1 Nipele kwele ku Gileadi ko, jwapali mundu juŵaŵilanjikwe che Yefuta, jwelejo ŵaliji mundu jwakombola kumenyana ngondo, mwanache jwa jwankongwe jwakulaŵalaŵa ni atatigwe ŵaŵilanjikwe che Gileadi. 2 Che Gileadi ŵakwete ŵanache ŵane kwa ŵankwakwe, ni ŵele ŵanache wo paŵakusile ŵantopwele che Yefuta pa nyuumba po ni kunsalila, "Mmwejo ngampata chilichose mwa chipanje cha atati ŵetu ligongo mmwejo mwanache jwammaukutu." 3 Nipele che Yefuta ŵaautwiche achalongo ŵakwe ŵala, ŵajawile kutama ku chilambo cha Tobu. Kweleko ŵandu ŵangakugajitichisya malajisyo ŵasongangene kuti akamulane ni jwelejo, ni ŵankuiye mu ulendo wakwe.

4 Kanyuma, Ŵaamoni ŵaagungumuchile Ŵaisilaeli. 5 Payakopochele yeleyo, ilongola ŵa ku Gileadi ŵajawile kukwajigala che Yefuta ku achila chilambo cha ku Tobu, 6 ŵansalile, "Nnyiche ntulongosye, patukuputana ni Ŵaamoni." 7 Nambo che Yefuta ŵaasalile, "Uli, nganimma ŵanyamwe umwaamenjile ni kuundopola ku nyuumba ja atati ŵangu? Kwachichi nkuuichila une sambano nli mmalagasyo?" 8 Ilongola ŵa ku Gileadi ŵala ŵansalile che Yefuta, "Nkaikosya yeleyo, tunnyichilile mmwejo sambano kuti nlongane ni uwe nkatukamuchisye kuputana ni Ŵaamoni. Nomwe chituntende chilongola jwetu ni jwa ŵandu wose ŵakutama ku Gileadi." 9 Che Yefuta ŵaasalile, "Iŵaga nkuumusya ku Gileadi kukuputana ni Ŵaamoni, nombe Ambuje Akunnungu iŵaga taandendekasye naapunde, uli, kusyene chinjiŵa chilongola jwenu?" 10 Ilongola ŵa ku Gileadi ŵala ŵanjanjile che Yefuta, "Ambuje Akunnungu ali jwaumboni pasikati jetu, kusyene chitutende mpela itutite pakusala." 11 Kwayele che Yefuta ŵalongene ni ilongola ŵa ku Gileadi, ni ŵanyawo ŵantesile chilongola jwao ni jwankulu jwa ŵangondo. Nipele che Yefuta ŵaŵechete aila yasachileje kuti apanganye paujo pa Ambuje Akunnungu ku Misipa ko.

12 Nipele, che Yefuta ŵaatumile ŵantenga kwa mwenye jwa Ŵaamoni, akaasalile, "Ana chinkukangana ni uwe ni ichichi? Ligongo chichi nnyiche kuchigungumuchila chilambo chetu?" 13 Mwenye jwa Ŵaamoni ŵaajanjile ŵantenga ŵa che Yefuta ŵala, "Ŵaisilaeli paŵatyosile ku Misili ŵasumwile chilambo changu kutandilila lusulo lwa Alinoni kwichila lusulo lwa Yaboki mpaka lusulo lwa Yolodani. Sambano mumuchisye chilambo changu kwa chitendewele."

14 Che Yefuta ŵaatumile sooni ŵantenga kwa mwenye jwa Ŵaamoni, 15 ŵansalile, "Che Yefuta akuti nyi, ‘Ŵaisilaeli nganasumula chilambo cha Ŵamoabu namose chilambo cha Ŵaamoni. 16 Nambo Ŵaisilaeli paŵatyosile ku Misili ŵajesile kupitila mu ukweti mpaka ku bahali ja Shamu ni kwika ku Kadeshi. 17 Nipele Ŵaisilaeli ŵaatumile ŵantenga kwa mwenye jwa ku Edomu ŵaalechelele apite mu chilambo mwakwe, nambo mwenye jwa Ŵaedomu ŵakanile. Nipele ŵaaŵendile mwenye jwa Ŵamoabu kuti apite mu chilambo mwakwe, nombejo ŵakanile. Kwayele Ŵaisilaeli ŵatemi kwele ku Kadeshi ko. 18 Nipele ŵaapite mu ukweti, ŵajesile kusyungulila chilambo cha Edomu ni chilambo cha Moabu, ni ŵapite kungopochelo lyuŵa kwa chilambo cha Moabu, ŵaŵisile chigono peesi pa lisi lya lusulo lwa Alinoni. Ŵaisilaeli nganajomboka lusulo lwa Alinoni kwinjila ku Moabu pakuŵa lusulo lwa Alinoni ni uwaliji mpika wa chilambo cha ku Moabu. 19 Nipele Ŵaisilaeli ŵaatumile ŵantenga ajaule ku che Sihoni mwenye jwa Ŵaamoli, juŵatawalaga ku Heshiboni kukwaŵenda ŵaalechelele apite mu chilambo chakwe pakwaula mu chilambo chao. 20 Nambo che Sihoni nganiŵaakulupilila Ŵaisilaeli ni nganiŵaaleka apite mu chilambo chakwe. Nambo ŵaasonganyisye ŵangondo ŵakwe wose ni kuŵika chigono kwele ku Yahasa, ni ŵaagungumuchile Ŵaisilaeli. 21 Nambo Ambuje Akunnungu, Akunnungu jwa Ŵaisilaeli ŵaapundisye Ŵaisilaeli pakumputa che Sihoni ni ŵangondo ŵakwe. Kwayele Ŵaisilaeli ŵachijigele chilambo chose cha Ŵaamoli ŵaŵatamaga mu chilambo mo. 22 Ŵachijigele chilambo chose cha Ŵaamoli kutandilila ku lusulo lwa Alinoni mpaka ku lusulo lwa Yaboki, ni kutyochela mu ukweti chakungopochelo lyuŵa mpaka chakumaswelelo lyuŵa kwa lusulo lwa Yolodani. 23 Kwayele Ambuje Akunnungu, Akunnungu jwa Ŵaisilaeli ŵaŵinjile Ŵaamoli paujo pa Ŵaisilaeli. Uli, sana mmwe nkusaka kutusumula chilambo chetu? 24 Njigale chilambo champele nnungu jwenu Kemoshi. Ni uwe wakwe, chitutame mu chilambo chatupele Ambuje Akunnungu, Akunnungu jwetu. 25 Ana nkuganichisya kuti mmwe nkwete machili nnope kwapunda che Balaki mwanagwe che Sipola, juŵaliji mwenye jwa ku Moabu? Jwelejo nganiŵaatanda Ŵaisilaeli namose nganaputana nawo ngondo. 26 Pakuŵa kwa yaka mia tatu Ŵaisilaeli ŵaliji nkutama ku Heshiboni ni misinda jakwe, ni ku Aloeli ni misinda jakwe, ni misi jose jajili mungulugulu lusulo lwa Alinoni. Kwachichi mmwe nganinliwombola lisi lyo pa katema ko? 27 Une nganinanleŵela chilichose nambo mmwe ni junkuleŵa pankusaka kuputana ngondo ni une. Ambuje Akunnungu ni jwakulamula. Talamule lelo umenyani pasikati ja Ŵaisilaeli ni Ŵaamoni.’" 28 Nambo mwenye jwa Ŵaamoni nganagakosya maloŵe gaŵaŵechete che Yefuta.

