1 Nipele Ŵaisilaeli wose kutandilila ku Dani mpaka ku Beli Sheba pamo ni ŵandu ŵa ku Gileadi, ŵatyosile ni ŵasongangene kwele ku Misipa, paujo pa Ambuje Akunnungu. 2 Ilongola ŵa ngosyo syosepe sya Ŵaisilaeli ŵaiche paujo pansongangano wa ŵandu ŵa Akunnungu, ŵanawose ŵaliji ŵangondo laki nne ŵaakwenda wapasi, ŵaŵajigele mapanga. 3 Nipele ŵandu ŵa lukosyo lwa Benjamini ŵapilikene kuti Ŵaisilaeli achinjawo akwesile kwaula ku Misipa.

Nipele, Ŵaisilaeli ŵammusisye Mlawi jula, "Ntusalile, chelechi chakusakala chi chatendekwe kwantiuli?" 4 Ajula Mlawi, jwannume jwa jwankongwe juŵaulajikwe jula ŵaajanjile achitiji, "Uneji ni chilanga changu twaiche ku Gibea musi wauli wa lukosyo lwa Benjamini kuti tukagone chilo cho kweleko. 5 Achalume ŵa ku Gibea ŵaiche chilo, ŵajisyungwile nyuumba jinagonile jo achisakaga kuumulaga. Ŵangonile kwamachili chilanga jwangu jo mpaka ŵawile. 6 Une nachijigele chiilu chakwe, nachikatenye iŵaloiŵalo ni kuchijausya chiŵalo chimo ku kila lukosyo, mwa ngosyo kumi na mbili sya Ŵaisilaeli. Pakuŵa ŵele ŵandu wo atesile chindu chaasoni ni chakusakala pasikati ja Isilaeli. 7 Mwanya wosepe nli Ŵaisilaeli, nliusye chintende ichichi."

8 Ŵandu wose kwanakamo ŵajimi nikuti, "Ngapagwa namose jumo mwa uweji juchaujile kumangwakwe namose ku lisakasa lyakwe. 9 Yeleyi ni ichitwapanganyichisye ŵandu ŵa ku Gibea. Chitutende gudugudu itutujile pakwaagumuchila. 10 Ni uwe chitusagule ŵandu likumi mwa ŵandu mia moja kutyochela mu ngosyo syose sya Ŵaisilaeli ni ŵandu mia moja mwa ŵandu elufu moja ni ŵandu elufu moja mwa ŵandu elufu kumi. Ŵandu wo chapanganye masengo gakwaichisya chakulya ŵangondo ŵachaŵe ni masengo gakwaputa ŵandu ŵa ku Gibea, ŵaali chilambo cha Benjamini kwa chindu chaasoni ni changalumbana chatesile mu Isilaeli." 11 Kwayele ŵangondo wose ŵa ku Isilaeli ŵaŵasongangene pamo ŵajilene kwagungumuchila ŵandu ŵa musi wa ku Gibea.

12 Ngosyo syose sya Isilaeli ŵapeleche ŵantenga ku chilambo chose cha lukosyo lwa Benjamini akaasalile, "Ana nkukombola chinauli kuchitenda chindu chakusakala chanti nnyi? 13 Sambano mwakoposye ŵandu ŵakusakala ŵa mu Gibea wo twaulaje kuti tutyose chindu chakusakala chi mu Isilaeli," Nambo ŵandu ŵa lukosyo lwa Benjamini nganiŵaapilikanila Ŵaisilaeli achinjawo. 14 Nambo ŵandu wose ŵa lukosyo lwa Benjamini ŵatyosile mmisi jawo ni kusongangana ku Gibea kuti amenyane ni Ŵaisilaeli achinjawo. 15 Pa lyuŵa lila ŵandu ŵa lukosyo lwa Benjamini ŵaasongangenye ŵangondo elufu ishilini na sita ŵaakukombola kuputana ngondo, kutyochela mmisi jao, ali ni yakumenyanilana. Iyoyo peyo ŵasagulikwe ŵangondo mia saba kutyochela mu ŵandu ŵakutama ku Gibea. 16 Pasikati ja ŵele ŵandu ŵaŵasagulikwe wo kwaliji ni ŵandu mia saba ŵaakuputana chakunchiji, jwalijose ŵakombwele kuponya liganga kwa lingutanguta kuluputa luumbo pangakuluya. 17 Ŵaisilaeli ŵane wo kwatyosya Ŵabenjamini ŵaasongangenye ŵangondo laki nne, ŵaakumanyilila kuputana ngondo.

