1 Nipele che Yabini mwenye jwa ku Hasoli paŵapikene ngani jo, ŵatumile utenga ku che Yobabu mwenye jwa ku Madoni ni kwa mwenye jwa ku Shimloni ni kwa mwenye jwa ku Akishafu, 2 ni kwa mamwenye ŵaali ku matumbi ga kumpoto ni ŵaali ku lichemba lya lusulo lwa Yolodani chakulujenda kwa litanda lya Galilaya, ni ŵaali mu iŵata, paasi pa ikwesya, ni ŵaali ku Nafati Doli chakumaswelelo lyuŵa, 3 ni kwa mamwenye ŵa Ŵakanaani ŵaali kungopochelo lyuŵa ni kumaswelelo lyuŵa kwa lusulo lwa Yolodani, ni kwa mamwenye ŵa Ŵaamoli ni kwa mamwenye ŵa Ŵahiti ni kwa mamwenye ŵa Ŵapelisi ni kwa mamwenye ŵa Ŵayebusi ŵaakutama ku chilambo cha matumbi ni kwa mamwenye ŵa Ŵahifi ŵaakutama mungulugulu mwa chitumbi cha Helimoni chilambo cha ku Misipa. 4 Ŵanawose wo ŵaiche ni mipingo jao ja ŵangondo. Ŵaliji achajinji nti nsanga wa kumbwani ali ni mutuka syejinji ni falasi ŵajinji. 5 Mamwenye wose wo ŵaasongangenye ŵangondo ŵao ni kuchiŵika chigono chao pamo ku chiliŵa cha ku Melomu kuti aputane ni Ŵaisilaeli.

6 Ambuje Akunnungu ŵansalile che Yoshua, "Nkakola lipamba ligongo lya ŵanyawo, pakuŵa malaŵi pakatema kakaka tinaape Ŵaisilaeli ukombole wa kwapunda ni kwaulaga. Chinkate mitasi ja falasi syawo ni kusichoma mooto mutuka syawo." 7 Kwayele che Yoshua ni ŵangondo ŵakwe wose ŵajawile, ŵaagungumuchile chisisimuchile ku chiliŵa cha ku Melomu. 8 Ambuje Akunnungu ŵaakombolesye Ŵaisilaeli kwapunda, ŵaaputile ni kwatopola mpaka ku Sidoni Jekulungwa mpaka ku Misilefoti Maimu, mpaka ku lichemba lya Misipa chakungopochelo lyuŵa, ŵaauleje ni nganansigasya jwanjumi namose mundu jumo. 9 Che Yoshua ŵaatendele nti iŵatite kwalajisya ni Ambuje Akunnungu. Ŵakatenyekatenye mitasi ja falasi syawo ni kusichoma mooto mutuka syawo.

10 Che Yoshua ŵagalawiche ni kuuja kuusumula musi wa ku Hasoli. Ŵambuleje mwenye jwa musi wo, pakuŵa jwelejo ni juŵaliji chilongola jwa mamwenye wose wo. 11 Ŵaauleje wose uŵaliji mu musi wo kwa lipanga, nganansigasya jwanjumi namose mundu jumo, nipele ŵauchomile mooto musi wa Hasoli. 12 Sooni che Yoshua ŵajisumwile misi jose ja mamwenye ŵala ni mamwenye ŵakwe wose kwaulaga kwa lipanga mpela che Musa jwakutumichila jwa Ambuje Akunnungu, iŵatite pakunlajisya. 13 Nambo Ŵaisilaeli nganajichoma misi jajili mmatumbi ikaŵe musi wa ku Hasoli uwachomekwe ni che Yoshua. 14 Ŵaisilaeli ŵauleje achinsyene musi wose, nganansigasya namose mundu jumo jwanjumi, ŵalijigalile indu yose iŵasumwile pamo ni ilango yose ya misi jo. 15 Mpela Ambuje Akunnungu iŵatite kunlajisya che Musa jwakutumichila jwakwe, nombe che Musa ŵanlajisye che Yoshua, nombe che Yoshua ŵaitesile kila chindu mpela Ambuje Akunnungu iŵatite pakunlajisya che Musa.

16 Kwayele che Yoshua ŵachisumwile chilambo chose cha kumatumbi ni malo ja kulujenda ni malo jose ja ku Gosheni ni mu iŵata ni chilambo chachili ku lichemba lya lusulo lwa Yolodani ni itumbi yose ya ku Isilaeli ni malo jose ja paasi pa ikwesya. 17 Ŵaajigele mamwenye ŵakwe wose ni kwaulaga, kutandilila ku chitumbi cha Halaki, ku upande wa ku Seili mpaka ku Baali Gadi ku lichemba lya ku Lebanoni chakulujenda kwa chitumbi cha Helimoni. 18 Che Yoshua ŵaputene ngondo ni mamwenye wose wo kwa yaka yejinji. 19 Nganapagwa namose ŵandu ŵa musi wauliwose uŵasachile chitendewele ni Ŵaisilaeli ikaŵe Ŵahivi ŵaŵatamaga ku Gibeoni. Ŵaisilaeli ŵasumwile misi jine jose kwa kuputana ngondo. 20 Pakuŵa Ambuje Akunnungu nsyene ni juŵaakakatimisye mitima jao, aputane ni Ŵaisilaeli kuti ŵaamalisye pachilambo pangali chanasa, mpela Ambuje Akunnungu iŵatite pakwalajisya che Musa.

21 Mu gele moŵa go Che Yoshua ŵauleje Ŵaanaki ŵaŵatamaga mmatumbi ga ku Hebuloni, ni ku Debili ni ku Anabu ni ku ilambo yose ya matumbi ga ku Yuda ni ku Isilaeli. Che Yoshua ŵauleje ŵandu wo wose ni kujichoma mooto misi jao. 22 Ngapagwa mundu jwa lukosyo lwa Ŵaanaki juŵasigalile pa chilambo cha Isilaeli, nambo ŵasigalile kanondi ku Gaza ni ku Gati ni ku Ashidodi.

23 Nipele che Yoshua ŵasumwile chilambo chose mpela Ambuje Akunnungu iŵatite pakunlajisya che Musa, nombe che Yoshua ŵapele Ŵaisilaeli iŵe yao malinga ni ngosyo syawo. Nipele ŵandu ŵatemi kwa chitendewele pangali ngondo sooni.