1 Pa gele moŵa go mwaliji mwangali mwenye mu Isilaeli. Sooni pa moŵa go lukosyo lwa Dani lwaliji nkusosa malo gakuti gaŵe gao achinsyene gakutama pakuŵa kuichila pa katema ko ŵaliji ŵangapegwa malo gakuti gaŵe gao achinsyene pasikati ja ngosyo sya Isilaeli. 2 Kwayele ŵandu ŵa lukosyo lwa Dani ŵaatumile ŵangondo ŵa machili nsano kutyochela ku Eshitaoli ni ku Sola kuwakilisha koo zote. Ŵaasalile ajaulangane kukuchilolesya chilambo chakuti akatamanje. Ŵandu wo ŵaiche ku chilambo cha ikwesya cha Efulaimu, ni ŵaiche kumangwakwe che Mika kuŵagonilenje chilo cho. 3 Ali chiŵela kumangwakwe che Mika, ŵammanyilile nchanda Mlawi jula maŵechete gakwe. Nipele ŵanjaulile ni kummusya, "Ana nkutenda ichichi akuno? Ŵani ŵannyichisye mmwejo akuno? Kwachichi nli apano?"

4 Nombejo ŵajanjile, "Une nalangene ni che Mika jwaakundipa, kuti mbanganye masengo mpela jwambopesi jwakwe."

5 Ŵandu wo ŵansalile nchanda jo, "Choonde atuuchisye kwa Akunnungu iŵaga ulendo wetu wu chitupate chitukuchisaka?"

6 Jwambopesi jula ŵaasalile, "Nkakolanga lipamba, Ambuje Akunnungu akunnongosya pa ulendo wu."

7 Pelepo ŵandu nsano ŵala ŵatyokangene, ŵaiche ku Laishi. Kweleko ŵaweni ŵandu ŵakutama mwelemo iŵatite kutama kwa chitendewele mpela muŵatamilaga Ŵasidoni. Ŵatemi mkutulala ni nganakola lipamba, ŵakwete kila chindu mu chilambo mwao. Ŵanyawo ŵatamaga mwakutalikangana ni Ŵasidoni, ni nganakamulangana ni mundu jwalijose. 8 Ŵandu nsano ŵala piŵausile ku Sola ni ku Eshitaoli, achalongo achinjao ŵausisye chiŵachiweni kweleko. 9 Ŵanyawo ŵajanjile, "Njimuchanje twende tukachigungumichile chilambo cho. Uwe twachiweni chilambo cho kusyene chikwete chajila. Uli chintamanje apano pangali chakutenda? Njanguyanje twende tukachijigale chilambo cho. 10 Patinkaiche kweleko chinkasimane ŵandu wo yakuti pakutama mchitendewele. Chilambo cho chili chachikulungwa ni chikwete kila chindu chitukuchisaka mu tame wetu, ni Akunnungu ampele mwanya."

11 Nipele ŵandu mia sita ŵa lukosyo lwa Dani ŵatyosile ku Sola ni ku Eshitaoli ali ajigele yakumenyanilana yao, kwaula kukuputana ngondo. 12 Ŵandu wo ŵakwesile ni kwaula kukuŵika chigono chao kwele Kiliati Yealimu, ku chilambo cha Yuda. Lyelelyo ni ligongo, chakumaswelelo lyuŵa kwa Kiliati Yealimu pakuŵilanjikwa Mahane Dani mpaka lelo jino, malumbo gakwe "Chigono chi che Dani". 13 Kutyochela pelepo, ŵapite ku chilambo cha ikwesya cha Efulaimu ni kwika kumangwakwe che Mika.

