akunnungu, papalipose paasagwile Ambuje Akunnungu, yele ni yaitite kuŵa mpaka lelojino.