Juízes 13

Kupagwa kwa che Sansoni

1 Ŵaisilaeli ŵanneŵele sooni Ambuje Akunnungu, nombe Ambuje Akunnungu ŵaalesile Ŵafilisiti ŵaatawale kwa yaka alobaini.

2 Katema ko kwaliji ni mundu jumo jwa musi wa ku Tola jwa lukosyo lwa la Dani liina lyakwe che Manoa. Ŵankwakwe ŵaliji ngakuŵeleka. 3 Nambo pa lyuŵa limo, katumetume jwakwinani jwa Ambuje Akunnungu ŵankopochele jwankongwe jo ni kunsalila, "Nnole mmwejo ngankuŵeleka ni nganimmeleche, nambo sano chinkole chitumbo ni chimmeleche mwanache jwannume. 4 Nipele sambano nlilolechesye, nkang'wa divai atamuno nkologo atamuno nkalya chachilichose chachichintendekasye nkakundikwa ni Akunnungu, 5 pakuŵa tinkole chitumbo ni timmeleche mwanache jwannume. Patachipagwa mwanangwenu, nkammyola umbo syakwe, pakuŵa chaachiŵa aŵichikwe pajika kwaligongo lya Akunnungu kutandilila kupagwa kwakwe. Jwelejo chachitanda kwakulupusya Ŵaisilaeli kutyochela kwa Ŵafilisiti." 6 Pelepo jwankongwe jo ŵajawile ni kwasalila ŵankwakwe, "Mundu jwa Akunnungu ŵanyichilile, kumeso kwakwe kwaliji kukusimosya mpela kumeso kwa katumetume jwakwinani jwa Akunnungu. Une najogwepe kwannope, nganinammusya kuŵatyochele namose liina lyakwe. 7 Nambo asalile kuti une tinyikute chitumbo ni kuŵeleka mwanache jwannume. Ŵasalile kuti ngasing'wa divai atamuno nkologo atamuno kulya chachilichose chachichindendekasye ngasingundikwa ni Akunnungu, ligongo kutandilila lyuŵa lichapagwe mwanache jo chaŵichikwe pajika kwaligongo lya Akunnungu."

8 Pelepo che Manoa ŵapopesile kwa Ambuje Akunnungu achitiji, "Choonde alakwe Ambuje Akunnungu, mundu jumuntumile jula aiche sooni kuti atujiganye yakuŵajilwa kuntendelela mwanache jo patachipagwa." 9 Akunnungu ŵampikanile che Manoa, nombe katumetume jwakwinani jwa Akunnungu ŵaiche sooni kwa jwankongwe jo paŵaliji ku migunda. Nambo che Manoa ŵankwakwe nganaŵa pamo najo. 10 Kwayele jwankongwe jo ŵautwiche kwakwanguya ni ŵajawile kwasalila ŵankwakwe, "Nnole! Ajula mundu juŵanyichilile alila lyuŵa lila anyichilile sooni." 11 Che Manoa ŵajimwiche ni kulongana ni ŵankwakwe. Ŵannyichilile mundu jo ni kummusya, "Ana mmwe ni mundu jumwakungulwiche ni ŵankwangu?" Mundu jo ŵajanjile, "Elo ndili une." 12 Nipele che Manoa ŵammusisye, "Sambano pitigatendekwe gelego, indu chi itutuipanganye kwa mwanache jo? Ana chapanganye masengo gachi?" 13 Katumetume jwakwinani jwa Akunnungu ŵansalile che Manoa, "Ŵankwenu akusachilwa agapanganye gose ginaasalile. 14 Akalya chakulya chachilichose chachili ni sabibu, namose divai, namose kung'wa nkologo namose akalya chachilichose chachichatendekasye akakundikwa ni Akunnungu. Yose inaalajichisye aipanganye."

15 Che Manoa ŵansalile katumetume jwa kwinani jwa Ambuje Akunnungu jo, "Choonde nlindilile kanondi tunkulumichisye kambusi nlye." 16 Katumetume jwakwinani jwa Ambuje Akunnungu jo ŵanjanjile, "Nachiŵamuna nkuunganganyichisya kuti ndame kanandi, uneji ngaandya chakulya chenu. Nambo mwasakaga kutyosya mbopesi jakutinisya, mbopesi jo mwatyochesye Ambuje Akunnungu." Che Manoa nganaimanyililaga kuti jwelejo juŵakungulwiche najo jwaliji katumetume jwakwinani jwa Ambuje Akunnungu.

17 Nipele che Manoa ŵansalile katumetume jwakwinani jwa Ambuje Akunnungu jo "Ntusalile liina lyenu kuti patigatendekwe ginsasile go tunchimbichisye."

18 Katumetume jwakwinani jwa Ambuje Akunnungu ŵanjanjile, "Kwachichi nkuumusya liina lyangu? Liina lyangu lili lyakusimonjeka."

19 Pelepo che Manoa ŵakalingenye kambusi pamo ni mbopesi ja utandi, ŵaiŵisile pachanya lwala, nipele ŵantyochesye Ambuje Akunnungu. Katumetume jwakwinani jo ŵachitesile chindu chakusimosya, che Manoa ni ŵankwakwe ali nkulolechesya.

20 Kwayele, che Manoa ni ŵankwakwe paŵaalolechesyaga pamalo pakupelechela mbopesi pala, ŵammweni katumetume jwakwinani jwa Ambuje Akunnungu achijaulaga ni lilamba lya mooto kwaula kwinani. Che Manoa ni ŵankwakwe, ŵajineme ni kwapopelela. 21 Kwayele katumetume jwa kwinani jwa Ambuje Akunnungu nganankopochela che Manoa sooni namose ŵankwakwe. Pelepo che Manoa ni paŵaimanyilile kuti jwelejo jwaliji katumetume jwa kwinani jwa Ambuje Akunnungu.

22 Che Manoa ŵansalile ŵankwakwe, "Kusyene uwe chituwe, ligongo twaweni Akunnungu!"

23 Nambo ŵankwakwe ŵanjanjile, "Ambuje Akunnungu akasache kutuulaga ngakajikunde mbopesi jetu jakutinisya namose mbopesi ja utandi, namose ngakatulosye indu yi yose namose ngaakatupe malajisyo gala."

24 Nipele ŵankwakwe che Manoa ŵaligopwele mwanache jwannume ni kwapa lina lyakwe Sansoni, mwanache jo ŵakusile, ni Ambuje Akunnungu ŵampele upile. 25 Mbumu jwa Ambuje Akunnungu ŵatandite kupanganya masengo nkati mwakwe paŵatamaga ku Mahane Dani, pasikati ja Sola ni Eshitaoli.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?