Josué 5

1 Nipele mamwenye wose ŵa Ŵaamoli ŵaŵatamaga kumaswelelo lyuŵa kwa lusulo lwa Yolodani ni mamwenye wose ŵa ku Kanaani ŵaŵatamaga ku mbwani ja bahali ja Meditelania, paŵapilikene kuti Ambuje Akunnungu, ŵagajumwisye meesi ga lusulo lwa Yolodani ligongo lya Ŵaisilaeli mpaka paŵamasile komboka, ŵajogwepe kwannope, ni mitima jao jagumbele lipamba kuputana ni Ŵaisilaeli.

Kuumbaswa kwa achalume ŵa Chiisilaeli ku Giligali

2 Katema ko Ambuje Akunnungu ŵansalile che Yoshua, "Nsepe maganga gakulimba gaŵe mpela ipuula yakutema mwaumbasye Ŵaisilaeli." 3 Nipele, che Yoshua ŵatesile mpela iŵalajichikwe ni Ambuje Akunnungu, ŵasepile maganga gagaliji mpela ipuula yakutema, ŵaaumbesye Ŵaisilaeli ku Gibeati Haalaloti. 4 Ligongo li che Yoshua kwaumbasya lyaliji lyeleli: Ŵaisilaeli achalume wose ŵaŵatyosile ku Misili ŵaŵaliji ni lisusa lya kwaula ku ngondo, ŵanawose ŵajasiche ku chipululu ali nkwaula ku Kanaani, pakumala kutyoka ku Misili. 5 Achalume wose ŵaŵatyosile ku Misili ŵaumbele, nambo ŵaŵapagwile mwipululu ali mwitala kutyochela ku Misili ŵaliji nganaumbale. 6 Ŵaisilaeli ŵajesile kwa yaka alobaini mu ukweti, mpaka achalume wose uŵaliji ni lisusa lya kwaula kungondo katema kaŵatyokaga ku Misili paŵajasiche, ligongo lya ungaapilikanichisya Ambuje Akunnungu, ni Ambuje Akunnungu ŵaalumbilile yakuti ngasachiwona chilambo chati Ambuje Akunnungu ŵalanjile achatati ŵao kuti chiŵape, chilambo chambone chachikufai kulima ni kulanga ilango yejinji. 7 Ŵelewo ŵaliji ŵanache uŵapagwile ni kukula pakumala chipago cho, ŵelewo ni uŵaumbesye che Yoshua pakuŵa ŵaliji nganaumbale paŵaliji mu ulendo mu ukweti.

8 Achalume wose paŵamasile kuumbala, jwalijose jwatemi pamalo pakwe pachigono pala mpaka paŵalamile. 9 Ambuje Akunnungu ŵansalile che Yoshua, "Lelo jino nantyosisye ajila soni ja ungaumbala." Kwayele peuto pala paŵilanjikwe Giligali mpaka lelo jino.

10 Ŵaisilaeli paŵaŵisile chigono ku Giligali ko ŵatesile chindimba cha Pasaka ligulo palyuŵa lya kumi na nne lya mwesi wo, mu lichemba lya ku Yeliko. 11 Lyuŵa lyaaŵili pakumala Pasaka ŵalile mikate jangataga amila ni mbeju sya ngano syekalanje kutyochela mmagungulo ga mu chilambo chila. 12 Nipele kutandilila pa lyuŵa lila Ŵaisilaeli paŵalile magungulo ga mu chilambo chila, chakulya chachikuŵilanjikwa mana nganichipagwa sooni. Kutandilila pelepo Ŵaisilaeli ŵalile yakulya yaityochele ni magungulo ga chilambo cha ku Kanaani.

Che Yoshua akukunguluka ni chilongola jwa ŵangondo ŵa Ambuje Akunnungu

13 Lyuŵa limo che Yoshua ŵajawile ku Yeliko, paŵaŵandichile mu mmusi wo, chisisimuchile ŵammweni mundu ajimi mmbujo ali ajigele lipanga mmakono. Che Yoshua ŵanjaulile ni kummusya, "Mmwe nli upande chi, wetu uwe pane nli upande wa ŵammagongo ŵetu?"

14 Mundu jula ŵajanjile, "Ngwamba, une nganima upaande wenu atamuno ngangunkanila, une ndili jwankulu jwa ŵangondo ŵa Ambuje Akunnungu iiche sambano."

Che Yoshua ŵatindiŵele ni kukotama mpaka paasi kwa luchimbichimbi ni ŵatite, "Ambuje Akunnungu une ndili jwakutumichila jwenu, nkusaka ndende ichichi?"

15 Chilongola jwa ŵangondo ŵa Ambuje Akunnungu ŵansalile che Yoshua, "Mmule ilatu yenu pakuŵa peuto panjimi po pali papaswela." Che Yoshua ŵatesile mpela iŵatite pakusalilwa.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?