18 Ŵaisilaeli ŵakwesile kwaula pamalo pakwapopelela Akunnungu ku Beseli ko, ni kweleko ŵammusisya Akunnungu kuti, "Ana lukosyo chi luchilulongolele kukuputana ni ŵandu ŵa lukosyo lwa Benjamini?" Ambuje Akunnungu ŵaajanjile "Lukosyo lwa Yuda." 19 Malaŵi jakwe Ŵaisilaeli ŵajimwiche kundaŵipe, ni ŵajawile kukuŵika chigono chiŵandika ni musi wa ku Gibea. 20 Ŵaisilaeli ŵakopweche pachigono ni kwima kila mundu pamalo pakwe kuti akaputane ni ŵandu ŵa lukosyo lwa Benjamini. 21 Ŵandu ŵa lukosyo lwa Benjamini ŵakopweche paasa pa musi wa Gibea ni kuputana ni Ŵaisilaeli, pa lyele lyuŵa lyo ŵauleje Ŵaisilaeli elufu ishilini na mbili. 22 Nipele Ŵaisilaeli ŵakwesile sooni pa malo pakwapopelela Ambuje Akunnungu ni kwalilila Ambuje Akunnungu mpaka ligulo. Ni ŵausisye Ambuje Akunnungu kuti, "Ana tujaule kaaŵili tukamenyane ni achalongo achinjetu ŵa lukosyo lwa Benjamini?"

Ambuje Akunnungu ŵajanjile "Elo." 23 Nipele Ŵaisilaeli ŵalimbisyene ntima achinsyenepe, ni ŵalipanjile sooni mmalo mwawo kuputana ngondo ni lukosyo lwa Benjamini, peuto palapala paŵalipanjile kuundanda. 24 Kwayele pa lyuŵa lyaaŵili Ŵaisilaeli ŵaŵandichile kukuputana ni ŵandu ŵa lukosyo lwa Benjamini. 25 Pa lyuŵa lyaaŵili li, ŵandu ŵa lukosyo lwa Benjamini ŵatyosile ku Gibea ni kwagungumuchila Ŵaisilaeli, ni ŵaauleje ŵangondo ŵa Chiisilaeli elufu kumi na nane. 26 Nipele ŵandu wose ŵa Chiisilaeli ŵakwesile kwaula pamalo pakwapopelela Akunnungu kwele ku Beseli. Ŵatemi kweleko paujo pa Ambuje Akunnungu ali nkwalilila Ambuje Akunnungu. Ŵataŵile lyuŵa lila mpaka ligulo ni kwatyochesye Ambuje Akunnungu mbopesi syakutinisya ni mbopesi sya chitendewele. 27 Ŵaisilaeli ŵaaŵendile Ambuje Akunnungu ŵaape ushauli pakuŵa kele katema ko Lisanduku lya Lilangano lya Ambuje Akunnungu lyaliji kwele ku Beseli ko. 28 Che Finiasi mwanache jwa che Eleasali chisukulu chi che Haloni ni juŵaliji jwambopesi juŵalilolelaga Lisanduku lyo. Ŵaisilaeli ŵaausisye Ambuje Akunnungu, "Ana tujaule sooni kuputana ni achalongo achinjetu ŵandu ŵa lukosyo lwa Benjamini?"

Ambuje Akunnungu ŵaajanjile, "Njaulanje. Malaŵi tinjinkamuchisya kuti mwapute."

29 Pelepo Ŵaisilaeli ŵaaŵisile ŵangondo mwakulisisa kusyungula musi wa ku Gibea kuti aujuŵilile. 30 Nipele Ŵaisilaeli ŵakwesile kukuputana ni ŵandu ŵa lukosyo lwa Benjamini pa lyuŵa lyaatatu. Ŵalipanjile mmalo mwao chiŵandi ni musi ŵa ku Gibea mpela muŵatesile kuundanda. 31 Nombe ŵandu ŵa lukosyo lwa Benjamini ŵakopweche kukuputana ni Ŵaisilaeli, ni Ŵaisilaeli ŵalambuchisye kutila kuti atalikangane ni musi. Mpela muŵatesile kuundanda Ŵabenjamini ŵatandite kwaulaga Ŵaisilaeli ŵane mwakulanguka ni mmatala gamakulu gagakwaula misi ja ku Beseli ni ku Gibea. Ŵaisilaeli ŵaŵaulajikwe ŵaliji salasini. 32 Ŵandu ŵa lukosyo lwa Benjamini ŵaganisyaga kuti, "Twaputile mpela mutwatendele kuundanda."

