1 Yelubaali, liina lyakwe liine che Gidioni ni ŵangondo ŵakwe ŵalaŵile kwimuka ni kwaula kuŵika chigono kuchiŵata chiŵandika ni uliŵa wa Halodi, ni chigono cha Ŵamidiani chaliji chakumpoto kwao, kuchiŵata, chiŵandika ni chitumbi cha Mole.

2 Ambuje Akunnungu ŵansalile che Gidioni, "Aŵa ŵandu ŵaali pamo ni mmwe atupile kwannope, kwa une kwapundisya kwa Ŵamidiani. Ŵaisilaeli akaika kulilapa ni kusala kuti alikulupwisye achinsyene kwa machili gao ni ngaŵa une unaakamuchisye. 3 Sambano mwatangachisye ŵandu kuti, ‘Jwalijose jwakogopa pane kutetemela atyoche apano pa chitumbi cha Gileadi, auje mmangwawo.’ " Pelepo, ŵandu elufu ishilini na mbili ŵausile mmangwawo, ŵasigele ŵandu elufu kumi.

4 Ambuje Akunnungu ŵansalile che Gidioni, "Mpaka sambano ŵandu ŵaali pamo ni mmwe atupile kwannope, ntuluchenawo mwaichisye kugali meesi ni une tinaalinje kweleko kwaligongo lyenu. Mundu juchinansalile kuti mundu ju nnonganenawo, jwelejo chinnonganenawo, nambo mundu juchinansalile nkalongananawo, jwelejo nkalongananawo."

5 Nipele che Gidioni ŵajawile nawo ŵandu ŵala ku lusulo ni Ambuje Akunnungu ŵansalile, "Ŵandu ŵachalapite meesi ni lulimi nti mmbwa mwalekanganye ni aŵala ŵachang'we meesi ali atindiŵele."

6 Ŵandu ŵaŵang'wele meesi kwa kulapita nti mmbwa ŵaliji mia tatu, nambo ŵandu ŵane ŵaŵasigalile wose ŵang'wele meesi ali atindiŵele.

7 Ambuje Akunnungu ŵansalile che Gidioni, "Tinjinkulupusya mmweji ni kumpundisya kwa Ŵamidiani ni ŵandu mia tatu ŵaŵalapite meesi nti mmbwa. Mwasalile ŵandu ŵane wose ajaule kila mundu kunyuumba jakwe."

8 Nipele che Gidioni ŵaalesile Ŵaisilaeli ŵane ajaule kila mundu ku lisakasa lyakwe. Ŵasigalile ni aŵala ŵandu mia tatu ŵaŵajigele yakulya ni mapenga ga achinjawo ŵaŵatyosile ŵala. Chigono cha Ŵamidiani chaliji chakwiŵanda kwa che Gidioni ni ŵangondo ŵakwe.

9 Chilo cho Ambuje Akunnungu ŵansalile che Gidioni, "Njimuche, ntuluche ku chigono chao nkaagungumuchile ni une chinantende mwapunde ŵandu wo. 10 Nambo iŵaga nkogopa kwaula kwagungumuchila, nlongane ni jwakutumichila jwenu che Pula kwaula ku chigono chao. 11 Kweleko chinkapikane yaakuŵechetanga ni pakumala pelepo chinkole machili gakwagungumuchila." Nipele che Gidioni pamo ni che Pula, jwakutumichila jwakwe, ŵatulwiche mpaka pamalo paŵaliji ŵakulindilila ŵa pa chigono cha Ŵamidiani.

12 Ŵamidiani ni Ŵaamaleki ni ŵandu wose kutyochela kungopochelo lyuŵa, ŵajenele kwiŵanda, nombewo ŵaliji achajinji nti sombe ni ŵakwete ngamia syejinji syangaŵalanjikwa, nti nsanga wa kumbwani.

13 Che Gidioni paŵaiche, ŵampikene mundu ali nkunsalila njakwe sagamisi jiŵasagamile. Ŵatite, "Nasagamile, nauweni nkate wa shayili uli nkugalambuka ni kugwilila pa chigono cha Ŵamidiani, ni waliputile lisakasa limo ni lisakasa lyo lyapitikwiche ni kugwa paasi."

