1 Ŵandu ŵa lukosyo lwa Efulaimu ŵasongangene, ŵajombweche lusulo lwa Yolodani ni ŵaiche ku Safoni. Nipele ŵammusisye che Yefuta, "Kwachichi nganintuŵilanga kuti tujaule pamo nomwe kukuputana ni Ŵaamoni? Sambano tutujitaje mooto nyuumba jenu mwasyene nli mmomo."

2 Che Yefuta ŵaasalile, "Uneji pamo ni ŵandu ŵangu twaliji ni umenyani ni Ŵaamoni. Nammilasile ŵanyamwe mungamuchisye nambo nganinnyika kukungulupusya. 3 Panaiweni kuti nganinnyika kukungamusya, naliji chile namose kuwa ni najombweche kwaula kukumenyana ni Ŵaamoni, nombe Ambuje Akunnungu ŵaandesile naapunde ŵanyawo. Sambano kwachichi nkuikanga kukuputana ni une?"

4 Nipele che Yefuta ŵaasongangenye ŵandu wose ŵa ku Gileadi, ŵajawile kuputana ngondo ni Ŵaefulaimu. Ŵagileadi ŵaapundile Ŵaefulaimu, ŵele Ŵaefulaimu wo ni uŵatite kuti, "Ŵanyamwe ŵandu ŵa ku Gileadi nli ŵandu umwatolweche, kutyochela mu lukosyo lwa Efulaimu ni Manase." 5 Pakuti ŵaasiŵilile Ŵaefulaimu akatoloka, Ŵagileadi ŵakamwile malo gakombochela lusulo lwa Yolodani. Nipele yaliji Muefulaimu jwalijose juŵasachile kutoloka paŵatite "Muuneche nyomboche," Ŵagileadi ŵammusyaga, "Uli, mmwejo Muefulaimu?" Ajilaga "Ngwamba," 6 ŵansalilaga ajile "Shiboleti." Ajilaga "Siboleti", kwa kulepela kusala liloŵe lyo yambone, ŵankamwile ni kummulajila papopo pa chomboko cha lusulo lwa Yolodani. Ŵaefulaimu elufu alobaini na mbili ŵaulajikwe pa kele katema ko. 7 Che Yefuta ŵaalongwesye Ŵaisilaeli kwa yaka sita. Nipele che Yefuta ŵawile, ŵansichile mu mmusi umo mwa misi ja ku Gileadi.

8 Paŵawile che Yefuta, che Ibisani kutyochela ku Beselehemu ŵaliji chilongola ni jwakwalamula Ŵaisilaeli. 9 Jweleju ŵakwete ŵanache achalume salasini ni ŵanache achakongwe salasini. Ŵaalombekasisye achiŵali ŵakwe kwa ŵandu ŵangaŵa ŵa ntundu wakwe, achachanda ŵakwe nombe ŵalombele kwa ŵandu ŵangaŵa ŵa ntundu wakwe. Che Ibisani ŵaalongwesye Ŵaisilaeli kwa yaka saba. 10 Nipele, che Ibisani ŵawile, ni ŵansichile ku Beselehemu.

11 Paŵaŵile che Ibisani, che Eloni jwa lukosyo lwa Sabuloni ŵaalongwesye Ŵaisilaeli kwa yaka likumi. 12 Nipele che Eloni ŵawile, ŵansichile ku musi wa Aiyaloni, ku chilambo cha lukosyo lwa Sabuloni.

13 Paŵawile che Eloni, che Abudoni mwana jwa che Hileli jwa musi wa ku Pilatoni ŵaalongwesye Ŵaisilaeli. 14 Che Abudoni ŵakwete ŵanache achalume alobaini ni isukulu salasini ŵaŵakwesile mbunda sabini. Jweleju ŵaalongwesye Ŵaisilaeli kwa yaka nane. 15 Nipele che Abudoni mwanagwe che Hileli ŵawile, ni ŵansichile kwele ku Pilatoni ku chilambo cha Efulaimu ku matumbi ga Ŵaamaleki.