1 Kwapele ŵeleŵa ali ŵandu ŵa ngosyo sine ŵati Ambuje Akunnungu ŵaalesile kuti ŵaalinje Ŵaisilaeli ŵakanajimanyilila ngondo jilijose ku chilambo cha ku Kanaani. 2 Ambuje Akunnungu ŵatesile yeleyo kuti achijiganye chipago chilichose cha Ŵaisilaeli kuputana ngondo, nnopennope ŵele ŵanganaputaneje ngondo. 3 Ŵaalesile achakulu nsano ŵa Ŵafilisiti, ni Ŵakanaani wosepe, ni Ŵasidoni ni Ŵahivi ŵaŵatamaga mmatumbi ga Lebanoni, kutandila litumbi lya Baali Helimoni mpaka ku Hamati. 4 Ŵaalesile ŵandu ŵa kuti ŵaalinje Ŵaisilaeli pakuti iyoneche iŵaga chagajitichisye makanyo ga Ambuje Akunnungu gaŵapele che Musa ŵaape achachekulu ŵao. 5 Kwayele Ŵaisilaeli ŵatemi pamo ni Ŵakanaani ni Ŵahiti ni Ŵaamoli ni Ŵapelesi ni Ŵahivi ni Ŵayebusi. 6 Ŵaisilaeli ŵalombele achiŵali ŵa ngosyo syo, nombe ŵandu ŵa ngosyo syo ŵalombele achiŵali ŵa Ŵaisilaeli, ni kujipopelela minungu ja ŵandu wo.

7 Ŵaisilaeli ŵatesile yachigongomalo paujo pa Ambuje Akunnungu, ŵaaliŵalile Ambuje Akunnungu, Akunnungu ŵao ni kutanda kuipopelela inyago ya minungu Baali ni inyago ya minungu Ashela. 8 Kwayele, Ambuje Akunnungu ŵaatumbilile Ŵaisilaeli, nipele ŵakundile che Kushani Lishataimu, mwenye jwa ku Mesopotamia ŵaapunde, ni Ŵaisilaeli ŵantumichile che Kushani Lishataimu kwa yaka nane. 9 Nambo, Ŵaisilaeli paŵaalilile Ambuje Akunnungu, Ambuje Akunnungu ŵaasagulile mundu jwakwakulupusya. Akunnungu ŵaasagulile che Otinieli mwanache ju che Kenasi, mpwakwe che Kalebu. 10 Mbumu jwa Ambuje Akunnungu ŵannyichile che Otinieli, nipele ŵaliji chilongola jwa Ŵaisilaeli. Che Otinieli ŵapite ku ngondo, nipele Ambuje Akunnungu ŵampundisye pakumpunda che Kushani Lishataimu mwenye jwa ku Mesopotamia. 11 Pelepo mu chilambo mwaliji mwana chitendewele kwa yaka alobaini mpaka che Otinieli mwanagwe che Kenasi paŵawile.

12 Nipele, Ŵaisilaeli ŵatesile sooni ya chigongomalo paujo pa Ambuje Akunnungu. Kwaligongo li, Ambuje Akunnungu ŵampele machili che Egiloni mwenye jwa ku Moabu ŵaapunde Ŵaisilaeli. 13 Mwenye che Egiloni ŵalumbikene ni Ŵaamoni ni Ŵaamaleki, nipele ŵapite kukuputana ngondo ni Ŵaisilaeli, ni ŵaapundile Ŵaisilaeli ni kwasumula musi wa ku Yeliko liina line waŵilanjikwe musi wa Itela ya mitende. 14 Mwenye che Egiloni jwa ku Moabu ŵaatawele Ŵaisilaeli kwa yaka kumi na nane.

