1 Che Ehudi paŵawile, Ŵaisilaeli ŵatesile sooni yachigongomalo paujo pa Ambuje Akunnungu. 2 Kwayele Ambuje Akunnungu ŵaatesile ŵangondo ŵa che Yabini mwenye jwa ku Kanaani juŵalongosyaga musi wa ku Hasoli ŵaapunde Ŵaisilaeli. Che Sisela ŵaliji jwankulu jwa ŵangondo ŵakwe, nombejo ŵatamaga ku Halosheti, chilambo cha ŵandu ŵangaŵa Ŵaisilaeli. 3 Mwenye che Yabini ŵakwete itetele mia tisa yangondo. Kwa yaka ishilini ŵaaliŵatile kwannope Ŵaisilaeli. Pelepo Ŵaisilaeli ŵalisile kwa Ambuje Akunnungu kuti ŵaakamuchisye.

4 Kele katema ko kwaliji ni jwankongwe liina lyakwe che Debola juŵaliji ŵankwakwe che Lapidoti. Che Debola ŵaliji jwakulondola jwa Akunnungu, ni sooni jwaliji jwakulamula jwa Ŵaisilaeli. 5 Che Debola yanonyelaga kutama paasi pa chitela cha ntende chichaliji pasikati ja ku Lama ni ku Beseli mu chilambo cha ikwesya cha Efulaimu. Ŵaisilaeli ŵannyichililaga pelepo kuti ŵaalamulile magambo gao. 6 Lyuŵa limo che Debola ŵannajisye mundu akammilanje che Balaki mwanache ju che Abinoamu juŵatamaga musi wa ku Kadeshi, chilambo cha ku Nafutali. Nombejo paŵaiche ŵansalile kuti, "Ambuje Akunnungu, Akunnungu jwa Ŵaisilaeli akunnajisya kuti, ‘Mwasagule ŵangondo elufu kumi kutyochela mu ngosyo sya Nafutali ni Sabuloni ni kwalongosya kwaula ku chitumbi cha Taboli. 7 Ni une chinjachisya che Sisela jwankulu jwa ŵangondo ŵa che Yabini aiche ni itetele yakwe ni ŵangondo ŵakwe ku lusulo lwa Kishoni kuti amenyane ni ŵanyamwe, ni une tinjintenda mumpunde.’ " 8 Nipele che Balaki ŵansalile che Debola, "Tinjijaula iŵaga nkwaula ni une, nambo iŵaga nganjaula ni une, none jwakwe nganyaula." 9 Che Debola ŵansalile, "Kusyene tinjijaula ni mmwejo, nambo kweleko mmwejo ngankola luchimbichimbi lulilose pa kwele kupunda ko, ligongo Ambuje Akunnungu tachintenda che Sisela aputikwe ni jwankongwe." Kwayele che Debola nombe ŵajawile pamo ni che Balaki ku Kadeshi. 10 Ku Kadeshi ko, che Balaki ŵaŵilasile ŵangondo kutyochela mu ngosyo sya Sabuloni ni Nafutali, ni ŵakwesile ŵandu elufu kumi ni kwakuya. Che Debola nombejo ŵajawile pamo ni che Balaki.

11 Pamoŵa go, che Hebeli jwa lukosyo lwa Ŵakeni ŵaliji asamile kutyoka kwa Ŵakeni achinjakwe, uŵelesi u che Hobabu, mkwegwakwe che Musa. Ŵataŵile lisakasa lyakwe chiŵandika ni achila chitela chachikulungwa chachikuwilanjikwa mwaloni chachili ku Saananimu, chiŵandi ni ku Kadeshi.

12 Che Sisela paŵapilikene kuti che Balaki mwanache ju che Abinoamu akwesile kwitumbi lya Taboli, 13 che Sisela ŵaŵilasisye itetele yakwe ya isyano yose mia tisa ni ŵangondo wose ŵaŵaliji pamo najo, ŵatyosile ku Halosheti Hagoimu ni kwaula nawo mpaka ku lusulo lwa Kishoni. 14 Che Debola ŵansalile che Balaki "Njaule! Ambuje Akunnungu akunkamuchisya. Nombewo chantende mumpute che Sisela." Nipele che Balaki ŵatulwiche ku litumbi lya Taboli achalongosyaga ŵangondo ŵakwe elufu kumi. 15 Che Balaki paŵaagungumuchile ni upanga wakwe, Ambuje Akunnungu ŵaampwilinganyisye che Sisela ni itetele yakwe ni ŵangondo ŵakwe wose. Che Sisela ŵatulwiche mu chitetele ni kuutuka wapasi. 16 Nambo che Balaki ni ŵangondo ŵakwe ŵaatopwele ŵangondo ŵa che Sisela ni itetele yakwe mpaka ku Halosheti, chilambo cha ŵandu ŵangaŵa Ŵaisilaeli ni kwaulaga ŵangondo wose kwa lipanga. Nganasigala namose mundu jumo jwanjumi.

17 Nambo che Sisela ŵautuchile ku lisakasa li che Yaeli juŵaliji ŵankwakwe che Hebeli jwa lukosyo lwa Ŵakeni, pakuŵa kwaliji ni chitendewele pasikati ji che Yabini mwenye jwa ku Hasoli ni ŵamu nyuumba ji che Hebeli jwa lukosyo lwa Ŵakeni. 18 Che Yaeli ŵakopweche kwachingamila che Sisela, ni ŵansalile, "Alakwe achimwene, njinjile mu lisakasa lyangu, njinjile nkajogopa." Nipele che Sisela wajinjile mu lisakasa li che Yaeli, nombejo ŵambunichile ni libulangeti. 19 Che Sisela ŵatite, "Choonde mumbe mesi ng'we, jingwete njota." Jwankongwe jo ŵaugwile nsaku wa lipende uwaliji ni mawele, ŵampele kung'wa, ni ŵammbunichile sooni. 20 Nombe che Sisela ŵansalile jwankongwe jo, "Njime pannango wa lisakasa, mundu jwalijose aikaga ni kummusya, ‘Ana kwana mundu jwine mwelemu?’, njileje ‘Nganapagwa.’" 21 Che Sisela ŵapesile nnope, nipele ŵagonile mwachitema. Ali mulugono, che Yaeli ŵankwakwe che Hebeli ŵajigele chigingi cha mu lisakasa ni nkomelo, ŵanjaulile kwakunyakatulila ni ŵankomelele chigingi chila pausyo wakwe, nombecho chapowele ntwe wakwe ni kwinjila paasi. Che Sisela ŵawile papopo. 22 Che Balaki paŵankuyaga che Sisela, che Yaeli ŵakopweche kukuwonegana nao ni ŵansalile, "Njise akuno ni une tinannosye mundu junkunsosa jo." Che Balaki ŵajinjile mu lisakasa li che Yaeli ni kwasimana che Sisela ali paasi, awile, ni chigingi cha lisakasa chili pa usyo wakwe.

23 Nipele, lyuŵa lila Akunnungu ŵaakamuchisye Ŵaisilaeli kumpunda che Yabini mwenye jwa ku Kanaani. 24 Ŵangondo ŵa Ŵaisilaeli ŵajendelechele kukola machili nnope, ni ŵangondo ŵa che Yabini ŵajendelechele kupwa machili. Mbesi jakwe Ŵaisilaeli ŵaajonasile che Yabini ni ŵangondo ŵao tikitiki.