29 Nipele Mbumu jwa Ambuje Akunnungu jwannyichilile che Yefuta, nombejo ŵapitile pasikati ja ku Gileadi ni kulukutama lukosyo lwa Manase, ni kuuja ku Misipa mu chilambo cha Gileadi kukumenyana ni Ŵaamoni. 30 Ni che Yefuta ŵalilumbisye paujo pa Ambuje Akunnungu achitiji, "Iŵaga alakwe kusyene chimuundende naapunde Ŵaamoni, 31 nipele pachimuje po pakumala kwapunda Ŵaamoni, jwajulijose juchakopoche mu nyuumba jangu kwika kukuuchingamila, jwelejo chaŵe jwenu alakwe Ambuje Akunnungu. Jwelejo chinjimpelechela mmwe mbopesi jakutinisya."

32 Nipele che Yefuta ŵajombweche lusulo kwaula kukumenyana ni Ŵaamoni, nombe Ambuje Akunnungu ŵantesile che Yefuta ŵaapunde Ŵaamoni. 33 Che Yefuta ni ŵangondo ŵakwe ŵajijigele kwa machili misi ishilini jijaliji pasikati ja Aloeli ni Miniti, ni misi jine mpaka ku Abeli Kelamimu. Kwayele Ŵaisilaeli ŵaapundile kusyene Ŵaamoni.

34 Che Yefuta paŵaujaga kumangwakwe ku Misipa, mwali jwakwe ŵakopweche kukwachingamila ali nkung'anda ni kugomba kagoma ka mwana. Mwali jo ŵaliji mwanagwe jwa jikape. Che Yefuta nganakola mwanache jwine jwannume pane jwankongwe. 35 Che Yefuta paŵammweni ŵapapwile yakuwala yakwe kulosya kulilasika, ni kulila achitiji, "Mwanangu, muundesile supuche. Mmwejo mmele ndande ja kusauka kwangu, pakuŵa uneji ndaŵile nasili kwa Ambuje Akunnungu ŵangu, ni une ngusachilwa ngwanilisye nasili jo."

36 Mwaligwe ŵanjanjile, "Atati, iŵaga ntaŵile nasili kwa Ambuje Akunnungu, muundende nti intite pakwalanga, pakuŵa Ambuje Akunnungu ankamuchisye kwapunda Ŵaamoni." 37 Nipele ŵansalile atatigwe, "Ngummenda chindu chimo, muumbe miesi jiŵili kuti nyaule kumatumbi ni achambusanga ŵangu, ngalile kwa malumbo pakuŵa une chimwe ngunaŵe kulombekwa." 38 Atatigwe ŵanjanjile, "Hayaga, njaule." Ŵanjawisye kwakutalika kwa miesi jiŵili, nombejo ŵajawile pamo ni achambusangagwe, achipitaga nkulila kwa malumbo pakuŵa chawe akanaŵe kulombekwa. 39 Pakumala miesi jiŵili jo ŵausile kwa atatigwe, ni atatigwe ŵantesile mpela iŵatite pakutaŵa nasili jakwe. Mwali jo ŵaliji nganawonegane ni jwannume julijose. Nipele kutandilila katema ko mu chilambo cha Kuisilaeli kwaliji ni malamusi ga: 40 Kila chaka achiŵali ŵa mu Isilaeli akwaula kulila kwamalumbo kwa moŵa ncheche kuchikumbuchila chiwa cha mwali ju che Yefuta jwa ku Gileadi.