1 Pakumala kuwa che Yoshua Ŵaisilaeli ŵaausisye Ambuje Akunnungu kuti, "Ana lukosyo chi pasikati jetu luchilulongolele kwaula kukumenyana ni ŵandu ŵa ku Kanaani?"

2 Ambuje Akunnungu ŵajanjile, "Lukosyo lwa Yuda tiluchitanda kwaula, naatesile ŵaapunde Ŵakanaani ni kuchijigala chilambo chao."

3 Nipele ŵangondo ŵa lukosyo lwa Yuda ŵaasalile achalongo achinjawo ŵangondo ŵa lukosyo lwa Simeoni, "Nkamulangane ni uweji patukwaula kukumenyana ngondo ni Ŵakaanani ni kuchijigala chilambo cho. Uweji nombe tutukamulangane ni ŵanyamwe kukumenyana ngondo ni kuchijigala chilambo chichimpegwe." Kwapele lukosyo lwa Simeoni lwakundile kukamulangana nao. 4 Lukosyo lwa Yuda ŵapite kukwagungumuchila Ŵakanaani ni Ŵapelesi, nombe Ambuje Akunnungu ŵaatendekasisye ŵapunde ŵanyawo. Ŵangondo ŵa lukosyo lwa Yuda ŵaauleje achalume elufu kumi ku musi wa ku Beseki ko. 5 Kweleko ŵansimene mwenye che Adonibeseki, ni kumenyana najo, ni ŵaapundile Ŵakanaani ni Ŵapelesi. 6 Che Adonibeseki ŵautwiche, nambo ŵanyawo ŵankuilisye ni ŵankamwile, ŵankatile ikongo yammakono ni makongolo gakwe. 7 Che Adonibeseki ŵatite, "Mamwenye sabini unaakatile ikongo yammakono ni makongolo gao ŵalokotaga makoombo kuusi mesa jangu. Sambano Akunnungu andesile ilaila inaatendele ŵanyawo." Nipele Ŵayuda ŵanjigele mwenye che Adoni Beseki kwaulanajo ku Yelusalemu, ni ŵawilile kweleko.

8 Nipele, ŵandu ŵa lukosyo lwa Yuda ŵaagungumuchile ŵandu ŵa musi wa ku Yelusalemu ni kuujigala musi wo. Ŵaauleje ŵaŵatamaga mwelemo ni mapanga ni kuutinisya musi wo. 9 Pakumala yeleyo, ŵangondo ŵa lukosyo lwa Yuda ŵatulwiche kukumenyana ni Ŵakanaani ŵaŵatamaga ku chilambo cha ikwesya, ni ŵane ŵaŵatamaga ku chilambo changalimesi chachili kulujenda ni ŵane ŵaŵatamaga ku chilambo chachili mwiŵata chiŵandika ni kubwani. 10 Pakumala yeleyo ŵapite kwagungumuchile Ŵakanaani ŵaŵatamaga mu musi wa ku Hebuloni, kalakala ko musi wu waŵilanjikwe Kiliati Alaba. Ni kweleko ŵaapundile ŵa uŵelesi wa Sheshai ni Ahimani ni Talimai.

11 Kutyochela kweleko ŵangondo ŵa lukosyo lwa Yuda ŵapite kukumenyana ni ŵandu ŵa ku Debili, kalakala ko musi wo waŵilanjikwe Kiliati Sefeli. 12 Che Kalebu ŵatangesye kuti, "Mundu jwalijose jutaupute musi wa Kiliati Sefeli ni kuusumula chinjinlombekasya mwali jwangu liina lyakwe che Akisa." 13 Nipele, che Otinieli, nchanda ju che Kenasi, mpwakwe che Kalebu, ŵaapundile ŵandu ŵa musi wo, ni che Kalebu ŵanlombekasisye che Akisa mwali jwakwe. 14 Che Akisa paŵaiche ku che Otinieli, che Akisa, ŵaachisisye ŵankwakwe kuti ŵaŵende ngunda che Kalebu, atatigwe. Che Akisa ŵatulwiche pa mbunda jakwe, nipele che Kalebu ŵammusisye, "Nkusaka nampe ichichi." 15 Che Akisa ŵajanjile, "Mundendele lusagu. Pakuŵa muumbele lisi lyakulujenda lyalili lyejumu, muumbe ni iliŵa ya mesi." Che Kalebu ŵampele iliŵa ya mesi ya kwichela ni kwiŵanda.

