1 Pagapite moŵa gamajinji, pakatema ka magungulo ga ngano, che Sansoni wakajigele kambusi, ŵajawile kukwajimajimila ŵankwakwe. Ni ŵansalile atatigwe ŵankwakwe jo, "Ngusaka ngaalole ŵankwangu ku chuumba kwakwe." Nambo atatigwe ŵankwakwe jula ŵankanyisye kwinjila. 2 Atatigwe ŵankwakwe jula ŵatite, "Uneji naatiji kuti kusyene mwachimile ŵankwenu. Kwayele nanlombekasisye kwa mmbusangagwenu. Nambo akwete mpwakwe jwakutindigala kupunda ŵankwenu. Nkukomboleka kulombela jwelejo pamalo pakwe."

3 Che Sansoni ŵansalile, "Sambano ngasinsala kuti une neŵile kwa yele itinaapanganyichisye Ŵafilisiti." 4 Nipele che Sansoni ŵajawile kugakamula makule mia tatu ni ŵagataŵile gaŵiligaŵili michila jao, ni ŵaŵisile lumuli pa michila ja kila makule gaŵiligaŵili. 5 Pelepo ŵapambile mimuli jo pa mooto ni kugalelechelela makule gala, nombe go gajawile mmigunda ja ngano ja Ŵafilisiti, ni ŵajochile ngano josepe, jekate ni kutaŵa ilingo ilingo ni jangakata jiŵaliji chiŵela mmigunda, ni sooni ŵachomile migunda ja miseituni nombejo. 6 Ŵafilisiti ŵausisye jwatesile yeleyo, ŵasalilwe kuti che Sansoni ni juŵatesile yeleyo ligongo lya atati jwa ŵankwakwe jwa ku Timina, ŵanlombekasisye ŵankwakwe kwa mmbusangagwe. Pelepo Ŵafilisiti ŵajawile ku Timina kukwatinisya mooto jwankongwe jo pamo ni atatigwe mpaka ŵawile.

7 Che Sansoni ŵaasalile Ŵafilisiti ŵala, "Pakuŵa ntesile yeleyi, ngulumbila, ngaandyoka mpaka nammuchisye." 8 Pelepo ŵaagungumuchile ni kwaulaga achajinji. Nipele ŵatulwiche ni kwaula kutama mu mbugu ku lwala kwele ku Etamu.

9 Ŵafilisiti ŵaiche ni kuŵika chigono chao mu chilambo cha ku Yuda ni kuugungumuchila musi wa ku Lehi. 10 Ŵandu ŵa ku Yuda ŵausisye, "Kwachichi nnyiche kutuputa?" Ŵanyawo ŵajanjile, "Tuiche kukwakamula che Sansoni kuti tukantende mwatutendele uwe." 11 Pelepo ŵandu elufu tatu ŵanjaulile che Sansoni mu mbugu ku lwala la ku Etamu ni kunsalila, "Ana ngankuimanyilila kuti Ŵafilisiti akututawala? Ana ntutesile ichichi?" Che Sansoni ŵajanjile, "Naatendele mpela yaandendele une."

12 Ŵansalile, "Tuiche kukunkamula kuti tunjausye kwa Ŵafilisiti."

Pelepo che Sansoni ŵaasalile, "Muunumbilile kuti mwanya mwachinsyene ngamumulaga."

13 Ŵanyawo ŵanjanjile, "Mwambone, uweji ngatummulaga mmwe, nambo tutunkamule ni kunjausya kwa ŵanyawo." Nipele ŵantaŵile ni ngonji siŵili syasambano ni kunkoposya mu mbugu mo.

14 Che Sansoni paŵaiche ku Lehi, Ŵafilisiti ŵammutuchile ali nkunyanyisyanga. Papopo Mbumu jwa Ambuje Akunnungu ŵantasile machili che Sansoni, nipele ŵakutulenye ngonji sisyantaŵile mmakono mwakwe mpela waliji usi yaukuti kupya pa mooto. 15 Che Sansoni ŵaliweni liupa lya majego lya mbunda jiŵawile pangakaŵa, ŵajineme ni kulilokota ni ŵauleje nalyo ŵandu elufu moja. 16 Nipele che Sansoni ŵajimbile yeleyi,

"Ni liupa lya majego lya mbunda, naauleje ŵandu elufu moja.

Ni liupa lya majego lya mbunda munjiche mitembo ja ŵandu maunjili maunjili."

17 Paŵamasile kwimba, ŵajasile liupa lya majego lyo, ni pamalo po paŵilanjikwe Lamati Lehi, malumbo gakwe chitumbi cha maupa ga majego.

18 Nipele che Sansoni jaakamwile njota kwannope, nipele ŵaapopelele Ambuje Akunnungu achitiji, "Alakwe Akunnungu ni jumungamuchisye kupata kupunda kwakukulungwa ku. Ana sambano nkusaka une mwe ni njota ni kukamulwa ni Ŵafilisiti ŵangaumbala ŵa?" 19 Akunnungu ŵaugwile pamalo palili lisimbo mu chilambo cha ku Lehi ni mesi gakopweche. Che Sansoni ŵang'wele mesi go ni machili gaaujilile. Pachiliŵa po paŵilanjikwe Eni Hakole, nombepo pali kweleko mpaka lelo jino.

20 Che Sansoni ŵaliji chilongola jwa Ŵaisilaeli kwa yaka ishilini, nambo Ŵafilisiti ŵaliji chiŵela nkutawala ku Isilaeli.