1 Pa lyuŵa limo, che Abimeleki mwanagwe che Gidioni ŵajawile kwa anyanjombagwe ni achalongo ŵane ŵa achikulugwe, ŵaakutama ku Shekemu ni ŵaasalile, 2 "Nkaausye ŵandu wose wa Kushekemu kuti, ‘Chapi chachili chambone kukwenu, kuti ŵanache wose sabini ŵa Yelubaali antawale pane kuti mundu jumo antawale? Nkumbuchilanje kuti une ni ŵanyamwe tuli miasi jimo.’" 3 Ŵanyanjomba ŵa che Abimeleki ŵaasalile ŵandu ŵa ku Shekemu aila yose yasalilwe ni che Abimeleki, ni ŵandu wose ŵa ku Shekemu ŵasagwile kwakuya che Abimeleki ligongo ŵaliji nlongo njawo. 4 Ŵampele ipande sabini ya madini ga feza iyaliji ku nyuumba ja nnungu Baali Beliti, iyatumie kwalipa ŵangondo ŵauwanga kuti ŵaakamuchisye. 5 Ŵalongene nawo kwaula ku Ofila ku musi wa atatigwe, ni kweleko ŵaauleje achapwakwe sabini wose, ŵele ŵanache ŵa Yelubaali, pachanya lwala lumo. Nambo che Yosamu juŵaliji mwanache jwa chiwango jwa Yelubaali nganammulaga, pakuŵa ŵalijuŵile. 6 Nipele ŵandu wose ŵa ku Shekemu ni ku Beti Milo ŵasongangene paasi pa chitela chachikulungwa chachili chiŵandika ni liganga lya chikumbuchisyo kwele ku Shekemu ko, ni kweleko ŵantesile che Abimeleki kuŵa mwenye jwao.

7 Che Yosamu paŵapilikene ngani syo ŵajawile kukwima pachanya chitumbi cha Gelisimu, ŵanyanyisye kwasalila ŵandu wo kuti, "Mumbilikanile mwanya ŵandu ŵa ku Shekemu, iŵaga nkusaka Akunnungu ampilikanile ni ŵanyamwe. 8 Pa lyuŵa limo, itela yajawile kukulisagulila mwenye. Nipele yachisalile chitela cha mseituni, ‘Mmwe mmeje mwenye jwetu.’ 9 Nambo chitela cha mseituni chajanjile, ‘Ana nkuti tinagaleche masengo gangu gakukoposya mauta gangu gagakuchimbichikwa ni minungu ni ŵandu, nyaule ngalisausye kuitawala itela?’ 10 Nipele itela yachisalile chitela cha ntini, ‘Njise mmwe, mme mwenye jwetu.’ 11 Nambo Ntini wajanjile, ‘Uli, neche masengo gangu gakusogosya isogosi yambone ni yakunong'a, nyaule ngalisausye kuitawala itela?’ 12 Nipele itela yo yachisalile chitela cha msabibu, ‘Njise mmwe, mme mwenye jwetu.’ 13 Nambo msabibu wajanjile, ‘Ana nkuganisya kuti ngukombola kuleka kukoposya divai jajikwasengwasya minungu ni ŵandu, nyaule ngalisausye kuitawala itela?’ 14 Mbesi itela yose yachisalile chitela cha miiŵa ‘Njise mmwe, mme mwenye jwetu.’ 15 Chitela cha miiŵa chajanjile, ‘Mwasakaga kusyene kuundenda mwenye jwenu, njisanje kuntame ku mbwilili wangu, nangaŵaga yeleyo, tinjikolesya mooto ukopochele pa miiŵa jangu ni kuitinisya itela ya mielesi ja ku Lebanoni.’"

16 Nipele che Yosamu ŵajendelechele kuti, "Ana nkuganisya nkutenda yambone ni mwakukulupilichika kunsagula che Abimeleki aŵe mwenye jwenu? Ana gelego ni malipilo ginkwalipa che Yelubaali ni ŵamu nyuumba jakwe kwa yambone yose iŵantendele? 17 Nkumbuchile yakuti atati ŵangu ŵanchenjele mwanya ni ŵaliji chile kuwa kwaligongo lya kunkulupusya mwanya kutyochela kwa Ŵamidiani. 18 Nambo lelo mwagalawiche achalongo ŵa atati ŵangu, ni kwaulaga achiŵanagwe sabini pachanya pa liganga limo. Sooni muntesile che Abimeleki mwanache jwakuchilanga cha atati wangu aŵe mwenye pa ŵandu ŵaakutama ku Shekemu pakutipala nli ulongo umo. 19 Sambano iŵaga ntesile yeleyo ni ntima wenu wose ni kwakunchimbichisya Yelubaali ni achalongo ŵakwe, nipele ŵanyamwe munsengwasye che Abimeleki, nombe che Abimeleki ansengwasye ŵanyamwe. 20 Nambo, nangaŵaga yeleyo mooto ukopoche ku che Abimeleki ni kwatinisya ŵandu ŵa ku Shekemu ni ku Beti Milo, sooni mooto ukopoche kwa ŵandu ŵakutama ku Shekemu ni ku Beti Milo ni kwatinisya che Abimeleki." 21 Nipele che Yosamu ŵautwiche ni kwaula ku Beeli. Ŵatemi kweleko ligongo ŵaajogopaga che Abimeleki mpwakwe.

