1 Kwaliji ni mundu jumpepe juŵatamaga ku chilambo cha ikwesya cha Efulaimu liina lyakwe che Mika. 2 Lyuŵa limo che Mika ŵansalile achikulugwe, "Ana nkukumbuchila aila ipande elufu moja na mia moja ya feza yanjiŵikwe? Uneji napali ni nampikene nli nkunlwesya mundu juŵanjiŵile. Nnole, ayapa, uneji ni junajiŵile." Achikulwe ŵanjanjile, "Mwanangu, Ambuje Akunnungu ampe upile" 3 Che Mika ŵausisye ipande ya feza yo kwa achikulugwe, ni achikulugwe ŵatite, "Pakuti mwanangu nkalweseka, une nansyene nguityosya ipande ya feza yi kwa Ambuje Akunnungu kuti tukolochesye chinyago chesepekwe ni kuchiunichila kwa madini ga feza. Sambano ngummuchisya mmwejo ipande ya feza yi." 4 Che Mika paŵammuchisye achikulugwe ipande ya feza ila, achikulugwe ŵasapwile ipande mia mbili ya feza, ŵampele jwachipala, nombejo ŵasepile chinyago, ni kuchiunichila kwa madini ga feza jo. Chinyago cho chaŵichikwe mu nyuumba ji che Mika.

5 Che Mika ju, ŵakwete malo gakwe gakupopelela. Ŵakolosisye likoti lyakuunichila pantima lya jwakutaga mbopesi ni chinyago, ni ŵansagwile jumo mwa achiŵanagwe kuŵa jwambopesi jwakwe. 6 Pa gele moŵa go mwaliji mwangali mwenye mu Isilaeli, kila mundu ŵagambaga kutenda yailiyose muŵasachile.

7 Pa moŵa gagogo jwapali nchanda juŵatamaga ku Beselehemu chilambo cha ku Yuda. Jwanchanda ju jwaliji Mlawi. 8 Nchanda ju ŵasamile ku Beselehemu ni kwaula kukusosa liuto liine lyakutama. Mu kwenda mo ŵaiche ku nyuumba ji che Mika ku chilambo cha ikwesya cha Efulaimu. 9 Che Mika ŵammusisye, "Ana nkutyochela kwapi?"

Nombejo ŵajanjile, "Uneji ndili Mlawi, ngutyochela ku Beselehemu chilambo cha ku Yuda. Ngupita nchisosa malo gakuti ndame."

10 Che Mika ŵansalile, "Ntameje ni une, mmeje mshauli jwangu ni jwambopesi jwangu ni jwakuusalila chilichose chakusaka Akunnungu nachitende. Chinjimpa ipande likumi ya feza kila chaka ni nguo ni yakulya." 11 Nchanda Mlawi jula jwakundile kutama pamo ni che Mika. Jwatemi mu nyuumba ji che Mika mpela jumo jwa achiŵanagwe. 12 Che Mika ŵansagwile nchanda Mlawi jo kuti aŵe jwambopesi jwakwe, nombejo ŵatamaga kumangwakwe che Mika. 13 Che Mika ŵatite, "Sambano ngumanyilila kuti Ambuje Akunnungu tachitenda indu yangu inyendele yambone, pakuŵa ngwete nchanda Mlawi ju mpela jwambopesi."