1 Nipele, che Yoshua mwana ju che Nuni ŵaatumile ŵandu ŵaŵili kwa chisyepela kutyochela ku Shitimu ajaule kukuuchilichisya chilambo, nnopennope musi wa ku Yeliko. Paŵaiche mu musi ula ŵapite kugona ku nyuumba ja jwachigwagwa lina lyakwe che Lahabu.

2 Mwenye jwa ku Yeliko ŵapikene kuti Ŵaisilaeli ŵampepe aiche chilo kukuuchilichisya chilambo. 3 Kwayele mwenye ŵatumile utenga ku che Lahabu ni kwasalila, "Mwakoposye ŵandu ŵajinjile munyumba jenu pakuŵa aiche kukuuchilichisya chilambo chose." 4 Nambo che Lahabu ŵaliji ŵaasisile aŵala ŵandu ŵaŵili ŵala. Nipele ŵaajanjile, "Ŵaiche achalume nambo ngangukumanyilila kwatyochele, 5 ni pakaiche katema kakuugala nnango wekulungwa wa musi, chili chitandite chipi ŵandu wo ŵatyosile. Une ngangukumanyilila kwajinjilile, mwakuye chitema panjipa chimwasimane." 6 Nambo, che Lahabu ŵaliji ŵakwesisye ŵandu ŵala pachanya nyuumba ni kwaunichila ni mipesi ja mmela waukuŵilanjikwa kitani jiŵajaniche pedali pala. 7 Nipele aŵala ŵandu ŵaŵalajiswe ni mwenye ŵala ŵaakuiye kwa litala lyalikwaula pakombochela lusulo lwa Yolodani. Natyoka pe ŵandu ŵala, nnango wekulungwa wa musi ula waugalikwe. 8 Akanaŵe kugona ŵakuuchilichisya ŵala, che Lahabu ŵaajaulile pedali pala, 9 ŵaasalile, "Nguimanyilila kuti Ambuje Akunnungu ampele chilambo chi. Kwayele tugumbele lipamba lyekulungwa ni kila mundu atengwiche kwa kunjogopa ŵanyamwe. 10 Pakuŵa tupikene iŵatite Ambuje Akunnungu, pakugajumusya meesi ga bahali ja Shamu mbujo mwenu pamwatyokaga ku Misili. Nombe twapikene imwatendele che Sihoni ni che Ogu aŵala mamwenye ŵaŵili ŵa Ŵaamoli, ŵaŵaliji peesi ja lusulo lwa Yolodani, ŵati mwaauleje kusyene. 11 Ni uweji patwapikene yeleyo, twapwele ntima wose, twamalilwe ni machili ligongo lyenu pakuŵa Ambuje Akunnungu, Akunnungu ŵenu, ali Akunnungu ŵa penani kwinani ni paasi chilambo. 12 Nipele sambano munumbilile kwa Ambuje Akunnungu, kuti chimundendele indu yambone uneji ni achalongo achinjangu mpela indesile indu yambone kukwenu, mumbe chimanyisyo chisyenesyene, 13 Nnanjeje kuti ngamwaaulaga atati ni achikulu ŵangu, pamo ni achapwanga wose ŵachilume ni ŵachikongwe ni ulongo wangu wose, ngankunda kuti tuulajikwe."

14 Ŵakuuchilichisya ŵala ŵanjanjile che Lahabu, "Umi wenu uli umi wetu. Iŵaga ngamunsalila jwalijose nkati achi chindu chitukuchitenda chi, Ambuje Akunnungu pachaachitupa chilambo chi chituntendele kwa wema ni kwa chikulupichiko mmwe ni achalongo achinjenu, ngammulajikwa."

15 Nipele che Lahabu ŵaatulwisye ŵandu ŵala kwa ngoji pa lidilisha lya likumba lya musi pakuŵa nyuumba jao jataŵikwe mwakamulana ni likumba lya musi wa Yeliko. 16 Waasalile, "Njaulangane nkalisise ku itumbi kuti ŵandu ŵakunkuya akansimana. Nkatame kweleko moŵa gatatu mpaka ŵandu wo pachauje pa musi, pelepo ni mmujileje kuntyosile."

17 Ŵakuuchilichisya ŵala ŵansalile, "Uweji tututende kusyene chiindu chintutesile tulanje kwa kulumbilila. 18 Mmweji chintende yeleyi: Pachitujinjile mu chilambo chi ntaŵilile aji ngoji jechejeu ji apa pedilisha pantutuluchisye pa. Mwasonganganye pa nyuumba jenu atati ni achikulu ŵenu ni achapwenu wose ni achalongo wose ŵa atati ŵenu. 19 Mundu jwalijose mwa ŵelewo jutakopoche mu nyuumba jenu ni kwaula paasa, malalatilo ga chiwa chakwe chigaŵe kwa nsyenejo. Nambo mundu jwalijose jutaŵe mu nyuumba jenu aulajikwaga, nipele malalatilo ga chiwa chao chigaŵe getu. 20 Nambo mwaasalilaga ŵandu itukuitendekanya, nipele ngatutaŵikwa ni chilumbilo chitunlumbilile chi." 21 Che Lahabu ŵakundile ni kwasalila "Iŵeje mpela intite pakusala." Nipele ŵaalesile ajaulangane, ni ŵanyawo ŵatyosile. Nombejo ŵataŵilile ajila ngoji jechejeu jila pedilisha pala.

22 Wandu ŵala ŵatyosile ŵajawile ku itumbi kukulisisa kwa moŵa gatatu. Aŵala ŵandu ŵaŵatumikwe kwakuya ŵasosilesosile pangaawona ni ŵausile ku Yeliko. 23 Pelepo ŵakuuchilichisya ŵaŵili ŵala ŵatandite kuuja. Ŵatulwiche ku itumbi kula ni komboka lusulo ni kunjaulila che Yoshua mwana ju che Nuni, ni ŵansalile yose iyatyochele. 24 Ŵansalile che Yoshua kuti, "Tukuimanyilila kusyene kuti Ambuje Akunnungu atupele chilambo chose, pakuŵa achinsyene chilambo cho akutetemela kwa lipamba kwa kutujogopa uwe."