1 Nipele che Yoshua ŵaaŵilasile ŵandu ŵa ngosyo sya Lobeni ni Gadi ni nusu ja ŵandu ŵa lukosyo lwa Manase, 2 ŵaasalile, "Ntesile yanayose yannajisye che Musa jwakutumichila jwa Ambuje Akunnungu, ni sooni ngapilikanichisye agala gose ginanlajisye. 3 Moŵa gose ga nganimwaleka Ŵaisilaeli achinjenu namose kamo, mpaka lelo jino, nambo mmalisisye agala gose gati Ambuje Akunnungu, Akunnungu ŵenu ŵanlajisye. 4 Sambano Ambuje Akunnungu ŵaapele Ŵaisilaeli achinjenu chitendewele mpela iŵatite pakulanga, nipele mmujangane kumangwenu mu chilambo chati che Musa jwakutumichila jwa Ambuje Akunnungu ampele ŵanyamwe chiŵe chenu, peesi ja lusulo lwa Yolodani. 5 Nambo nlilolechesye kugakamulichisya makanyo ni malajisyo gaŵampele che Musa jwakutumichila jwa Akunnungu, mwanonyele Ambuje Akunnungu, Akunnungu ŵenu, ni kugakuya gakugasaka ni kugakamulichisya makanyo gakwe. Mmeje ŵakukulupilichika kukwakwe, ni kwatumichila kwa ntima wenu wose ni mbumu jenu jose." 6 Nipele che Yoshua ŵaapele upile ni kwalanga ajaulangane mmangwawo. 7 Nusu ja ŵandu ŵa lukosyo lwa Manase che Musa ŵaliji ŵapele chilambo cha ku Bashani, chakungopochelo lyuŵa kwa lusulo lwa Yolodani.

Nambo nusu jine jo, che Yoshua ŵaapele chilambo cha kumaswelelo lyuŵa kwa Yolodani, mpela iŵatite pakwapa ngosyo sine. Che Yoshua paŵaalanjile ajaulangane mmangwawo, ŵaapele upile, 8 achitiji, "Mmujangane mmangwenu nli nsichile kwannope, mipingo ja ilango, ni madini ga feza ni sahabu ni shaba ni isyano, ni yakuwala yejinji. Nkagaŵane ni achalongo achinjenu yele indu imwasumwile ŵammagongo ŵenu."

9 Nipele ŵandu ŵa ngosyo sya Lobeni ni Gadi ni nusu ja ŵandu ŵa lukosyo lwa Manase ŵalekangene ni ŵandu ŵa ngosyo sine sya ku Isilaeli kwele ku Shilo ku chilambo cha ku Kanaani. Ŵausile mmangwawo ku chilambo cha ku Gileadi, mu chilambo chao achinsyene chiŵachijigele kwa malajisyo ga Ambuje Akunnungu mpela iŵatite kwalajisya che Musa.

10 Ŵandu ŵa ngosyo sya Lobeni ni Gadi ni nusu ja ŵandu ŵa lukosyo lwa Manase paŵaiche ku Geliloti, ali chiŵela cha kumaswelelo lyuŵa kwa Yolodani, ŵataŵile chilisa chachikulungwa, mungulugulu lusulo lwa Yolodani. 11 Ŵaisilaeli ŵane ŵala ŵapilikene kuti ŵandu ŵa ngosyo sya Lobeni ni Gadi ni nusu ja ŵandu ŵa lukosyo lwa Manase ataŵile chilisa ku Geliloti, ku malo jao, chakumaswelelo lyuŵa kwa lusulo lwa Yolodani. 12 Nipele, Ŵaisilaeli paŵapilikene ngani jo, ŵanawose ŵasongangene ku Shilo, kwaula kukuputana ngondo ni ŵandu ŵa ngosyo sya ku ngopochelo lyuŵa.

