Juízes 5

Lujimbo lu che Debola ni che Balaki

1 Nipele pa lyele lyuŵa lyo che Debola ni che Balaki mwanache ju che Abinoamu ŵajimbile lujimbo lu,

2 Ilongola ŵaalongwesye Ŵaisilaeli,

ŵandu ŵaakuiye kwakusaka kwawo achinsyene,

mwalape Ambuje Akunnungu.

3 Mpilikane ŵanyamwe mamwenye, mpilikanile ŵanyamwe ilongola,

Tinaajimbile Ambuje Akunnungu,

Tinaajimbile lujimbo Ambuje Akunnungu, Akunnungu jwa Ŵaisilaeli.

4 Alakwe Ambuje Akunnungu, pamwatyosile ku matumbi ga Seili,

Pamwatulwiche ku chitumbi cha Edomu,

chilambo chatinganyiche,

kwinani kwakuswile meesi,

kusyene, maunde gaanyele ula.

5 Matumbi gatinganyiche paujo penu Ambuje Akunnungu,

kusyene, namose litumbi lya Sinai lyatinganyiche paujo pa Ambuje Akunnungu, Akunnungu jwa ku Isilaeli.

6 Pa moŵa ga che Shamugali mwana ju che Anasi,

pa moŵa ga che Yaeli,

ŵamalonda ŵaŵajausyanga malonda nganaoneka mmatala gamakulungwa,

ŵapaulendo ŵapitaga mu tutala twamwana.

7 Ŵakulima ŵalesile kulima

Ŵakulima ŵamasile ku chilambo cha ku Isilaeli

mpaka panaiche une che Debola chilongola jwao,

uneji jundi mpela achikulu kwa ŵandu ŵa ku Isilaeli

8 Ŵaisilaeli paŵannesile Akunnungu ni kujipopelela minungu jine,

jakopochele ngondo mu chilambo,

nganapagwa namose mundu juŵakamwile mpamba namose chakulisiŵila pantima,

pasikati ja ŵangondo elufu alobaini mu Isilaeli.

9 Ngwachimbichisya ilongola ŵa ngondo ŵa ku Isilaeli,

pamo ni ŵandu ŵalityosisye kwakusaka kwao achinsyene.

Mwalape Ambuje Akunnungu.

10 Ŵanyamwe unkukwela mbunda ŵaswela,

mwanya unkutamila indu yatamila ya ndalama jekulungwa, yaikuŵichikwa pachanya pakwe,

ni ŵanyamwe unkwenda mwitala.

Mwasalile ŵandu ngani ji.

11 Mpilikane! malama ga mipingo ja ŵandu ŵakwimba, ŵasyungwile isima.

Ŵele ŵakwimba kupunda kwa Ambuje Akunnungu,

kupunda kwa ŵandu ŵakwe mu chilambo cha ku Isilaeli.

Nipele ŵandu ŵa Ambuje Akunnungu ŵatulwiche pa milango ja musi.

12 Njimuche che Debola, njimuche!

Njimuche, njimuche ntandeje kwimba!

Njimeje che Balaki,

njigale ŵandu ŵenu umwakamwile ku ngondo.

Alakwe mwanache ju che Abinoamu. 13 Pelepo ŵangondo ŵaŵasigalile ŵausile kwa ilongola ŵao,

ŵandu ŵa Ambuje Akunnungu ŵaiche kukwangu kukuputana ngondo

ni ŵammagongo ŵetu ŵakwete machili.

14 Ŵangondo ŵaiche kutyochela mu lukosyo lwa Efulaimu, ŵatuluchile kwiŵanda,

ŵakuiye achalongo achinjawo ŵangondo ŵa lukosyo lwa Benjamini.

Kutyochela mu ntundu wa Makili ŵatulwiche achakulungwa ŵa ŵandu ŵangondo kukuputana ngondo,

kutyochela mu lukosyo lwa Sabuloni ŵaiche ilongola achakulu ku ngondo ali ajigele nkongojo wa ulamusi.

15 Achakulu ŵa lukosyo lwa Isakali ŵaiche pamo ni che Debola,

kusyene, ŵandu ŵa Isakali ŵaiche pamo ni che Balaki,

ŵankuiye achiutukaga mpaka kwiŵanda.

Nambo mitundu ja lukosyo lwa Lobeni jagaŵanyiche,

ŵalepele kutyosya maamuzi kuti ajaule pane akajaula.