Nambo Ŵaisilaeli ŵasalilene kuti, "Uweji tuutuche kuti twanyenje atyoche mu musi, aichanje ku litala lyalikulu." 33 Kwayele ŵangondo ŵa Chiisilaeli ŵatyosile mmalo gao ni kulipanga sooni kwele ku Baali Tamali. Achinjawo ŵaŵaliji nkujuŵilila ŵatyosile mwakwanguya mmalo muŵalijuŵile mula chakumaswelelo lyuŵa mwa musi wa Gibea. 34 Nipele ŵangondo elufu kumi ŵaakukombola kuputana ngondo yambone ŵaŵaasagwile kutyochela mu ngosyo syosye sya ku Isilaeli ŵajawile kwaputa ŵandu ŵaakutama mmusi wa ku Gibea. Ngondo ja lyele lyuŵa lyo jalimbile kwannope. Nambo ŵandu ŵa lukosyo lwa Benjamini nganaimanyililaga kuti konasikwa kwao kwaliji kuŵandichile. 35 Ambuje Akunnungu ŵaatendekasisye Ŵaisilaeli ŵaapunde ŵandu ŵa lukosyo lwa Benjamini. Ŵaisilaeli ŵaauleje ŵandu ŵa lukosyo lwa Benjamini elufu ishilini na tano ni mia moja pa lyele lyuŵa lyo, wosepe ŵaliji ŵangondo ŵaŵakombolaga kutumia mapanga. 36 Kwayele Ŵabenjamini ŵaiweni kuti aputikwe.

Kwapele, Ŵaisilaeli ŵalitesile akuujila panyuma mpela akwatila Ŵabenjamini kuti ŵaaleche aŵala ŵaŵalijuŵile chiŵandi ni musi wa ku Gibea ŵaapute Ŵabenjamini. 37 Ŵakujuŵilila ŵala ŵatesile mwakwanguya kwinjila mu Gibea, ŵajenele ni kwaulaga ŵandu wose ŵa musi kwa lipanga. 38 Ŵaisilaeli ŵaliji ajilene ni ŵakujuŵilila ŵala kuti chiŵaatendele chimanyisyo. Ŵajilene kuti pachaliwone lyosi mwinani kutyochela ku musi wo, 39 nipele augungumuchilanje musi wo. Katema ko ŵandu ŵa lukosyo lwa Benjamini ŵaliji auleje Ŵaisilaeli salasini, kwayele ŵasalilene kuti "Kusyene twaputile mpela itwatite kuundanda." 40 Nambo lyosi lila palyatandite kwela mwinani kutyochela mmusi ula, Ŵabenjamini paŵagalawiche, ŵatojime kuuwona musi wao uli nkutinika mooto. 41 Nipele Ŵaisilaeli ŵaagalauchile, ni ŵandu ŵa lukosyo lwa Benjamini ŵajinjilwe ni lipamba, pakuŵa ŵaimanyilile kuti alinji mu chiwa. 42 Kwayele ŵagalawiche, ŵaautwiche Ŵaisilaeli kwaula mu ukweti, nambo ngondo jaakuyaga, ni ŵakamulikwe pambindikati ja mipingo jiŵili ja ŵangondo ŵa Chiisilaeli. Ni ŵangondo ŵa Chiisilaeli ŵaŵatyosile mmusi ŵala, ŵaauleje Ŵabenjamini ŵala. 43 Ŵaisilaeli ŵaasyungwile Ŵabenjamini mbande syose, ni ŵaatopwele kutyochela ku musi wa Noha mpaka kungopochelo lyuŵa mwa musi wa Gibea ni kwaulaga ŵandu ŵajinji. 44 Pa lyuŵa lyo ŵangondo elufu kumi na nane ŵakukombola kuputana ngondo yambone, mu lukosyo lwa Benjamini ŵaulajikwe. 45 Ŵabenjamini ŵane ŵagalawiche ni kuutuchila muukweti mpaka kulwala la Limoni, Ŵaisilaeli ŵauleje ŵandu elufu tano ŵaŵautukaga. Ŵaisilaeli ŵajendelechele kwatopola mpaka ku Gidomu, ni kweleko ŵaauleje ŵangondo ŵa lukosyo lwa Benjamini elufu mbili. 46 Pa lyuŵa lila ŵauleje ŵandu ŵa lukosyo lwa Benjamini elufu ishilini na tano, ŵaŵaliji ŵangondo ŵakukombola kuputana ngondo yambone. 47 Nambo ŵangondo mia sita ŵakombwele kuutuchila mu ukweti mpaka ku lwala la Limoni, ni ŵateminji kweleko kwa miesi ncheche. 48 Ŵaisilaeli ŵaaujilile sooni ŵandu ŵa lukosyo lwa Benjamini, ŵaauleje ŵanawose. Ŵauleje achalume ni achakongwe ni ŵanache ni ilango yao, ni misi jinajose jiŵajisimene kweleko ŵajichomile mooto.