1 Ŵaisilaeli paŵasongangene ku Misipa ŵatesile chilanga kwa Ambuje Akunnungu achitiji, "Ngapagwa namose jumo mwa uweji jutanlombekasye mwali jwakwe kwa ŵandu ŵa lukosyo lwa Benjamini." 2 Nipele ŵandu ŵa ku Isilaeli ŵajawile ku Beseli kukupopela, ŵateminji kweleko mpaka ligulo achinyanyisyaga ni kwalilila Akunnungu kwa ligogo. 3 Ŵatite, "Alakwe Ambuje Akunnungu, Akunnungu jwa Ŵaisilaeli, kwachichi yeleyi itendeeche kukwetu? Ligongo chichi lukosyo lumo lusimasiche mu Isilaeli?" 4 Malaŵi jakwe kundaŵipe ŵandu ŵajimwiche, ŵataŵile chilisa, ni pelepo ŵantyochesye Ambuje Akunnungu mbopesi sya kutinisya ni mbopesi sya chitendewele. 5 Nipele ŵausyene, "Uli, mwa ngosyo syose sya Ŵaisilaeli lupali lukosyo lwalulilose lwangaika pa nsongangano uwatendekwe paujo pa Ambuje Akunnungu ku Misipa kula?" Pakuŵa ŵandu wo ŵalumbilile kuti, mundu jwalijose jutaŵe nganajaula paujo pa Ambuje Akunnungu ku Misipa ko, mundu jo aulajikwe. 6 Nambo Ŵaisilaeli ŵaakolele chanasa achalongo achinjawo ŵandu ŵa lukosyo lwa Benjamini, ni ŵatite, "Lelo lukosyo lumo lwa Ŵaisilaeli lusimasiche. 7 Sambano tututende ichichi pakuti twape achakongwe, ŵele achalume ŵa lukosyo lwa Benjamini ŵasigalile wo? Pakuŵapo twamasile kulumbila kwa Ambuje Akunnungu kuti ngatwapa achiŵali ŵetu kuti aŵe achiŵankwawo!" 8 Nipele ŵausyene sooni "Ana mpingo chi mu ngosyo sya Ŵaisilaeli wanganiuika pa nsongangano patwajawile kwapopelela Ambuje Akunnungu kwele ku Misipa ko." Ŵaimanyilile kuti nganijupagwa mundu jwalijose juŵatyosile ku Yabeshi Gileadi juŵaiche ku nsongangano wo. 9 Pakuŵa pele paŵaaŵalangaga ŵandu nganapagwa namose mundu jumo kutyochela ku Yabeshi Gileadi. 10 Nipele nsongangano wa Ŵaisilaeli wo, ŵalamwile kwatuma ŵangondo elufu kumi na mbili ŵangajogopa ni kwasalila kuti, "Njaule nkaulaje kwa lipanga ŵandu ŵakutama ku Yabeshi Gileadi pamo ni achakongwe ni ŵanache. 11 Nkaaulaje achalume wosepe, ni kila jwankongwe jwawonegene ni jwannume." 12 Nambo kwele ku Yabeshi Gileadi ko, ŵaasimene achiŵali mia nne ŵaŵaliji ŵanganaonegane ni jwannume jwalijose, ni ŵaajigele ni kwajausya pa chigono kwele ku Shilo, pa chilambo cha ku Kanaani.

13 Pelepo nsongangano wose ŵaatumile ŵantenga kwa ŵandu ŵa lukosyo lwa Benjamini ŵaŵaliji ku lwala lwa Limoni kwasalila kuti ngondo jimasile. 14 Nipele ŵandu ŵa lukosyo lwa Benjamini ŵala ŵausile pa katema kakoko, ni Ŵaisilaeli ŵane ŵala ŵaapele ŵanyawo achiŵali ŵakutyochela ku Yabeshi Gileadi aŵala ŵanganaaulaga. Nambo achiŵali wo ŵapelembele.

15 Ŵaisilaeli ŵala ŵalilasiche kwaligongo lya ŵandu ŵa lukosyo lwa Benjamini ligongo Ambuje Akunnungu ŵatesile lukosyo lumo lusimasiche mu ngosyo sya ku Isilaeli. 16 Nipele achakulu ŵa nsongangano wose ŵausyene, "Kwangali achakongwe mu lukosyo lwa Benjamini. Ana tutende ichichi pakuti twape achakongwe ŵele achalume ŵasigalile wo? 17 Ikusachilwa achalume ŵaasigalile ŵa lukosyo lwa Benjamini apegwe achakongwe kuti lukosyo lwao lujendelechele, kwayele lukosyo lwalulilose mu Isilaeli lukamala. 18 Nambo ngatukombola kwalombekasya achiŵali ŵetu, pakuŵa twamasile kulumbilila kuti mundu jwalijose jutanlombekasye mwali jwakwe kwa jwannume jwa lukosyo lwa Benjamini alweseche."

19 Nipele ŵakumbuchile kuti lyuŵa lyekulungwa lya Ambuje lyalikutendekwa kila chaka ku Shilo liŵandichile. Musi wa ku Shilo uli kumpoto kwa Beseli ni chakulujenda kwa Lebona, iyoyo peyo musi wu waliji chakungopochelo lyuŵa kwa litala lyekulu lyalikutyochela ku Beseli kwaula ku Shekemu. 20 Nipele ŵaalajisye aŵala achalume ŵa lukosyo lwa Benjamini ŵanganapata achakongwe, achitiji, "Njaulanje nkalijuŵe mmigunda ja misabibu, 21 nkaalolechesye, achiŵali ŵa ku Shilo akopokaga paasa kukutyala pa katema ka chindimba, nkakopoche mmigunda mo ni kila mundu akankamule mwali jumpepe ni kunjigala kuti aŵe ŵankwakwe. Nipele mmujangane ku chilambo cha Benjamini. 22 Achatati ŵao pane achachimwene ŵao aikaga kutulalamichila chitwasalile kuti ‘Choonde tukummenda mwakolele chanasa ŵandu ŵa lukosyo lwa Benjamini ni kwalechelela ŵaajigale achiŵali wo, pakuŵa nganitukombola kwapa achakongwe ku ngondo ja ku Yabeshi Gileadi kula. Ni pakuŵa ŵanyamwe mwachinsyene nganimwatyosya achiŵali ŵenu wo kukwetu, nganinkola magambo gakukasa chilanga chilichose.’ "

23 Achalume ŵa lukosyo lwa Benjamini ŵala ŵatesile yeleyo, jwalijose ŵalisagulile mwali pasikati ja achiŵali ŵaŵakopweche paasa kutyala kwele ku Shilo ko ni kunjigala kuŵa ŵankwakwe. Nipele ŵausile ku chilambo chao chiŵapegwilwe, ŵataŵile sooni misinda jao ni kutama. 24 Katema kakoko Ŵaisilaeli ŵatyosile, kila mundu ŵausile pamalo pa lukosyo lwakwe ni pa ulongo wakwe. Kila mundu jwausile pa malo gapegwilwe paŵe pakwe.

25 Pa gele moŵa go mwaliji mwangali mwenye mu Isilaeli, kila mundu ŵagambaga kutenda yailiyose muŵasachile.