16 Kwachichi mwasigele ni ngondolo?

Uli mwaliji nkupilikanila ŵakuchinga ali nkugomba lwisi syakuŵilanga ngondolo?

Kusyene mitundu ja lukosyo lwa Lobeni jagaŵanyiche,

ŵalepele kutyosya maamuzi kuti ajaule pane akajaula.

17 Ŵagileadi ŵatemi peesi lusulo lwa Yolodani.

Ŵandu ŵa lukosyo lwa Dani ligongo chichi ŵasigalile ni meli?

Ŵandu ŵa lukosyo lwa Asheli nombewo ŵatemi mmajumba mwao,

chiŵandi ni bahali.

18 Ŵangondo ŵa lukosyo lwa Sabuloni nganajogopa kuwa ku ngondo

iyoyo peyo ŵangondo ŵa lukosyo lwa Nafutali nganajogopa ku ngondo,

paŵajawile kwagungumuchila ŵammagongo.

19 Mamwenye ŵaiche kukumenyana ngondo,

mamwenye ŵa ku Kanaani ŵaputene ngondo kwele ku Taanaki ko

chiŵandi ni iliŵa ya meesi ya Megido,

nambo nganatusumula madini ga feza namose chindu chilichose.

20 Ndondwa syaputile ngondo kwele kumaunde ko,

pasyaliji nkwenda mmatala gakwe kumaunde ko

syaputene ni che Sisela. 21 Chikumba mesi cha lusulo lwa Kishoni chaakwekwelemye ŵanyawo,

kusyene chikumba mesi chekulungwa cha lusulo lwa Kishoni.

Alakwe mbumu jangu njaule mmbujo kwamachili.

22 Falasi sya che Sisela syapite kwakwanguya sili nkukochopola kochopola ni sajo syao,

syapitile kwakwanguya ni isindo ya sajo syao yapikaniche.

23 Katumetume jwa kwinani jwa Ambuje Akunnungu ŵatite, "Alweseche ŵandu ŵa musi wa ku Melosi,

alweseche ŵandu ŵakutama mwelemo.

Pakuŵa ŵakanile kukamuchisya ngondo ja Ambuje Akunnungu,

ŵakanile kuputana ngondo ni ŵammagongo, ŵakwete machili."

24 Akole upile che Yaeli, ŵankwakwe che Hebeli jwa lukosyo lwa Ŵakeni,

kwapunda achakongwe wose,

kusyene akwete upile kwapunda achakongwe wose

ŵakutama mmasakasa.

25 Che Sisela ŵaŵendile mesi nombewo ŵapele maŵele.

Ŵaapele maŵele gamachesuche mu chombo cha luchimbichimbi.

26 Ku nkono wakwe wakunchiji ŵakamulile chigingi cha lisakasa,

ku nkono wakwe wakunlyo ŵakamulile nkomelo,

ŵankomele che Sisela ni kupowola pausyo jakwe, kasanya ntwe wakwe,

ŵankasenye ntwe wakwe.

27 Che Sisela ŵalijinamile ni ŵagwile pa makongolo ga che Yaeli,

ni ŵagonile lugono lwakutopela pamakongolo pa che Yaeli.

Palapala paŵalijinamile,

ŵagwile paasi ni ŵawile.

28 Achikulugwe che Sisela ŵalingulile pedilisha lyakwe,

ŵalindililaga kuti ŵaone achiujaga,

ŵatite, "Kwachichi chitetele chakwe chikukaŵa kwika?

Kwachichi misindo ja itetele yakwe ikukaaŵa kupikanika?"

29 Achakongwe ŵaali ni lunda ŵaŵantumichila ŵanjanjile, nombejo ŵalitulesye ntima ni majanjo go,

ŵajendelechele kulisalila,

30 "Panepa akusosa ni kugaŵana indu yasumwile kungondo,

jwankongwe jumo pane ŵaŵili kwa kila jwangondo,

nguo jakusalala kwaligongo li che Sisela.

Nguo syakuluka sya langi syakupisyangana

ni miinjilo jiŵili jakusalala, jeetotele yakusalalichisya mu lukosi, kwaligongo lyangu.

31 Alakwe Ambuje Akunnungu, ŵammangongo ŵenu wose ajasicheje!

Nambo achambusanga ŵenu ang'alime mpela lyuŵa palikukopoka ni lilanguka lyekulungwa!"

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?