13 Kwayele, Ŵaisilaeli ŵane wo ŵantumile che Finehasi mwana jwa jwambopesi che Eleasali, ajaule kwa ŵandu ŵa ngosyo sya Lobeni ni Gadi ni nusu ja ŵandu ŵa lukosyo lwa Manase. 14 Che Finehasi ŵajawile pamo ni achakulu likumi, kutyochela ku ngosyo syose sya Isilaeli, jwalijose jwaliji jwankulu jwa ntundu pa lukosyo lwakwe. 15 Paŵaichenje ku Gileadi kwa ŵandu ŵa ngosyo sya Lobeni ni Gadi ni nusu ja ŵandu ŵa lukosyo lwa Manase, ni ŵaasalile, 16 "Nsongano wose wa Ambuje Akunnungu ukuusya, ‘Ana nkombwele chinauli kuleka kwakulupilila Ambuje Akunnungu jwa ku Isilaeli kwa kutenda chindu mpela achi? Nkombwele chinauli kwaleka Ambuje Akunnungu, ni sambano kulitaŵila chilisa kwa ligongo lyenu mwaachinsyene, ni kwaleka kwendelechela kwakuya Ambuje Akunnungu? 17 Nkumbuchilanje sambi jitwajitesile ku Peoli, apala Ambuje Akunnungu paŵaajamwiche ŵandu ŵakwe nsyene kwa ulwele uwaauleje ŵandu ŵajinji. Ngankwiwona kuti tuli chiŵela mkulaga kwaligongo lya ulwele wo. Ana sambi jo nganijitukwana? 18 Kwa chichi nkukana kwakuya Ambuje Akunnungu? Mwakanaga kwakuya Ambuje Akunnungu lelo, malaŵi tachiutumbilila nsongano wose wa Ŵaisilaeli. 19 Iŵaga chilambo chenu chinkutama ngachikukundikwa kwa kwapopelela Ambuje Akunnungu, njombocheje, nnyichanje ku chilambo cha Ambuje Akunnungu kwalili Lisakasa lya Ambuje Akunnungu, ntameje mu chilambo pamo ni uwe. Nambo ngasimwagalauka Ambuje Akunnungu pane kutugalauka uweji kwa kulitaŵila mwachinsyene chilisa chakulekangana ni cha Ambuje Akunnungu, Akunnungu ŵetu. 20 Nkumbuchile, che Akani mwana ju che Sela iŵatite kuwa ŵangakulupilichika pa indu yaityosyekwe kwa Ambuje Akunnungu, Ŵaisilaeli wose ŵajamwikwe kwaligongo lya yeleyo, nganaŵa che Akani pe juŵawile ligongo lya sambi syakwe.’ "