22 Che Abimeleki ŵaalongwesye Ŵaisilaeli kwa yaka itatu. 23 Nipele Akunnungu ŵaatindenye che Abimeleki ni ŵandu ŵa ku Shekemu, ni ŵandu ŵa ku Shekemu ŵangalawiche che Abimeleki. 24 Akunnungu ŵatesile yeleyi kulipila maulago ga ŵanache sabini wa Yelubaali, gagatendekwe ni che Abimeleki paŵaauleje achapwakwe, kwa ukamuchisyo wa ŵandu ŵa ku Shekemu. 25 Ŵandu ŵa ku Shekemu ŵaaŵisile ŵandu penani pa matumbi, anjuŵilile che Abimeleki kuti ampute. Ŵandu wo ŵansumwile ipanje mundu jwalijose juŵapitaga lyele litala lyo, ni che Abimeleki ŵasalilwe ngani jo.

26 Nipele mwanache jwa che Ebedi liina lyakwe che Gaali, ŵaiche kutama ku Shekemu pamo ni achalongo ŵakwe, nipele ŵandu ŵa ku Shekemu ŵankulupilile jwelejo aŵe chilongola jwao. 27 Ŵanawose ŵakopweche ni kwaula mmigunda jao kukukaŵa isogosi ya sabibu, nipele ŵasiminyile ni kolosya divai. Nipele ŵatesile chindimba. Ŵajawile mu nyuumba ja nnungu jwao, kuŵalile ni kung'wa ni ŵantukene che Abimeleki. 28 Che Gaali mwanagwe che Ebedi ŵatite, "Ana uweji ŵandu ŵa ku Shekemu tuli ŵantiuli? Kwachichi twatumichile che Abimeleki? Ana che Abimeleki ali ŵani? Jweleju ali mwanache ju che Gidioni, kwayele nganaŵa mpwetu jwa miasi, ngaikomboleka kuti aŵe mwenye jwetu ni ngatukombola kwajitichisya che Sebuli, jwammisile atutawale. Sambano chiiŵe yambone twajitichisye ŵandu ŵa munyuumba ja ambuje ŵetu che Amoli juŵaliji atati jwa Ŵashekemu. 29 Naga ngaliji chilongola jwa ŵandu wose ŵa, ngaausile che Abimeleki umwenye. Ngaansalile che Abimeleki kuti, ‘Njonjechesye ŵangondo ŵenu ni nnyiche tumenyane.’ "

30 Che Sebuli juŵaliji mtawala jwa musi paŵapilikene gaŵaŵechete che Ebedi, ŵatumbile kwannope. 31 Nipele ŵaatumile kwa chisyepela ŵantenga, ŵaapelechele che Abimeleki utenga ku Tolima wakuti, "Che Gaali mwanagwe che Ebedi pamo ni achapwakwe aiche kutama ku Shekemu, ni akwanyenga ŵandu kuti ankane mmwejo. 32 Nipele njise chilo mmwe pamo ni ŵandu wenu ni kwajuŵilila mmigunda chiŵandi ni musi. 33 Ni malaŵi kundaŵi lyuŵa palikukopoka, njimuche ni kuugungumuchila musi wo chisisimuchile. Che Gaali ni ŵandu ŵaali pamo nawo patakopoche paasa kumenyana nomwe, pelepo mwapute kwannope."

34 Kwapele che Abimeleki pamo ni ŵangondo ŵakwe wose ŵatyosile chilo ni kwaula ku Shekemu. Ŵaagaŵenye ŵandu ŵakwe pa mipingo ncheche, ŵalisisile kuti ŵaajuŵilile mmigunda jajili chiŵandi ni musi. 35 Che Gaali mwanagwe che Ebedi ŵatyosile paasa, ŵajimi pannango wekulungwa wa musi, katema ko Abimeleki ni ŵandu ŵakwe ŵatyosile muŵalisisile mula. 36 Che Gaali paŵaweni ŵandu wo ŵansalile che Sebuli, "Nnole ŵandu akutuluka kutyochela ku songa sya matumbi." Che Sebuli ŵanjanjile, "Mmwe nkuiwona ibwilili ya matumbi ni nkupela ali ŵandu." 37 Che Gaali ŵatite sooni, "Nnole ŵandu akutuluchila pasikati ja chilambo ni mpingo wine ukutyochela kwakuli chitela chekulungwa chaakutumia ŵachisango."

