Juízes 19

Mlawi ni chilanga chakwe

1 Pa gele moŵa go mwaliji mwangali mwenye mu Isilaeli. Kwaliji ni Mlawi jumo juŵatamaga nti jwannendo kwakutalichila ku chilambo cha ikwesya cha Efulaimu. Mundu ju ŵakwete chilanga kutyochela ku Beselehemu chilambo cha ku Yuda. 2 Nambo chilanga jo ŵaundwiche. Mlawi jula ŵannesile mwali jo nombejo ŵausile kwa atatigwe, kwele ku Beselehemu ko musi wa Yuda, ŵatemi kwa miesi ncheche. 3 Lyuŵa limo jwannume jo ŵapite kukunchondelela mwali jo, kuti aujile kukwakwe. Nipele, ŵanjigele jwamasengo jwakwe ni mbunda siŵili. Mwali jula ŵampeleche ku nyuumba ja atatigwe, nombe atatigwe mwali jula paŵammweni ŵampochele kwa magasa gaŵili. 4 Atatigwe mwali jula ŵanchondelele kuti akatyoka. Nipele ŵatemi ni atatigwe mwali jula kwa moŵa gatatu, achilyaga ni kung'wa ni kugona kukoko. 5 Pa lyuŵa lyancheche ŵalaŵilile kwimuka ni kuliŵika chile kuti ajaule. Nambo atatigwe mwali jo ŵatite, "Ntande kulya kaje mpateje machili, ni njauleje." 6 Nipele ŵele ŵandu ŵaŵili wo ŵatemi kulya ni kung'wa yalumo. Nipele atatigwe mwali jo ŵansalile mundu jula, "Choonde ngone apano chilo chi ni kusangalala." 7 Mundu jula paŵatiji kuti ajaule atatigwe mwali jula ŵanchondelele kwannope ni kunsalila atameje, nombejo chilo cho ŵagonile kukoko. 8 Kundaŵipe palyuŵa lyansano mundu jula ŵajimwiche achisakaga kwaula, nambo atatigwe mwali jo ŵansalile, "Choonde nlyeje kaje. Nlindilileje muusi ni njauleje." Nipele ŵandu ŵaŵili wo ŵalile yalumo.

9 Mlawi jo pamo ni mwali jo ni jwamasengo, paŵajimwiche kuti ajaule, atatigwe jwankongwe jo ŵansalile, "Nnole lyuŵa lipite, sambano kuswele. Ngoneje papapa nsangalale. Malaŵi njimuche kundaŵipe, mmutande ulendo wa kumangwenu." 10 Nambo Mlawi jo ŵakanile kugona sooni pelepo chilo cho. Nipele ŵajimwiche ni kutanda ulendo, ni ŵaiche chiŵandi ni musi wa ku Yebusi, agano moŵa gano musi wo ukuŵilanjikwa Yelusalemu. Ŵaliji ni mwali jula ni jwamasengo jwakwe ni mbunda syakwe siŵili sila. 11 Paŵaŵandichile ku musi wa Yebusi chilo chaliji chiŵandichile, jwamasengo jula ŵansalile ambujegwe, "Ana ligongo chichi tukajinjila mmusi wa ku Yebusi ni kugona mwelemo?" 12 Ambujegwe ŵanjanjile, "Ngatugalauka ni kwinjila mmusi wachilendo, musi wati ŵandu ŵakwe ngaŵa Ŵaisilaeli. Tutujendelechele ni ulendo mpaka ku Gibea. 13 Twende tuchalile tuiche ku musi umo mwa misi jiŵili ji, tukagone ku Gibea pane ku Lama." 14 Nipele ŵajendelechele ni ulendo, lyuŵa lyakapilaga ali aŵandichile ku Gibea, musi wauli mu chilambo cha lukosyo lwa Benjamini. 15 Ŵajinjile mu musi wa ku Gibea kuti akagonanje mwelemo chilo cho. Ŵajawile kutama paluŵala lwa musi pakuŵa nganapagwa mundu jwalijose juŵaapochele kumangwakwe. 16 Ali chiŵela pelepo, jwannume jwanchekulu ŵapitile achityochelaga kumigunda kwakwe. Mundu ju kumangwakwe kwaliji ku chilambo cha ikwesya cha Efulaimu, nambo pamoŵa go ŵaliji nkutama ku Gibea nti jwannendo. Ŵandu ŵaŵatamaga ku Gibea ŵaliji ŵa lukosyo lwa Benjamini. 17 Jwanchekulu ju paŵalolite ŵammweni jwapaulendo jo paluŵala lwa musi, ŵammusisye, "Ntyochele kwapi? Nomwe nkwaula kwapi?" 18 Ŵanjanjile, "Uweji twaliji ku Beselehemu chilambo cha ku Yuda, sambano tukwaula kumusi, ku chilambo cha ikwesya cha Efulaimu. Twaliji ku Beselehemu chilambo cha ku Yuda ni sambano ngwaula ku nyuumba ja Ambuje Akunnungu ŵangu. Ngulilasika kuti ngapagwa mundu jwalijose pelepa jwatupochele kumangwakwe. 19 Nambo uwe ŵakutumichila ŵenu tujigele yakulya ya mbunda syetu ni mikate ni divai kwa une ni mwali ju ni jwamasengo jwangu. Tukwete yosepe."