14 Aŵala ŵandu nsano ŵaŵajawile kukuchilolesya chilambo cha Laishi ŵaasalile achalongo achinjawo, "Ana nkwimanyilila kuti akuno jimo mwa gele majumba ga, mwana likoti lyakuunichila pantima ni inyago ya minungu ni chinyago chesepekwe ni kuchiunichila ni madini ga feza? Nipele nganisyanje chakupanganya." 15 Nipele ŵakulolesya chilambo ŵala ŵajawile kumangwakwe che Mika, kuŵatamaga jwanchanda Mlawi, ni ŵankomasisye. 16 Pa katema ko, ŵangondo mia sita ŵa lukosyo lwa Dani, ŵaŵajigele yakumenyanilana ya ngondo ŵala ŵajimi pa nnango. 17 Aŵala ŵangondo nsano ŵaŵajawile kukuchilolesya chilambo, ŵajinjile nkati ŵachijigele achila chinyago chesepekwe ni kuchiunichila kwa feza, ni likoti lyakuunichila pantima ni inyago ine, akuno jwambopesi jula ali ajimi pannango pamo ni ŵandu mia sita ŵaŵajigele yakumenyanilana ŵala. 18 Jwambopesi jula paŵaaweni ajinjile mu nyuumba ji che Mika ni kwigala chinyago chesepekwe ni kuchiunichila ni feza ni likoti lyakuunichila pantima pamo ni inyago ine ila, ŵaausisye, "Ana nkutenda chichi?" 19 Ŵanyawo ŵanjanjile, "Mmyalale, nkaŵecheta chilichose! Ntukuye kuti mme mpela mshauli jwetu, ni jwambopesi jwetu. Pambone ni papi, kuŵa jwambopesi kwaligongo lya nyuumba ja mundu jumo pane kuŵa jwambopesi kwaligongo lya lukosyo lose lwa Ŵaisilaeli?" 20 Jwambopesi jula paŵapilikene yeleyo ŵasangalele kwannope, ŵalijigele likoti lyakuunichila pantima lila ni inyago ine ila ni chinyago chesepekwe ni kuunichila ni feza chila, ŵalongene ni ŵandu ŵala.

21 Nipele ŵagalawiche ni kuutanda ulendo, akuno ŵanache ni ilango yao ni yoombo yao ŵailongwesye. 22 Ali ajeesile kwakutalichila kutyochela ku nyuumba ji che Mika, che Mika ŵaaŵilasile ŵapachiŵandi pakwe ni kwaŵenda ŵaakamuchisye kuti aiusye indu yakwe. Nsyene jo pamo ni ŵandu wo waakuilisye ni kwaŵandichila ŵandu ŵa lukosyo lwa Dani. 23 Ŵaliji nkunyanyisyanga. Ŵandu ŵa lukosyo lwa Dani ŵagalawiche ni kummusya che Mika, "Nkusaka ichichi mpaka nnyiche ni mpingo wa ŵandu wose wo?"

24 Che Mika ŵajanjile, "Mwanya njigele minungu jangu jingolosisye, sooni munjigele jwambopesi jwangu. Sambano uneji sigalilwe ni ichichi? Ana nkuusya uli kuti ‘Nkusaka ichichi?’ " 25 Ŵandu ŵa lukosyo lwa Dani ŵanjanjile, "Mmbaya ntame jii, nangaŵa yeleyo ŵane mwa uweji ŵaali ni lutumbilo akaika kungungumuchila, nomwe pamo ni ŵamunyuumba jenu timmwe." 26 Ŵandu ŵa lukosyo lwa Dani ŵajendelechele ni ulendo. Che Mika paŵaiweni kuti ŵaapundile machili ŵagalawiche ni kuuja kumangwakwe.

27 Ŵandu ŵa lukosyo lwa Dani ŵajigele aila indu iyakolosisye che Mika, ŵanjigele nombe ajula jwambopesi. Nipele ŵajawile ku musi wa Laishi, kuŵatamaga mchitendewele ni pangali lipamba. Ŵaauleje ŵandu ŵaŵatamaga mwelemo kwa lipanga ni kuutinisya musi wo ni mooto. 28 Ŵandu ŵaŵatamaga mu musi wo nganapagwa mundu jwakwakulupusya ligongo musi wo watalikangene ni musi wa ku Sidoni ni sooni nganakamulangana ni ŵandu ŵane. Musi wo waliji pa lichemba lyalili chiŵandika ni ku Beti Lehobu. Ŵandu ŵa lukosyo lwa Dani ŵautaŵile sooni musi wo ni kutama mwelemo. 29 Ŵauŵilasile musi wo Dani liina lilyaliji lya che Dani nangolo jwawo, mwanache jwa Isilaeli. Kundanda ko musi wo waŵilanjikwe Laishi. 30 Ŵandu ŵa lukosyo lwa Dani ŵaijimiche inyago ila kuti aipopelele, ni che Yonasani mwanagwe che Gelishomu chisukulu chi che Musa ŵaliji jwambopesi. Achiŵanagwe nombe ŵaliji ŵambopesi ŵa lukosyo lwa Dani mpaka ŵandu ŵa chilambo cho paŵajigalikwe ku ukapolo. 31 Katema kose Lisakasa lyakusimanilana kwaligongo lya Akunnungu pajaliji ku Shilo, ŵandu ŵa lukosyo lwa Dani ŵaipopelaga yele inyago iŵaikolosisye che Mika.