21 Ŵandu ŵa ngosyo sya Lobeni ni Gadi ni nusu ja ŵandu ŵa lukosyo lwa Manase ŵaajanjile achakulu ŵa mitundu ja ngosyo sya Ŵaisilaeli achitiji, 22 "Ambuje Akunnungu ŵa machili, ŵelewo jikape ni ŵaali ni machili! Ŵelewo akumanyilila kuti kwachichi tutesile yeleyo. Ni Ŵaisilaeli wose taimanyilile nombe! Iŵaga akuno kuli kugalauka pane kuli kuleka kwajitichisya Ambuje Akunnungu, nipele, nkatuleka tuli ŵajumi lelo jino. 23 Iŵaga twalesile Ambuje Akunnungu, ni kulitaŵila chilisa twachinsyene kuti tutyose mbopesi syakutinisya ni sya yakulya pane sya kuichisya chitendewele, Ambuje Akunnungu asyene alamule kwa uweji. 24 Nambo ngaŵa yaili! Uwe twataŵile pakuŵa twajogopaga kuti, panepa pa katema kakakuika uŵelesi ŵenu tachiuusya uŵelesi wetu, ‘Nkwete nawo ichichi ni Ambuje Akunnungu, Akunnungu jwa Ŵaisilaeli? 25 Ngankwiwona kuti Ambuje Akunnungu aluŵisile lusulo lwa Yolodani luŵe mpika pasikati ja uwe ni ŵanyamwe? Ŵanyamwe ŵandu ŵa ngosyo sya Lobeni ni Gadi nganinkola liunjili lyalililyose kwa Ambuje Akunnungu.’ Kwayele, uŵelesi ŵenu akakombwele kanyuma kwalekasya uŵelesi ŵetu kwajogopa Ambuje Akunnungu. 26 Kwayele twaamwiwe kutaŵa chilisa chi, nambo ngaŵa chakutyochesya mbopesi syakutinisya namose sadaka jilijose, 27 nambo, chilisa chi chiŵe umboni pasikati jetu ni ŵanyamwe ni kwa iŵelesi yetu yaikuika, kuti uweji chitwapopelele Ambuje Akunnungu peuto papaswela pao kwa mbopesi syetu syakutinisya ni kwa mbopesi syetu sya kuichisya chitendewele. Nipele katema kakakuika uŵelesi ŵenu ngaakombola kwasalila uŵelesi ŵetu kuti nganakola liunjili lyalililyose kwa Ambuje Akunnungu. 28 Sooni twaganisisye kuti iŵaga patachisala chindu chanti yele, pane kwasalila iŵelesi yetu chindu chanti yele katema kakakuika, chitujile, ‘Nnole chisyasyo cha chilisa cha Ambuje Akunnungu, chati achachekulu ŵetu ŵataŵile. Nganichiŵa chakutyochesya mbopesi syakutinisya pane sadaka, nambo nti umboni pasikati jetu ni ŵanyamwe’ 29 Uweji nganitukola nningwa wa kwagalauka Ambuje Akunnungu, namose kanandi, ni kwaleka kwa kulitaŵila chilisa chakutyochesya mbopesi syakutinisya pane sadaka sya yakulya pane mbopesi. Ngatukusaka kutyochesya sadaka peuto pane ikaŵe pa chilisa cha Ambuje Akunnungu, Akunnungu ŵetu chachili paujo pa lisakasa lyakwe."

30 Jwambopesi che Finehasi ni ilongola ŵa nsongangano pamo ni achakulu ŵa mitundu ja ngosyo sya Ŵaisilaeli ŵaŵaliji pamo nawo paŵapilikene yaŵaŵechete ŵandu ŵa ngosyo sya Lobeni ni Gadi ni nusu ja ŵandu ŵa lukosyo lwa Manase, ŵanonyelwe. 31 Nombe che Finehasi mwana jwa che Eleasali jwambopesi, ŵaasalile ŵandu ŵa ngosyo sya Lobeni ni Gadi ni ajila nusu ja ŵandu ŵa lukosyo lwa Manase, "Lelo tukuimanyilila kuti Ambuje Akunnungu ali pamo ni uwe, pakuŵa nganimpanganya kwaligongo lya kuleka kwapilikanichisya Ambuje Akunnungu. Kwayele mwaakulupwisye Ŵaisilaeli akajamuchikwa ni Ambuje Akunnungu."

32 Nipele, che Finehasi mwana jwa che Eleasali, jwambopesi, pamo ni ilongola achinjakwe ŵaalesile ŵandu ŵa ngosyo sya Lobeni ni Gadi, ŵatyosile ku Gileadi ni kuuja ku Kanaani kwa Ŵaisilaeli ni kwamanyisya ngani syo. 33 Ŵaisilaeli ŵasengwile paŵapilikene ngani jo, ŵaalapile Ambuje Akunnungu ni kuleka kukunguluchila ngani sya ngondo ni nningwa wa kuchijonanga chilambo chiŵatamaga ŵandu ŵa ngosyo sya Lobeni ni Gadi.

34 Ŵandu ŵa ngosyo sya Lobeni ni Gadi ŵachiŵilasile chilisa chila "Umboni," pakuŵa ŵatite, "Chilisa chi chili umboni pasikati jetu ni ŵanyamwe, kuti Ambuje Akunnungu ali Akunnungu."