38 Nipele, che Sebuli ŵansalile, "Kulifuna kwenu kuli kwapi sambano? Ana nganimma mmwe jumwatite, ‘Che Abimeleki ali ŵaani? Kwachichi twatumichile?’ Ana aŵaŵa nganaŵa ŵandu umwanyelwisye ŵala? Njauleje sambano nkamenyane nawo!" 39 Che Gaali ŵatyosile ni kwalongosya ŵandu ŵa ku Shekemu ni kuputana ni che Abimeleki. 40 Nambo che Gaali ŵalepele ni kuutuka kwinjila mmusi, akuno che Abimeleki ali nkwakuilisya. Ŵandu ŵajinji ŵaulele ni kugwa mwitala mpaka kwika pannango wekulungwa wakwinjilila mmusi. 41 Nipele, che Abimeleki ŵausile ku Aluma ni che Sebuli ŵammutwisye che Gaali ni achalongo achinjakwe atyoche mu chilambo cha ku Shekemu.

42 Lyuŵa lyaaŵili lyakwe che Abimeleki ŵapilikene kuti ŵandu ŵa ku Shekemu atyosile mmusi ni kwaula mmigunda. 43 Ŵaajigele ŵandu ŵakwe, ŵaagaŵenye mipingo jitatu ni kwaŵika ŵaajuŵilile mmigunda mo. Paŵaaweni ŵandu ali nkutyoka mmusi, ŵatyosile muŵalijuŵile mula, ŵaagungumuchile ni kwaulaga. 44 Che Abimeleki ni ŵangondo uwaliji nao ŵala ŵautwiche ni ŵajawile kwima pannango wekulungwa wa musi. Ŵaasiŵile ŵandu akauja ni kwinjila mmusi. Mipingo jine jiŵili jila ŵaajaulile aŵala ŵaŵaliji mmigunda ni kwaulaga wose. 45 Ngondo jajendelechele lyuŵa lila tetete. Che Abimeleki ŵaujigele musi ula, ŵaauleje ŵandu wose mwelemo, ni ŵagumwile majuumba gose ni kukusulila njete pa lisi lyose lya musi wo.

46 Nipele ilongola uŵaliji nkutama ku lusonga lwa ku Shekemu paŵapilikene ngani ji, ŵautuchile kukulisisa mu likome lya nyuumba ja nnungu jwakuŵilanjikwa Baali Beliti. 47 Che Abimeleki ŵasalilwe kuti ilongola wose ŵaakutama ku lusonga lwa ku Shekemu asongangene pamo. 48 Che Abimeleki pamo ni ŵangondo uŵaliji nawo, ŵakwesile kwaula ku chitumbi cha Salumoni, che Abimeleki ŵajigele liŵago ŵakatile lujambi lumo ni kulujigala pekoyo pakwe. Nipele ŵaalajisye ŵandu uŵaliji pamo nawo ajanguye kutenda mpela muŵatesile. 49 Mundu jwalijose ŵakatile lujambi nti iŵakatile che Abimeleki. Ŵajigele nyambi syao ni kusijimika pa likumba lya likome, ŵatasile mooto kuti achome likome lyo ni ŵandu wose ŵaŵaliji pa likome lyo ŵawile. Ŵandu wose achalume kwa achakongwe nti ŵandu elufu moja ŵawile.

50 Nipele che Abimeleki ŵajawile ku Tebesi, ŵausungwile musi wo ni kuujigala kwamachili. 51 Nambo nkati musi wo kwaliji ni lusonga lwakulimbangana, ni ŵandu wose ŵa musi wo achalume kwa achakongwe ŵautuchile mwelemo ni kuliugalila. Ŵakwesilenje pa chipagala cha lusonga lo. 52 Che Abimeleki ni ŵandu ŵakwe ŵaiche kuti alugungumuchila lusonga lo, nipele ŵaiche pannango wakwinjilila ku lusonga kuti auchome mooto. 53 Nambo jwankongwe jumo juŵaliji kulusonga kula ŵamponyele che Abimeleki lisyago, ni lyamputile che Abimeleki pantwe ni kasanya ntwe wakwe. 54 Nipele kwachitema che Abimeleki ŵammilasile nchanda juŵanjigalilaga yakumenyanila yakwe, ni kunsalila, "Nsolomole lipanga lyenu muumulaje, ŵandu akajila kuti jwankongwe aamuleje une." Nipele nchanda jo ŵasolomwele lipanga lyakwe ŵansomile, nombejo ŵawile. 55 Ŵaisilaeli paŵaiweni kuti che Abimeleki awile, ŵatyosile ni kila mundu ŵausile kumangwakwe.

56 Yeleyi ni iŵatite Akunnungu kwauchisya che Abimeleki, kwa aila yachigongomalo iŵaatendele atatigwe, apala paŵaauleje achapwakwe sabini. 57 Iyoyo peyo, Akunnungu ŵaajamwiche ŵandu ŵa ku Shekemu kwa chigongomalo chao chakwakamuchisya che Abimeleki. Kwayele kulwesya ku che Yosamu mwanagwe Yelubaali kwaasimene.