1 Ŵandu ŵa lukosyo lwa Manase juŵaliji mwanache jwakwitiwo ju che Yusufu, nombe ŵapegwilwe malo gao kwa kutenda gudugudu. Che Makili mwanache jwakwitiwo ju che Manase ŵaliji atatigwe che Gileadi, ŵapegwilwe misi ja ku Gileadi ni ku Bashani, pakuŵapo ŵaliji jwakulimbangana ku ngondo. 2 Ŵandu ŵane ŵaŵasigalile mu lukosyo lwa Manase ŵapegwilwe malo gao kwa kutenda gudugudu malinga ni mitundu jao. Mitundu jo ni aji, ntundu wa Abieseli ni ntundu wa Heleki ni ntundu wa Asilieli ni ntundu wa Shekemu ni ntundu wa Hefeli ni ntundu wa Shemida. Aŵa ni achalume ŵa uŵelesi u che Manase mwana ju che Yusufu, ŵelewo ni ŵaŵaliji achakulu ŵa mitundu jao.

3 Nambo che Selofehadi mwana ju che Hefeli mwana ju che Gileadi mwana ju che Makili jwali mwana ju che Manase, nganakola mwanache jwannume, ŵakwete ŵanache ŵachikongwe pe. Mena gao galiji: Che Mala ni che Noa ni che Hogila ni che Milika pamo ni che Tilisa. 4 Achiŵali ŵala ŵajaulile jwambopesi che Eleasali ni che Yoshua mwana ju che Nuni ni ilongola ŵane ni kwasalila, "Ambuje Akunnungu, ŵaalajisye che Musa atugaŵile ni uweji wose chilambo mpela inkuti kwatendela achalume ŵa mu lukosyo lwetu." Nipele mpela iŵatite pakulajisya Ambuje Akunnungu, che Yoshua ŵaagaŵile malo gao mpela iŵaagaŵile achalume ŵa mulukosyo lwao. 5 Kwayele lukosyo lwa Manase ŵapegwilwe malo likumi ga chilambo pamo ni malo ga ku Gileadi ni ku Bashani, gagali chakungopochelo lyuŵa kwa lusulo lwa Yolodani, 6 pakuŵa achiŵali ŵa lukosyo lwa Manase ŵapegwilwe malo mpela iŵatite pakupegwa achalume wa mu lukosyo lwao. Chilambo cha ku Gileadi chaliji cha uŵelesi ŵa ŵanache ŵa che Manase uwasigalile.

7 Malo ga ŵandu ŵa lukosyo lwa Manase, gatandilile ku Asheli ni kwaula mpaka ku Mikimetati, kungopochelo lyuŵa kwa Shekemu. Mpika wo wajendelechele chakulujenda mpaka ku chilambo cha ŵandu ŵa ku Entapua. 8 Chilambo cha Tapua chaliji chakwe che Manase, nambo musi wa ku Tapua wauli mumpika, waliji wakwe uŵelesi wa che Efulaimu. 9 Mpika wo wajendelechele mpaka ku kasulo ka Kana. Jaapali misi ja Ŵaefulaimu jijawanganyiche ni misi jine ja Manase. Nombe mpika wa ŵandu ŵa lukosyo lwa Manase wapitile chakumpoto kwa kasulo ka kana ni kumalila ku bahali ja Meditelaniani. 10 Malo ga kulujenda galiji ga lukosyo lwa Ŵaefulaimu, ni malo ga kumpoto galiji ga lukosyo lwa Manase, mpika wakwe waliji bahali ja Meditelaniani chakumaswelelo lyuŵa. Ŵandu ŵa lukosyo lwa Asheli ŵaliji chakumpoto ni chakumaswelelo lyuŵa kwa malo ga lukosyo lwa Manase, ni chakumpoto ni chakungopochelo lyuŵa kwaliji ni lukosyo lwa Isakali. 11 Iyoyo peyo ku chilambo cha ŵandu ŵa lukosyo lwa Isakali ni lukosyo lwa Asheli, lukosyo lwa Manase ŵapegwilwe misi ja ku Beti Sheani ni ku Ibuleamu pamo ni misinda jakwe, ni misi ja ku Doli ni ku Eni Doli, ni ku Taanaki ni ku Megido pamo ni ŵandu ŵakutama mu misinda jakwe, ni liunjili limo mwa maunjili gatatu ga musi wa ku Nafati. 12 Nambo iŵelesi ya Manase nganaakombola kwatopola achinsyene misi jo, pakuwa Ŵakanaani ŵakanganichile kutama mwelemo. 13 Namuno Ŵaisilaeli paŵakwete machili nnope, nganiŵatopola Ŵakanaani nambo ŵakanganichisye kupanganya masengo gakulimba.

14 Ŵandu ŵa uŵelesi u che Yusufu ŵanjaulile che Yoshua ni kwasalila, "Ligongo lyachi ntugaŵile liuto limo pe lya chilambo, uweji ŵati Ambuje Akunnungu atupele upile kwichila kututenda tuŵe ŵajinji nnope?"

15 Che Yoshua wajanjile, "Naga ŵanyamwe nli achajinji nnope ni chilambo cha matumbi cha Efulaimu ngachikunkwana sooni, nipele njaule kumatinji mu chilambo cha Ŵapelisi ni Ŵalefai, nkakate litinji lyo ni kutenda ndamo jenu kweleko."

16 Ŵanyawo ŵajanjile, "Isyene, achi chilambo cha matumbi chi ngachikukwana, namose yeleyo aŵala Ŵakanaani wose ŵakutama mu ilambo yakwiŵata akwetenje mutuka sya isyano syasikukwekwelemwa ni inyama, nombe ŵakutama ku Beti Shani pamo ni misinda jakwe ni aŵala ŵakutama mu lichemba lya Yeseleeli."

17 Nipele, che Yoshua ŵaasalile ŵandu wa uŵelesi u che Yusufu yaani lukosyo lwa Ŵaefulaimu na Manase, "Kusyene ŵanyamwe ntupile kwa nnope ni nkwete machili gamajinji nnope. Ngaikusachilwa nkole malo jimo pe. 18 Chilambo cha matumbi chachili ni litinji chichiŵe chenu, nkafyeche kutandilila kumbesi kwa upande umo wa mpika mpaka kumbesi kwa upande wine, pelepo ni pachichiŵe chenu. Namuno Ŵakanaani wo akwete mutuka sya isyano syasikukwekwelemwa ni inyama, nombe akwetenje machili nambo chimwatopole."