14 Njakwe jula ŵajanjile, "Sagamisi jo jikusala nkati aula upanga wa ajula che Gidioni mwanagwe che Yoashi mundu jwa ku Isilaeli. Akunnungu antesile ŵaapunde Ŵamidiani ni ŵangondo ŵetu wose."

15 Che Gidioni paŵajipilikene sagamisi jo ni kugopolela kwakwe, ŵatindiŵele ni kwapopelela Akunnungu. Ŵausile ku chigono cha Ŵaisilaeli ni kwasalila, "Njimuchanje twende pakuŵa Ambuje Akunnungu atutesile twapunde ŵangondo ŵa Chimidiani."

16 Nipele ŵaasapulenye aŵala ŵangondo mia tatu pa mipingo jitatu, kila mundu ŵampele lipenga ni lulo lwangali meesi, lweŵiche lumuli lwalukukolela nkati mwakwe. 17 Ŵaasalile, "Muunolechesye itindende, patingaiche chiŵandi ni chigono, ni ŵanyamwe nkatendeje mpela itindende. 18 Une ni ŵamumpingo wangu, pachitugombe mapenga getu, ni ŵanyamwe wose ngombeje kusyungula chigono chose nchisalaga, ‘Mputane kwaligongo lya Ambuje Akunnungu! Mputane kwaligongo lya che Gidioni!’ "

19 Kuŵandichila chilo nnope, che Gidioni ni mpingo wa ŵangondo mia moja uŵaliji pamo nawo ŵala ŵaiche mumbali mwa chigono cha ŵammagongo. Katema ko ŵakulindilila ŵaŵaliji nkulindilila ŵaliji nkutyoka kuti ajinjile ŵane. Pelepo che Gidioni ni achinjakwe ŵagombile mapenga gao ni kukasanya lulo sisyaliji mmakono mwao.

20 Ni mipingo jine jila jatesile iyoyo peyo. Ŵakamulile imuli ku nkono wakunchiji ni kunkono wakunlyo, ŵakamulile mapenga ni kugomba, akuno achinyanyisyaga achitiji, "Mputane ni lipanga kwaligongo lya Ambuje Akunnungu, mputane ni lipanga kwaligongo lya che Gidioni!"

21 Jwangondo jwalijose ŵajimi pamalo pakwe kusyungula chigono. Ŵangondo wose ŵa Ŵamidiani ŵautwiche ali nkugumilanga.

22 Ŵangondo ŵa che Gidioni paŵaliji nkugomba mapenga gao mia tatu, Ambuje Akunnungu ŵaatesile Ŵamidiani aulagane achinsyene pe ni mapanga pa chigono pala. Ŵane ŵaŵasigalile ŵajumi ŵala ŵatolochele ku Selela, ŵaiche kwakutalichila nnope mpaka ku Beti Shita ni mpaka mumpika wa ku musi wa Abeli Mehola chiŵandika ni musi wa Tabati.

23 Ŵaisilaeli ŵa lukosyo lwa Nafutali ni lukosyo lwa Asheli ni lukosyo lwa Manase wose, ŵaŵilanjikwe ŵaatopole Ŵamidiani. 24 Che Gidioni ŵaatumile ŵantenga mulimose ku chilambo cha itumbi cha Efulaimu akaasalile kuti, "Mwaasalile ŵangondo atuluche akaapute Ŵamidiani ni kwasiŵila kuti akajomboka sulo syamwana ni lusulo lwa Yolodani mpaka ku Beti Bala kwa kwasumula mwakombochela." Kwayele achalume wose ŵa ku Efulaimu wasongangene ni kusumula lusulo lwa Yolodani mpaka ku Beti Bala. 25 Iyoyo peyo ŵaakamwile ilongola ŵaŵili ŵa Ŵamidiani, che Olebu ni che Seebu. Che Olebu ŵammulajile palapala pa lwala lwa Olebu ni che Seebu ŵammulajile pa luŵala lwakuminyila sabibu lwa Seebu. Nipele ŵajendelechele kwaakuilichisya Ŵamidiani, ni ŵajiichisye mitwe ja che Olebu ni che Seebu kwa che Gidioni juŵaliji peesi lusulo lwa Yolodani.