16 Wandu ŵa uŵelesi wa che Keni juŵaliji akwegwao ŵalume che Musa, ŵalongene ni ŵandu ŵa lukosyo lwa Yuda kutyochela ku musi wa itela ya mitende, liina line musi wa ku Yeliko mpaka ku lipululu lya Yuda, chiŵandika ni musi wa Aladi. Ni ŵatemi pamo ni Ŵayuda kweleko. 17 Ŵangondo ŵa lukosyo lwa Yuda ŵakamulangene ni ŵangondo ŵa lukosyo lwa Simeoni, ŵaapundile pa ngondo Ŵakanaani ŵaŵatemi ku Sefati. Ŵaujonasile musi wo tikitiki, ŵaupele musi wo liina liine ni ŵauŵilasile Holima. 18 Iyoyo peyo, ŵangondo ŵa lukosyo lwa Yuda ŵausumwile kwa machili musi wa Gasa ni mipika jakwe ni musi wa Ashikeloni ni mipika jakwe ni musi wa Ekiloni ni mipika jakwe. 19 Ambuje Akunnungu ŵaakamuchisye ŵangondo ŵa lukosyo lwa Yuda, nombe ŵanyawo ŵaatopwele ŵandu ŵaŵatamaga mu chilambo cha matumbi ni kuchijigala chilambo cho, nambo nganakombolanga kwatopola ŵandu ŵaŵatamaga mu iŵata pakuŵa ŵanyawo itetele yao ya ngondo yaliji ya isyano. 20 Musi wa Hebuloni ŵampele che Kalebu, mpela che Musa iŵatite pakulajisya, nombejo wajitopwele mitundu jitatu ja che Anaki jijatamaga mwelemo. 21 Nambo ŵandu ŵa lukosyo lwa Benjamini nganiŵaatopola Ŵayebusi ŵaŵatamaga mu Yelusalemu, nipele Ŵayebusi ali nkutama kweleko ni ŵandu ŵa lukosyo lwa Benjamini mpaka lelo jino.

22 Nipele ŵangondo ŵa ngosyo sya Yusufu, yaani Efulaimu ni Manase nombewo ŵakwesile kukuugungumuchila musi wa ku Beseli, nombe Ambuje Akunnungu ŵaakamuchisye. 23 Akanaŵe kwaula, ŵaalajisye ŵandu kuuchilichisya musi wa ku Beseli. Musi wo kalakala ko waŵilanjikwe Lusu. 24 Ŵakuuchilichisya ŵala ŵammweni mundu ali nkutyoka mu musi mo, ni ŵansalile, "Ntulosye litala lyakwinjilila mu musi mu ni uwe ngatummulaga." 25 Nombejo ŵalosisye, ni ŵanyawo ŵajinjile ni kwaulaga ŵandu wose mwelemo kwa mapanga, akaŵe nganammulaga mundu jula ni ŵamu nyuumba jakwe. 26 Nipele, mundu jula ŵasamile ku chilambo cha Ŵahiti, ŵataŵile nsinda kweleko ni kuuŵilanga lina lyakwe Lusu, ni lyele lili liina lyakwe mpaka lelo jino.

27 Ŵandu ŵa lukosyo lwa Manase nginiŵaatopola ŵandu ŵaŵatamaga musi wa Beti Sheani ni misinda jakwe ni musi wa Taanaki ni misinda jakwe ni musi wa Doli ni misinda jakwe ni musi wa Ibuleamu ni misinda jakwe ni musi wa Megido ni misinda jakwe. Ŵakanaani ŵajendelechele kutama mu chilambo cho. 28 Namose Ŵaisilaeli paŵapatile machili nnope nginiŵaatopola Ŵakanaani, nambo ŵaakanganichisyaga ŵaapanganyichisye masengo gakulimba.

29 Iyoyo peyo ŵandu ŵa lukosyo lwa Efulaimu nginiŵaatopola Ŵakanaani ŵaŵatamaga ku Geseli, Ŵakanaani ŵajendelechele kutama mu Geseli pamo ni ŵandu ŵa lukosyo lwa Efulaimu.

30 Ŵandu ŵa lukosyo lwa Sabuloni nombe nawo nginiŵaatopola Ŵakanaani ŵaŵatamaga ku Kitiloni ni ku Nahaloli, ŵajendelechele kutama nawo mpela achikapolo.

31 Ŵandu ŵa lukosyo lwa Asheli nombe nginiŵaatopola ŵandu ŵaŵatamaga misi ja ku Ako ni ku Sidoni ni ku Alabu ni ku Akisibu ni ku Heliba ni ku Afeka ni ku Lehobu. 32 Ŵandu ŵa lukosyo lwa Asheli ŵatemi pamo ni Ŵakanaani, achinsyene musi wo pakuŵa nginiŵaatopola.

33 Ŵandu ŵa lukosyo lwa Nafutali nombe nginiŵaatopola achinsyene misi ja Beti Shemeshi ni Beti Anati, nambo ŵatemi pamo nawo. Namose yeleyo ŵandu ŵa lukosyo lwa Nafutali ŵaakanganichisyaga achinsyene misi jo ŵaapanganyichisye masengo gakulimba.

34 Ŵaamoli ŵaakanganyichisye ŵandu ŵa lukosyo lwa Dani atame ku matumbi, pakuŵa nganiŵakunda aiche kutuluchila kwiŵata. 35 Ŵaamoli ŵajendelechele kutama misi jijili ku litumbi lya Helesi ni Aiyaloni ni Shaalibimu. Nambo ŵandu ŵa lukosyo lwa Yusufu, yaani Efulaimu ni Manase paŵapundile kukola machili, ŵaatawele Ŵaamoli ni kwakanganichisya ŵaapanganyichisye masengo gakulimba. 36 Mpika wa Ŵaamoli waliji kutandilila pamalo pakupita papakuŵilanjikwa Akilabimu, wajendelechele chakumpoto mpaka musi wa ku Sela ni kwendelechela chakwiŵanda.