20 Jwanchekulu jula ŵansalile, "Ngumpochelanga kumangwangu, chinjimpa yose yaikunsoŵa. Nkagona apano paluŵala pa." 21 Nipele ŵaajigele ŵandu wo kumangwakwe ni kusilisya mbunda sila. Ŵaapele meesi achalendo wo, ni ŵanyawo ŵaligulwile makongolo gao, ŵalile ni kung'wa.

22 Paŵaliji nkusangalala, chisisimuchile ŵandu ŵangalumbana ŵakutyochela mu musi mo ŵajisyungwile nyuumba jo ni kutanda kuputa nnango. Ŵansalilaga jwele jwanchekulu nsyene nyuumba jo kuti, "Munkoposye jwannume jwaiche kumangwenu jo, tukusaka tugone nawo." 23 Nambo jwanchekulu nsyene nyuumba jo ŵakopweche paasa, ni ŵaasalile, "Ngaŵa yeleyo achinjangu. Choonde nkatenda chindu chakusakala nnope mpela chelechi. Mundu ju ali jwannendo jwangu, nkampanganyichisya chindu chaasoni chi. 24 Mpilikane, ngwete mwali jwangu jwangaonegana ni jwannume, ni sooni apali jwankongwe jwa jwannendo jwangu. Tinaakoposye sambano jino, mwajigalanje ni kutenda nawo chachilichose chinkuchisaka, nambo mundu ju nkampanganyichisya chindu chaasoni chi." 25 Nambo ŵandu ŵala nganampilikanila kose. Kwayele Mlawi jula ŵankopwesye jwankongwe jwakwe jula paasa kwa ŵandu ŵala. Ni ŵanyawo ŵanjigele ni kungona kwamachili chilo chose. Kuninkucha ŵannesile ajaule. 26 Kuninkucha jwankongwe jwakwe jula ŵaiche ni kugwilila pannago wa nyuumba ja jwanchekulu jula, muŵaliji jwannume jwakwe jula. Jwankongwe jo ŵakomweche mpaka lyuŵa pilyakopweche.

27 Jwannume jula paŵajimwiche kundaŵi ni kuugula nnango kuti ajaule, ŵasimene jwankongwe jo ali agonile pannango wa nyuumba jo magasa gakwe gali mpela akusaka kuukwaya nnango. 28 Ŵansalile, "Njimuche, twende tujaule." Nambo jwankongwe jwakwe jo nganajanga pakuŵa ŵaliji awile. Ni ŵannyakwile ni kummika pa mbunda jakwe, ni ŵatyosile kuuja kumangwakwe. 29 Paŵaiche kumangwakwe ŵajigele chipula, ŵajigele chiilu cha jwankongwe jwakwe ni kuchikatanyakatanya iŵalo kumi nambili. Nipele ŵaijawisye iŵalo yo, kila chiŵalo kwa kila lukosyo lwa Ŵaisilaeli. 30 Jwalijose juŵaiweni yelei ŵatite, "Ngondoo! Chindu chanti nyi nganichikopochele namose kuoneka chitandilile lyuŵa lila Ŵaisilaeli paŵatyosile ku Misili kwichila lelo jino. Tuchiganichisye, tusalilane yakuti kutenda."

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?