15 Nambo Ŵaisilaeli paŵaalilile Ambuje Akunnungu, Ambuje Akunnungu ŵaasaguliele mundu jwakwakulupusya, juŵaŵilanjikwe che Ehudi, mundu jwakupanganya masengo kwa nkono wakunchiji juŵaliji mwanagwe che Gela, kutyochela mu lukosyo lwa Benjamini. Ŵaisilaeli wantumile che Ehudi ajausye mituuka jawo ku che Egiloni mwenye jwa ku Moabu. 16 Nipele che Ehudi ŵaliji akolosisye lipanga lyakutema kosekose, uleu wakwe futi jimo ni nusu. Ŵalitaŵilile munchiunu, upaande wa kunlyo kwakwe mu yakuwala yakwe. 17 Nipele ŵampelechele mituuka jila che Egiloni mwenye jwa ku Moabu. Nombe che Egileno ŵaliji mundu jwakwimbala nnope. 18 Che Ehudi piŵapele mituuka jo, ŵaasalile ŵandu ŵaŵajigele mituuka jo kuti ajaulanje. 19 Nsyene jo ŵalongene nao mpaka pa chinyago cha maganga gakusepa, chiŵandika ku Giligali, nipele ŵausile sooni kwa mwenye che Egiloni ni kuti, "Alakwe mwenye, une ngwete utenga wenu, ngusaka nansalile kwachisyepela." Kwapele mwenye ŵaasalile ŵamasengo ŵakwe, "Ntyokangane, ntuleche ŵaŵili." 20 Mwenye ŵatemi jika mu chuumba chakwe cha penani chachikuinjisya mbepo, che Ehudi ŵanjaulile ni kunsalila, "Uneji ngwete utenga wenu kutyochela kwa Akunnungu." Nipele mwenye ŵajimwiche pachitengu pala ni kwima. 21 Papopo che Ehudi ŵasolomwele lipanga lyakwe lilyaliji chakunlyo kwakwe ni nkono wakwe wakunchiji ni kulutwinyichisya mu lutumbo lwa che Egiloni. 22 Lipanga lyose lyajinjile nkati ni chikumbu chakwe, ni lipanga lyo lyakopochele kungongo. Mauta gauniche lipanga lyo ligongo che Ehudi nganalisolomola. 23 Pelepo che Ehudi ŵakopweche paasa, ŵapujiche minango ja chuumba cho ni kwaugalila.

24 Paŵatyosile, ŵakutumichila ŵa mwenye ŵaiche ni kujisimana minango ja chuumba jeugale ni ŵaganisisye kuti, "Panepa apite kukusyetelela mu chuumba mo." 25 Ŵanyawo ŵalindilile mpaka ŵajinjilwe ni lipamba, paŵaiweni ngakuugula pe ŵajigele chiugulilo ni kuugula. Paŵajinjilenje mwelemo ŵammweni mwenye jwao ali agonile paasi nombejo awile.

26 Paŵaliji nkulindilila pala che Ehudi ŵatisile, ŵapitile pa chinyago cha maganga gakusepa pala ni kuutuchila ku Seila. 27 Paŵaiche ku chilambo cha ikwesya cha Efulaimu, ŵagombile ngula ntwe kwaŵilanga ŵandu ajaule ku ngondo, nipele Ŵaisilaeli ŵatulwiche pampepe ni jwelejo, jwelejo ali nkwalongolela. 28 Nombejo ŵaasalile, "Munguye, pakuŵa Ambuje Akunnungu ampundisye ŵanyamwe kwa ŵammagongo ŵenu Ŵamoabu." Kwayele wankuiye che Ehudi ni kwasumula Ŵamoabu malo gakombochela kwele ku Yolodani, ni ngananneka mundu jwalijose ajomboche pamalo po. 29 Lyele lyuwa lyo ŵauleje ŵangondo Ŵamoabu elufu kumi, ŵakwete machili nnope ni ŵaakukombola kuputana ngondo, pangali mundu jwalijose juŵakulupwiche. 30 Lyele lyuŵa lyo Ŵaisilaeli ŵaapundile Ŵamoabu, nipele chapali chitendewele mu chilambo mo kwa yaka semanini.

31 Paŵawile che Ehudi, che Shamugali mwanache ju che Anati ŵaliji chilongola. Ŵaauleje Ŵafilisiti mia sita kwa lubokola lwaluli ni lusonga lwa chisyano, lwakulongochesya ng'ombe. Ni jweleju nombe ŵaakulupwisye Ŵaisilaeli.